Soŋǧy üş künde Qazaqstannyŋ bırneşe qalasy qaqaǧan aiazda jylusyz qaldy. Stepnogorsk, Ekıbastūz, Aqtau, Balqaş, sondai-aq Temırtau men Ridderde jylu jüielerınde apattar boldy. Atyrau da susyz qaldy.
QATELIKTER NEGE QAITALANA BEREDI?
8 jeltoqsanda Stepnogorsk qalasynda -33°C aiazda köpqabatty üiler qūbyrdyŋ üzıluıne bailanysty jylusyz qaldy.
Al 9 jeltoqsan saǧat 22:55-te Balqaş qalasynda Abai men Äbuǧaliev köşelerınıŋ qiylysyndaǧy qūbyrdyŋ jaryluy saldarynan 45 köpqabatty tūrǧyn üide jylu mäselesı tuyndady.
Qala äkımdıgınıŋ mälımetınşe, apatqa jylu jelılerınıŋ tozuy sebep bolǧan.
Apattyŋ saldaryn joiu üşın barlyq memlekettık kommunaldyq käsıporyndardyŋ QSK jäne tötenşe jaǧdailardyŋ qatysuymen jedel ştab qūryldy. Jaǧdai qala äkımınıŋ jeke baqylauynda boldy.
Jöndeu jūmystary şamamen saǧat 6:00-de aiaqtalǧan, qazır üilerge jylu beru kezeŋ-kezeŋımen qalpyna keltırılude.
10 jeltoqsanǧa qaraǧan tünı Ekıbastūz jylu elektr ortalyǧynda (JES) apat oryn alyp, sonyŋ saldarynan ystyq su qazandyqtarynyŋ ekınşı sehynyŋ jabdyǧy men qapşy sorǧy stansiiasynyŋ üi-jaiy zaqymdandy. Qalada qazır 8 qazandyq jūmys ıstep tūr, jylu berude ırkılıs bolmaǧan.
Byltyr qaraşada Ekıbastūz jylu elektr ortalyǧynda ırı apat bolyp, 30 gradus aiazda tūrǧyndar jylusyz qalǧan edı. Qalada tötenşe jaǧdai jariialanyp, ükımet bır jyl boiy stansiialardy jöndeuge aqşa bölıp, olardyŋ jūmysyn qataŋ baqylaitynyn aitqan bolatyn. Degenmen, “baiaǧy jartas – sol jartas”.
Odan bölek, Aqtauda da magistraldyq jylu qūbyrynda tötenşe jaǧdai oryn alyp, sonyŋ saldarynan 10 şaǧyn audanda üilerge jylu beru uaqytşa şektelgenı belgılı boldy. Oqiǧa ornynda «Kaspii jylu, su arnasy» (QJSA) kommunaldyq käsıpornynyŋ mamandary jūmys ısteude.
Aimaq basşysy Nūrlan Noǧaev apat ornynda bolyp, kommunaldyq sala qyzmetkerlerımen keŋes ötkızıp, bırqatar tapsyrmalar bergenı aityldy.
Kommunaldyq apat saldarynan Jaŋaözen perzenthanasynyŋ pasientterı de toŋǧandaryn aityp şaǧymdandy.
Al qala äkımı Ūlyqbek Tnaliev uaqytşa qolaisyzdyqtar üşın tūrǧyndardan keşırım sūrap, 10 jeltoqsan künı keşke deiın jöndeu jūmystaryn jürgızuge uäde berdı.
ATYRAU SUSYZ QALDY
Atyrauda qalany sumen qamtamasyz etetın Jaiyq özenındegı köktaiǧaq saldarynan su alatyn qūrylystar toqtap qaldy. «Atyrau oblysy su arnasy» MKK-nyŋ aituynşa, būǧan aiazdyŋ bastaluy men sudyŋ jyldamdyǧynyŋ tömendıgı sebep bolǧan.
Qala äkımdıgınıŋ habarlauynşa, keibır audandarda su beru qalpyna keltırıldı. Alaida, «Atyrau-Maqat» magistraldyq qūbyry baǧytynda, onyŋ ışınde «Bereke», «Köktem», «Jūldyz-3», «Teŋdık», «Aqsai-1» jäne «Aqsai-2» şaǧyn audandarynda tehnikalyq sebepterge bailanysty su jıberılmedı.
«Mūz keptelısterın joiu jäne sorǧy stansalaryn tazartu maqsatynda jūmystarǧa oblystyŋ tötenşe jaǧdailar qyzmetınıŋ küşterı jūmyldyryldy. Alaida, tötenşe jaǧdai erejesıne säikes, tüngı uaqytta tazalau jäne basqa da su tieu jūmystary jürgızılmeidı. Osyǧan bailanysty tötenşe jaǧdailar qyzmetınıŋ qyzmetkerlerı taŋǧy 8:00-de tazalau jūmystaryn bastady», - delıngen äkımdıktıŋ baspasöz habarlamasynda.
Sondai-aq, keiınnen özendı tazartu üşın Atyrau mūnai öŋdeu zauytynan (MÖZ) qosymşa brigadanyŋ qūtqaruşylarǧa qosylǧany belgılı boldy.
Äkımdıktıŋ baspasöz qyzmetınde atap ötkendei, su qūbyryndaǧy aqaulardy joiu jūmystary jalǧasuda. Oqiǧa ornynda oblys äkımınıŋ orynbasary Qairat Nūrtaev pen qala äkımı Şäkır Keikin boldy.
MİNİSTRLIK NE DEP AQTALMAQ?
Bügın Energetika ministrlıgı Ekıbastūz, Balqaş jäne Aqtau qalalaryn jylumen qamtu jaǧdaiyna qatysty pıkır bıldırdı.
Vedomstvo atap ötkendei, atalǧan qalalarda oryn alǧan oqiǧalar tehnologiialyq būzuşylyqtar retınde sipattalady. Tūtynuşylarǧa jylu berudı toqtatuǧa jol berılmeidı.
«Aǧymdaǧy jyly elımızdıŋ barlyq energiia közderın tūraqty jylumen qamtamasyz etu maqsatynda būryn-soŋdy bolmaǧan auqymdy jūmystar atqaryldy. Sonyŋ arqasynda jylumen jabdyqtauda jappai şekteuler bolǧan jahandyq apattardyŋ aldyn alyndy. Eldıŋ Energetika ministrlıgı jylumen qamtudy baqylauda. jaǧdaidy anyqtap, energetikalyq nysandardy paidalanu mäselelerı boiynşa jergılıktı atqaruşy organdarmen tyǧyz bailanysta», - dep habarlady vedomstvodan.
Sondai-aq, bügın, 11 jeltoqsan Energetika vise-ministrı Jandos Nūrmaǧanbetov otstavkaǧa kettı. Būl turaly Energetika ministrlıgınıŋ baspasöz qyzmetı rastady.
Ol elektr energetikasy, jylu elektr stansiialary, jaŋartylatyn energiia közderı salalaryn qadaǧalaǧan.
Nūrmaǧanbetov bır aiǧa juyq demalysta bolǧan. Onyŋ ūzaq demalysqa şyqqany turaly aqparatty Energetika ministrlıgınıŋ özı rastady.
Nūrmaǧanbetovtıŋ otstavkaǧa ketu yqtimaldyǧyn habarlaǧan derekközdıŋ aituynşa, oǧan Energetika ministrı Almasadam Sätqalievpen arasyndaǧy janjal sebep boluy mümkın.
Degenmen, mūny joqqa şyǧaryp ministrlık tüsınıkteme berdı.
"Energetika vise-ministrı Jandos Nūrmaǧambetov 15 qaraşa men 15 jeltoqsan aralyǧynda eŋbek demalysyna şyǧyp, basqa jūmysqa auysuyna bailanysty keiın jūmystan bosatyldy.
Vise-ministr men vedomstvo basşylyǧynyŋ arasyndaǧy kikıljıŋ turaly jelıde taralyp jatqan aqparat şyndyqqa säikes kelmeidı", – dedı energetika ministrlıgı.
Aita keteiık, Nūrmaǧanbetovtı vise-ministr qyzmetıne Sätqalievtıŋ özı ūsynǧan eken.
PREZİDENT TAPSYRMA BERDI
Sondai-aq, bügın memleket basşysy Qasym-Jomart Toqaev öŋırlerdıŋ äkımderımen jylu beru mäselesın talqylady.
Prezidentke Atyrau, Qaraǧandy, Pavlodar, Maŋǧystau oblystarynyŋ äkımderı aimaq tūrǧyndaryn jylumen jäne sumen qamtamasyz etu mäselesı jönınde esep berdı.
Toqaev apat bolǧan uchaskelerdegı jaǧdaidy şūǧyl rettep, halyqty jylumen jäne sumen qamtu ısın tez arada qalpyna keltırudı jäne barlyq eldı mekendegı kommunaldyq jelılerdıŋ üzdıksız jūmysyn jolǧa qoiudy talap ettı.
Ükımetke jylytu mausymyna daiyndyq kezınde olqylyqtar jıberılgenı turaly aityldy.
Ükımet basşylyǧy elımızdegı tozyǧy jetken energetikalyq infraqūrylymdaǧy būzylu jaǧdailaryn qospaǧanda, jalpy ahual baqylauda ekenın mälımdedı. Apattyq jaǧdailarǧa jol bermeu şaralary qabyldanyp jatyr.
Memleket basşysy berılgen tapsyrmalardy oryndau üşın Ükımetke jäne oblystardyŋ äkımderıne jeke-jeke jauapkerşılık jüktedı.
“Adyrna” ūlttyq portaly
