Qasym-Jomart Toqaev túrkitildes memleketterdiń yntymaqtastyq keńesi sammıtiniń ashylýynda sóz sóıledi, dep habarlaıdy "Adyrna" ulttyq portaly, zakon.kz saıtyna silteme jasap.
Qazaqstan Prezıdenti 1992 jyly Ankaradaǵy alǵashqy kezdesý kezinde Nursultan Nazarbaev túrki elderiniń basshylary budan ári qasıetti Túrkistanda bas qosady dep aıtqanyn eske aldy. Sonymen qatar, el Prezıdenti Túrkistan - búkil túrki halyqtary úshin qasıetti oryn ekenin atap ótti.
"Biz bul kezdesýdi barlyǵymyz úshin qasıetti jer - Túrkistanda uıymdastyrýdy josparladyq. Alaıda, pandemııanyń jaǵdaıynyń ýshyǵýyna baılanysty sammıtti onlaın formatta ótkizý týraly sheshim qabyldandy. Pandemııa bitkennen keıin bárimiz burynǵydaı kezdesetinimizge senimdimin. Osy múmkindikti paıdalana otyryp, barshańyzdy Naýryz merekesimen taǵy da quttyqtaımyn. Men barlyq baýyrlas elderge ósip, órkendeýdi tileımin. Endi men is-sharanyń uıymdastyrýshysy retinde Túrki keńesiniń beıresmı sammıtin ashyq dep jarııalaımyn» dedi Toqaev.
Qazaqstan Respýblıkasy Prezıdentiniń aıtýynsha, «bizdiń ata-babalarymyz uly ustaz Qoja Ahmet Iassaýıden dinı bilim alyp, búkil túrki ıslam mádenıetin búkil álemge taratqan. Túrki halqy Kishi Azııaǵa bet burǵan kezde osy qundylyqtardyń barlyǵy bizdiń kúsh-jigerimizdi kúsheıtýdiń negizi bolyp qalyptasty».
Toqaev túrkitildes elderdiń maqsaty, túrki álemin 21 ǵasyrdaǵy eń mańyzdy ekonomıkalyq, mádenı jáne gýmanıtarlyq keńistikterdiń birine aınaldyrý ekenin atap ótti.
"Men túrki órkenıetin jańǵyrtýdy eń aldymen Iassaýı murasy men qasıetti Túrkistandy búkil álemge tanystyrýdan bastaýǵa shaqyramyn. Sondyqtan búgingi sammıt «Túrkistan - túrki áleminiń rýhanı astanasy» dep atalady. Elbasy Nursultan Nazarbaevtyń bastamasymen Túrkistan qalasy túbegeıli ózgerip, jańa kelbetke ıe boldy" dedi Toqaev.
2021 jyly túrkitildes memleketterdiń yntymaqtastyq keńesiniń sammıti onlaın rejımde ótip jatyr. Sammıtte Qazaqstan Respýblıkasynyń Tuńǵysh Prezıdenti men memleket basshylary da sóz sóıleıdi.
"Adyrna" ulttyq portaly
