Seisenbı, 19 jeltoqsan küngı Ükımet otyrysynan keiın ötken baspasöz konferensiiasynda Ekologiia jäne tabiǧi resurstar ministrı Erlan Nysanbaev Özbekstannyŋ Şaradara su qoimasynyŋ maŋynda atom elektr stansasyn salu jobasyna qatystyty pıkır bıldırdı, dep habarlaidy "Adyrna" portaly Kazinform-ǧa sıltep.
«Özbekstan reseilık «Rosatom» kompaniiasymen bırge Şardara su qoimasynan jaqyn jerde, Qazaqstan şekarasynyŋ tübınde AES salu jobasyn qolǧa alyp jatyr. Sol jobany ıske asyru üşın Qazaqstannyŋ kelısımın aldy ma? Būl jobaǧa sızdıŋ ekologiiaǧa jauapty ministr retındegı pıkırıŋız qandai?» - dep sūrady jurnalist.
Ministrdıŋ aituynşa, Taşkentten älı resmi saual tüspegen. Bıraq körşıles el retınde Astananyŋ kelısımın aluǧa mındettı.
«Jalpy atom elektr stansalaryn salu boiynşa olar da är türlı mümkındıkterdı qarastyryp jatyr. Bıraq olar resmi türde mynau şekaralas memlekettermen mındettı türde hat joldap, bolmasa mūny bızben aqyldasady. Bız de ötkende qarastyrdyq qoi, sol siiaqty naqty şeşım qabyldandy dep aituǧa bolmaidy. Sol siiaqty bızdıŋ Balqaştyŋ tübınde AES salu kerek degen şeşım de qabyldanǧan joq. Tıptı salyna ma, degen mäsele tūr älı. Özderıŋız bılesızder, qoǧamda būl atom elektr stansasy jönınde türlı pıkır tuyndap jatyr. Sol sebeptı būl mäsele aiaǧyna deiın şeşılmegen», - dedı ministr.
Onyŋ aituynşa, Özbekstan qarastyryp jatqan nūsqalardyŋ ışınde Syrdariia boiynan AES salu ūsynysy da bar.
«Menıŋ bıluımşe, olar da jan-jaqty qarap jatyr. Su kerek oǧan. Syrdariianyŋ boiynan deidı, odan-būdan deidı. Bıraq naqty şeşım joq. Olar ızdenıp jatyr. Onyŋ bärıne tiıstı mamandar baǧa beredı Ol qandai elektr stansasy bolady, onyŋ buyny qandai bolady, ekınşı me üşınşı me, törtınşı me... Oǧan jauap beretın men maman emespın. Sol sebepten mamandar jauap beredı. Al tehnikalyq şeşımderı jaǧy bızdıŋ ministrlıktıŋ qūzyretınde emes. Tehnikalyq şeşım qabyldanǧannan keiın ǧana bız olardy özımızdıŋ zaŋǧa säikestendırıp qaraimyz. Ökınışke qarai, äzırşe oǧan eşqandai jauap bere almaimyz», - degen ministr öz pıkırın bıldıruden tartynyp qaldy.
Ūqsas jaŋalyqtar
