Ulttyq qaýipsizdik komıteti Shekara qyzmetiniń burynǵy basshysy Darhan Dilmanovqa qatysty sot úkimi shyqty. Bul týraly Almaty garnızonynyń áskerı soty málimdedi, dep habarlaıdy ”Adyrna” ulttyq portaly.
Málimet boıynsha, UQK tóraǵasynyń burynǵy orynbasary - Shekara qyzmetiniń dırektory Darhan Dilmanov pen basqa da laýazymdy tulǵalarǵa bılikti asyra paıdalandy jáne iri mólsherde para aldy degen aıyp taǵyldy.
«D.E esimdi azamat D.Dilmanovqa QHR-dan Qazaqstanǵa júkterdi ótkizý pýnkti arqyly aýystyryp tıeýdiń ázirlengen qylmystyq shemasyn engizýdi usynǵan. Eger ol sátti júzege assa, ol odan belgili bir tabys alatyny anyqtaldy. Baqylaý pýnkti arqyly taýardy odan shyqpaı jáne jalpy kezekti aınalyp ótýdiń zańsyz shemasy engizilýine baılanysty 1750 rettik reıs jasaldy, nátıjesinde iri shyǵyn keltirildi», - delingen sot habarlamasynda.
Sottalýshylardyń kinási kýágerlermen, áskerı-jarǵylyq zertteýlermen, saraptamalardyń qorytyndylary jáne qujattyq tekserý aktileri arqyly dáleldengen.
Prokýror aıyptalýshylarǵa múlkin tárkilep, 4 jyldan 9 jylǵa deıingi merzimge bas bostandyǵynan aıyrý túrindegi jaza taǵaıyndaýdy surady.
Sottalýshy Q. kinásin moıyndamaı, áreketinde qylmys quramynyń bolmaýyna baılanysty aqtaýdy surady.
Darhan Dilmanov jáne basqalar óz kinálaryn tolyq moıyndap, istegen isine ókinip, jazanyń eń jeńil túrin, eń tómengi jaza túrin taǵaıyndaýdy, sondaı-aq qosymsha jaza túrlerin qoldanbaýdy surady.
«Sot jasalǵan qylmystyń sıpaty men qoǵamdyq qaýiptilik dárejesin eskere otyryp, D.D.-ǵa Qylmystyq kodekstiń 450-baby 2-bóligi boıynsha múlki tárkilenip, 4 jylǵa bas bostandyǵynan aıyrý túrindegi jaza taǵaıyndady. Qazaqstan Respýblıkasynyń Prezıdentine D.D. «general-leıtenant» áskerı ataǵynan, II dárejeli «Aıbyn»memlekettik nagradasynan jáne «Ulttyq qaýipsizdik komıtetiniń ardageri» qurmetti ataǵynan aıyrý týraly usynys engizilsin», - delingen sot úkiminde.
Aıyptalýshy Q. QR QK-niń 28-baby 5-bóligi, 450-baby, 366-baby 3-bóligi, 1, 2, 4-tarmaqtarymen kózdelgen qylmystyq quqyq buzýshylyqtardy jasaǵany úshin kináli dep tanylyp, oǵan 5 jylǵa bas bostandyǵynan aıyrý jazasy taǵaıyndaldy.
«E., QR QK-niń 55-babyn paıdalana otyryp, QK-niń 366-baby 3-bóliginiń 1, 2, 4-tarmaqshalarynda kózdelgen qylmystyq quqyq buzýshylyqty jasaǵany úshin kináli dep tanylyp, oǵan paranyń 30 eselengen somasy – 1 267 000 teńgege – 38 010 000 teńge aıyppul salyndy.
Qalǵan sottalýshylarǵa múlki tárkilenbesten 3,5 jyldan 5,5 jylǵa deıin bas bostandyǵyn shekteý jazalary taǵaıyndaldy», delingen úkimde.
Sondaı-aq, sottalǵandar ómir boıy memlekettik qyzmette qyzmet atqarý quqyǵynan aıyryldy.
Úkim zańdy kúshine engen joq.
