Sońǵy úsh kúnde Qazaqstannyń birneshe qalasy qaqaǵan aıazda jylýsyz qaldy. Stepnogorsk, Ekibastuz, Aqtaý, Balqash, sondaı-aq Temirtaý men Rıdderde jylý júıelerinde apattar boldy. Atyraý da sýsyz qaldy.
QATELIKTER NEGE QAITALANA BEREDI?
8 jeltoqsanda Stepnogorsk qalasynda -33°C aıazda kópqabatty úıler qubyrdyń úzilýine baılanysty jylýsyz qaldy.
Al 9 jeltoqsan saǵat 22:55-te Balqash qalasynda Abaı men Ábýǵalıev kósheleriniń qıylysyndaǵy qubyrdyń jarylýy saldarynan 45 kópqabatty turǵyn úıde jylý máselesi týyndady.
Qala ákimdiginiń málimetinshe, apatqa jylý jelileriniń tozýy sebep bolǵan.
Apattyń saldaryn joıý úshin barlyq memlekettik kommýnaldyq kásiporyndardyń QSK jáne tótenshe jaǵdaılardyń qatysýymen jedel shtab quryldy. Jaǵdaı qala ákiminiń jeke baqylaýynda boldy.
Jóndeý jumystary shamamen saǵat 6:00-de aıaqtalǵan, qazir úılerge jylý berý kezeń-kezeńimen qalpyna keltirilýde.
10 jeltoqsanǵa qaraǵan túni Ekibastuz jylý elektr ortalyǵynda (JES) apat oryn alyp, sonyń saldarynan ystyq sý qazandyqtarynyń ekinshi ehynyń jabdyǵy men qapshy sorǵy stanııasynyń úı-jaıy zaqymdandy. Qalada qazir 8 qazandyq jumys istep tur, jylý berýde irkilis bolmaǵan.
Byltyr qarashada Ekibastuz jylý elektr ortalyǵynda iri apat bolyp, 30 gradýs aıazda turǵyndar jylýsyz qalǵan edi. Qalada tótenshe jaǵdaı jarııalanyp, úkimet bir jyl boıy stanııalardy jóndeýge aqsha bólip, olardyń jumysyn qatań baqylaıtynyn aıtqan bolatyn. Degenmen, “baıaǵy jartas – sol jartas”.
Odan bólek, Aqtaýda da magıstraldyq jylý qubyrynda tótenshe jaǵdaı oryn alyp, sonyń saldarynan 10 shaǵyn aýdanda úılerge jylý berý ýaqytsha shektelgeni belgili boldy. Oqıǵa ornynda «Kaspıı jylý, sý arnasy» (QJSA) kommýnaldyq kásipornynyń mamandary jumys isteýde.
Aımaq basshysy Nurlan Noǵaev apat ornynda bolyp, kommýnaldyq sala qyzmetkerlerimen keńes ótkizip, birqatar tapsyrmalar bergeni aıtyldy.
Kommýnaldyq apat saldarynan Jańaózen perzenthanasynyń paıentteri de tońǵandaryn aıtyp shaǵymdandy.
Al qala ákimi Ulyqbek Tnalıev ýaqytsha qolaısyzdyqtar úshin turǵyndardan keshirim surap, 10 jeltoqsan kúni keshke deıin jóndeý jumystaryn júrgizýge ýáde berdi.
ATYRAÝ SÝSYZ QALDY
Atyraýda qalany sýmen qamtamasyz etetin Jaıyq ózenindegi kóktaıǵaq saldarynan sý alatyn qurylystar toqtap qaldy. «Atyraý oblysy sý arnasy» MKK-nyń aıtýynsha, buǵan aıazdyń bastalýy men sýdyń jyldamdyǵynyń tómendigi sebep bolǵan.
Qala ákimdiginiń habarlaýynsha, keıbir aýdandarda sý berý qalpyna keltirildi. Alaıda, «Atyraý-Maqat» magıstraldyq qubyry baǵytynda, onyń ishinde «Bereke», «Kóktem», «Juldyz-3», «Teńdik», «Aqsaı-1» jáne «Aqsaı-2» shaǵyn aýdandarynda tehnıkalyq sebepterge baılanysty sý jiberilmedi.
«Muz keptelisterin joıý jáne sorǵy stansalaryn tazartý maqsatynda jumystarǵa oblystyń tótenshe jaǵdaılar qyzmetiniń kúshteri jumyldyryldy. Alaıda, tótenshe jaǵdaı erejesine sáıkes, túngi ýaqytta tazalaý jáne basqa da sý tıeý jumystary júrgizilmeıdi. Osyǵan baılanysty tótenshe jaǵdaılar qyzmetiniń qyzmetkerleri tańǵy 8:00-de tazalaý jumystaryn bastady», - delingen ákimdiktiń baspasóz habarlamasynda.
Sondaı-aq, keıinnen ózendi tazartý úshin Atyraý munaı óńdeý zaýytynan (MÓZ) qosymsha brıgadanyń qutqarýshylarǵa qosylǵany belgili boldy.
Ákimdiktiń baspasóz qyzmetinde atap ótkendeı, sý qubyryndaǵy aqaýlardy joıý jumystary jalǵasýda. Oqıǵa ornynda oblys ákiminiń orynbasary Qaırat Nurtaev pen qala ákimi Shákir Keıkın boldy.
MINISTRLIK NE DEP AQTALMAQ?
Búgin Energetıka mınıstrligi Ekibastuz, Balqash jáne Aqtaý qalalaryn jylýmen qamtý jaǵdaıyna qatysty pikir bildirdi.
Vedomstvo atap ótkendeı, atalǵan qalalarda oryn alǵan oqıǵalar tehnologııalyq buzýshylyqtar retinde sıpattalady. Tutynýshylarǵa jylý berýdi toqtatýǵa jol berilmeıdi.
«Aǵymdaǵy jyly elimizdiń barlyq energııa kózderin turaqty jylýmen qamtamasyz etý maqsatynda buryn-sońdy bolmaǵan aýqymdy jumystar atqaryldy. Sonyń arqasynda jylýmen jabdyqtaýda jappaı shekteýler bolǵan jahandyq apattardyń aldyn alyndy. Eldiń Energetıka mınıstrligi jylýmen qamtýdy baqylaýda. jaǵdaıdy anyqtap, energetıkalyq nysandardy paıdalaný máseleleri boıynsha jergilikti atqarýshy organdarmen tyǵyz baılanysta», - dep habarlady vedomstvodan.
Sondaı-aq, búgin, 11 jeltoqsan Energetıka vıe-mınıstri Jandos Nurmaǵanbetov otstavkaǵa ketti. Bul týraly Energetıka mınıstrliginiń baspasóz qyzmeti rastady.
Ol elektr energetıkasy, jylý elektr stanııalary, jańartylatyn energııa kózderi salalaryn qadaǵalaǵan.
Nurmaǵanbetov bir aıǵa jýyq demalysta bolǵan. Onyń uzaq demalysqa shyqqany týraly aqparatty Energetıka mınıstrliginiń ózi rastady.
Nurmaǵanbetovtiń otstavkaǵa ketý yqtımaldyǵyn habarlaǵan derekkózdiń aıtýynsha, oǵan Energetıka mınıstri Almasadam Sátqalıevpen arasyndaǵy janjal sebep bolýy múmkin.
Degenmen, muny joqqa shyǵaryp mınıstrlik túsinikteme berdi.
"Energetıka vıe-mınıstri Jandos Nurmaǵambetov 15 qarasha men 15 jeltoqsan aralyǵynda eńbek demalysyna shyǵyp, basqa jumysqa aýysýyna baılanysty keıin jumystan bosatyldy.
Vıe-mınıstr men vedomstvo basshylyǵynyń arasyndaǵy kıkiljiń týraly jelide taralyp jatqan aqparat shyndyqqa sáıkes kelmeıdi", – dedi energetıka mınıstrligi.
Aıta keteıik, Nurmaǵanbetovti vıe-mınıstr qyzmetine Sátqalıevtiń ózi usynǵan eken.
PREZIDENT TAPSYRMA BERDI
Sondaı-aq, búgin memleket basshysy Qasym-Jomart Toqaev óńirlerdiń ákimderimen jylý berý máselesin talqylady.
Prezıdentke Atyraý, Qaraǵandy, Pavlodar, Mańǵystaý oblystarynyń ákimderi aımaq turǵyndaryn jylýmen jáne sýmen qamtamasyz etý máselesi jóninde esep berdi.
Toqaev apat bolǵan ýchaskelerdegi jaǵdaıdy shuǵyl rettep, halyqty jylýmen jáne sýmen qamtý isin tez arada qalpyna keltirýdi jáne barlyq eldi mekendegi kommýnaldyq jelilerdiń úzdiksiz jumysyn jolǵa qoıýdy talap etti.
Úkimetke jylytý maýsymyna daıyndyq kezinde olqylyqtar jiberilgeni týraly aıtyldy.
Úkimet basshylyǵy elimizdegi tozyǵy jetken energetıkalyq ınfraqurylymdaǵy buzylý jaǵdaılaryn qospaǵanda, jalpy ahýal baqylaýda ekenin málimdedi. Apattyq jaǵdaılarǵa jol bermeý sharalary qabyldanyp jatyr.
Memleket basshysy berilgen tapsyrmalardy oryndaý úshin Úkimetke jáne oblystardyń ákimderine jeke-jeke jaýapkershilik júktedi.
“Adyrna” ulttyq portaly
