Búgin, 8 jeltoqsanda Almaty sotynda 2022 jylǵy qańtardaǵy tártipsizdikter kezinde laýazymdyq ókilettikterin asyra paıdalandy dep aıyptalǵan Ulttyq qaýipsizdik komıtetiniń 11 qyzmetkerine qatysty úkim shyǵaryldy. Bul týraly Azattyq jazdy, dep habarlaıdy «Adyrna» tilshisi.
UQK-nyń burynǵy jeti qyzmetkeri úsh jyldan bes jylǵa deıin bas bostandyǵynan aıyryldy. Taǵy úsheýi shartty jaza alsa, al bireýi aqtalyp shyqty.
Advokat Gúlnar Jýaspaeva sottyń mundaı sheshim shyǵarǵanyna narazy.
«Birinshiden, óte az jaza berdi. 3-5 jyl. Eń basty aıyptalýshy Jumanovty sot aqtady. Adamdardy uryp-soǵyp, tepkilegenderdiń úsheýine shartty jaza berdi. Sot úkimine kelispeımiz. Oǵan shaǵym túsiremiz. Azamattyq shaǵymdy ishinara ǵana qanaǵattandyrdy. Ótepbaevanyń áıeline moraldyq shyǵyn retinde – 20 mln teńge, birneshe adamǵa mıllıon teńge tólenedi. Qalǵandarynyń shaǵymy qanaǵattandyrylmady. Óte ádiletsiz úkim! Jábirlenýshilerdiń quqyǵyn qorǵaǵan maǵan qatysty jeke qaýly shyǵardy»,- dedi ol.
