Pavlodar qalasy ákimdiginiń "Pavlodar qalasy memlekettik aktıvter jáne satyp alý bólimi» jańa jyldyq shyrshany bezendirýge 65 920 000 teńge qarjy bóldi, - dep habarlaıdy Adyrna ulttyq portaly satypalu.gov.kz/ saıtyna silteme jasap.
Memlekettik satyp alý týraly habarlama 27 qyrkúıek kúni jarııalanyp, 12 qazan kúni atalǵan tenderdiń jeńimpazy bolyp «JK Aıbat» atty kompanııa tanylǵan. Iaǵnı, Pavlodar qalasynyń ákimdigi qazan aıyndaǵy Respýblıka kúni men jeltoqsandaǵy Táýelsizdik merekesin toılamaı jatyp, jańa jyldyq shyrshany ornatýǵa daıyndyq bastap ketken.
Tehnıkalyq sıpattamada shyrsha shart kúshine engen kúnnen bastap 21 kúntizbelik kún ishinde jetkizilýi, shyrshanyń jaramdylyq merzimi 36 aıǵa jetýi, bıiktigi 30 metr, dıametri 12,2 metrden aspaýy kerektigi kórsetilgen. Demek, qujat boıynsha tapsyrys oryndaýshy shyrshany qarasha aıynda ornatyp tastaýǵa mindetti degen sóz.
Atalǵan qujattarmen tanysyp shyqqannan keıin bizdi birneshe suraq mazalady.
1. Pavlodar qalasy ákimdigi úshin Táýelsizdik meıramynyń quny joq pa?
2. Jaramdylyq merzimi 36 aıǵa jetetin shyrshany ákimdik ne istemek? Aldaǵy úsh jylda da jańa jyldyq merekede osy shyrsha alańǵa tigile me?
3. Qala ortalyǵyna 65 920 000 teńgege shyrsha ornatý bıýdjettiń aqshasyn ońdy-soldy shashý emes pe?
Bul suraqtardy Pavlodar qalasy memlekettik aktıvter jáne satyp alý bólimine joldadyq. Jaýabyn berip jatsa, ony da jarııalaıtyn bolamyz!
Qanat Birlikuly
Adyrna ulttyq portaly
