Almatyda Esentaı ózeninde sý tasqyny júrdi, dep habarlaıdy "Adyrna" tilshisi ákimdiktiń baspasóz qyzmetine silteme jasap.
Sońǵy eki kúnde Almatyda aýa temperatýrasy 0 gradýsqa deıin jylyp, aýa raıy ózgerdi. Saldarynan Ospanov kóshesiniń tómengi bóliginde ornalasqan Esentaı ózeni arnasynyń boıynda qar men qatqan muz eridi. Nátıjesinde sekýndyna 20 tekshe metrge deıingi maksımaldy aǵynmen jergilikti muzdy sý tasqyny bolyp, sý deńgeıi 1,5 metrge kóterilgen.
Ákimdiktiń málimetinshe, kommýnaldyq qyzmet sý tasqyny toqtatqan. Arnasynan tasyǵan ózen sýyn toqtatý úshin 60-qa jýyq qyzmetker jumyldyrylypty.
"Jınalǵan sýdyń boljamdy kólemi shamamen 15 myń tekshe metr sýdy quraıdy. Esentaı tundyrǵyshy sýdyń úlken massasyn ustaýǵa arnalǵan, tundyrǵyshtyń astynda sý arnaıy qubyrlar arqyly kedergisiz jáne tasqynsyz aǵyp jatyr", - dep habarlady qala ákimdigi.
Qazirgi ýaqytta jaǵdaı turaqty, zardap shekkender joq.
