سوڭعى ءۇش كۇندە قازاقستاننىڭ بىرنەشە قالاسى قاقاعان ايازدا جىلۋسىز قالدى. ستەپنوگورسك، ەكىباستۇز، اقتاۋ، بالقاش، سونداي-اق تەمىرتاۋ مەن ريددەردە جىلۋ جۇيەلەرىندە اپاتتار بولدى. اتىراۋ دا سۋسىز قالدى.
قاتەلىكتەر نەگە قايتالانا بەرەدى؟
8 جەلتوقساندا ستەپنوگورسك قالاسىندا -33°C ايازدا كوپقاباتتى ۇيلەر قۇبىردىڭ ۇزىلۋىنە بايلانىستى جىلۋسىز قالدى.
ال 9 جەلتوقسان ساعات 22:55-تە بالقاش قالاسىندا اباي مەن ابۋعاليەۆ كوشەلەرىنىڭ قيىلىسىنداعى قۇبىردىڭ جارىلۋى سالدارىنان 45 كوپقاباتتى تۇرعىن ۇيدە جىلۋ ماسەلەسى تۋىندادى.
قالا اكىمدىگىنىڭ مالىمەتىنشە، اپاتقا جىلۋ جەلىلەرىنىڭ توزۋى سەبەپ بولعان.
اپاتتىڭ سالدارىن جويۋ ءۇشىن بارلىق مەملەكەتتىك كوممۋنالدىق كاسىپورىنداردىڭ قسك جانە توتەنشە جاعدايلاردىڭ قاتىسۋىمەن جەدەل شتاب قۇرىلدى. جاعداي قالا اكىمىنىڭ جەكە باقىلاۋىندا بولدى.
جوندەۋ جۇمىستارى شامامەن ساعات 6:00-دە اياقتالعان، قازىر ۇيلەرگە جىلۋ بەرۋ كەزەڭ-كەزەڭىمەن قالپىنا كەلتىرىلۋدە.
10 جەلتوقسانعا قاراعان ءتۇنى ەكىباستۇز جىلۋ ەلەكتر ورتالىعىندا (جەس) اپات ورىن الىپ، سونىڭ سالدارىنان ىستىق سۋ قازاندىقتارىنىڭ ەكىنشى تسەحىنىڭ جابدىعى مەن قاپشى سورعى ستانتسياسىنىڭ ءۇي-جايى زاقىمداندى. قالادا قازىر 8 قازاندىق جۇمىس ىستەپ تۇر، جىلۋ بەرۋدە ىركىلىس بولماعان.
بىلتىر قاراشادا ەكىباستۇز جىلۋ ەلەكتر ورتالىعىندا ءىرى اپات بولىپ، 30 گرادۋس ايازدا تۇرعىندار جىلۋسىز قالعان ەدى. قالادا توتەنشە جاعداي جاريالانىپ، ۇكىمەت ءبىر جىل بويى ستانتسيالاردى جوندەۋگە اقشا ءبولىپ، ولاردىڭ جۇمىسىن قاتاڭ باقىلايتىنىن ايتقان بولاتىن. دەگەنمەن، “باياعى جارتاس – سول جارتاس”.
ودان بولەك، اقتاۋدا دا ماگيسترالدىق جىلۋ قۇبىرىندا توتەنشە جاعداي ورىن الىپ، سونىڭ سالدارىنان 10 شاعىن اۋداندا ۇيلەرگە جىلۋ بەرۋ ۋاقىتشا شەكتەلگەنى بەلگىلى بولدى. وقيعا ورنىندا «كاسپي جىلۋ، سۋ ارناسى» (قجسا) كوممۋنالدىق كاسىپورنىنىڭ ماماندارى جۇمىس ىستەۋدە.
ايماق باسشىسى نۇرلان نوعاەۆ اپات ورنىندا بولىپ، كوممۋنالدىق سالا قىزمەتكەرلەرىمەن كەڭەس وتكىزىپ، بىرقاتار تاپسىرمالار بەرگەنى ايتىلدى.
كوممۋنالدىق اپات سالدارىنان جاڭاوزەن پەرزەنتحاناسىنىڭ پاتسيەنتتەرى دە توڭعاندارىن ايتىپ شاعىمداندى.
ال قالا اكىمى ۇلىقبەك تناليەۆ ۋاقىتشا قولايسىزدىقتار ءۇشىن تۇرعىنداردان كەشىرىم سۇراپ، 10 جەلتوقسان كۇنى كەشكە دەيىن جوندەۋ جۇمىستارىن جۇرگىزۋگە ۋادە بەردى.
اتىراۋ سۋسىز قالدى
اتىراۋدا قالانى سۋمەن قامتاماسىز ەتەتىن جايىق وزەنىندەگى كوكتايعاق سالدارىنان سۋ الاتىن قۇرىلىستار توقتاپ قالدى. «اتىراۋ وبلىسى سۋ ارناسى» مكك-نىڭ ايتۋىنشا، بۇعان ايازدىڭ باستالۋى مەن سۋدىڭ جىلدامدىعىنىڭ تومەندىگى سەبەپ بولعان.
قالا اكىمدىگىنىڭ حابارلاۋىنشا، كەيبىر اۋدانداردا سۋ بەرۋ قالپىنا كەلتىرىلدى. الايدا، «اتىراۋ-ماقات» ماگيسترالدىق قۇبىرى باعىتىندا، ونىڭ ىشىندە «بەرەكە»، «كوكتەم»، «جۇلدىز-3»، «تەڭدىك»، «اقساي-1» جانە «اقساي-2» شاعىن اۋداندارىندا تەحنيكالىق سەبەپتەرگە بايلانىستى سۋ جىبەرىلمەدى.
«مۇز كەپتەلىستەرىن جويۋ جانە سورعى ستانسالارىن تازارتۋ ماقساتىندا جۇمىستارعا وبلىستىڭ توتەنشە جاعدايلار قىزمەتىنىڭ كۇشتەرى جۇمىلدىرىلدى. الايدا، توتەنشە جاعداي ەرەجەسىنە سايكەس، تۇنگى ۋاقىتتا تازالاۋ جانە باسقا دا سۋ تيەۋ جۇمىستارى جۇرگىزىلمەيدى. وسىعان بايلانىستى توتەنشە جاعدايلار قىزمەتىنىڭ قىزمەتكەرلەرى تاڭعى 8:00-دە تازالاۋ جۇمىستارىن باستادى»، - دەلىنگەن اكىمدىكتىڭ ءباسپاسوز حابارلاماسىندا.
سونداي-اق، كەيىننەن وزەندى تازارتۋ ءۇشىن اتىراۋ مۇناي وڭدەۋ زاۋىتىنان ء(موز) قوسىمشا بريگادانىڭ قۇتقارۋشىلارعا قوسىلعانى بەلگىلى بولدى.
اكىمدىكتىڭ ءباسپاسوز قىزمەتىندە اتاپ وتكەندەي، سۋ قۇبىرىنداعى اقاۋلاردى جويۋ جۇمىستارى جالعاسۋدا. وقيعا ورنىندا وبلىس اكىمىنىڭ ورىنباسارى قايرات نۇرتاەۆ پەن قالا اكىمى شاكىر كەيكين بولدى.
مينيسترلىك نە دەپ اقتالماق؟
بۇگىن ەنەرگەتيكا مينيسترلىگى ەكىباستۇز، بالقاش جانە اقتاۋ قالالارىن جىلۋمەن قامتۋ جاعدايىنا قاتىستى پىكىر ءبىلدىردى.
ۆەدومستۆو اتاپ وتكەندەي، اتالعان قالالاردا ورىن العان وقيعالار تەحنولوگيالىق بۇزۋشىلىقتار رەتىندە سيپاتتالادى. تۇتىنۋشىلارعا جىلۋ بەرۋدى توقتاتۋعا جول بەرىلمەيدى.
«اعىمداعى جىلى ەلىمىزدىڭ بارلىق ەنەرگيا كوزدەرىن تۇراقتى جىلۋمەن قامتاماسىز ەتۋ ماقساتىندا بۇرىن-سوڭدى بولماعان اۋقىمدى جۇمىستار اتقارىلدى. سونىڭ ارقاسىندا جىلۋمەن جابدىقتاۋدا جاپپاي شەكتەۋلەر بولعان جاھاندىق اپاتتاردىڭ الدىن الىندى. ەلدىڭ ەنەرگەتيكا مينيسترلىگى جىلۋمەن قامتۋدى باقىلاۋدا. جاعدايدى انىقتاپ، ەنەرگەتيكالىق نىسانداردى پايدالانۋ ماسەلەلەرى بويىنشا جەرگىلىكتى اتقارۋشى ورگاندارمەن تىعىز بايلانىستا»، - دەپ حابارلادى ۆەدومستۆودان.
سونداي-اق، بۇگىن، 11 جەلتوقسان ەنەرگەتيكا ۆيتسە-ءمينيسترى جاندوس نۇرماعانبەتوۆ وتستاۆكاعا كەتتى. بۇل تۋرالى ەنەرگەتيكا مينيسترلىگىنىڭ ءباسپاسوز قىزمەتى راستادى.
ول ەلەكتر ەنەرگەتيكاسى، جىلۋ ەلەكتر ستانتسيالارى، جاڭارتىلاتىن ەنەرگيا كوزدەرى سالالارىن قاداعالاعان.
نۇرماعانبەتوۆ ءبىر ايعا جۋىق دەمالىستا بولعان. ونىڭ ۇزاق دەمالىسقا شىققانى تۋرالى اقپاراتتى ەنەرگەتيكا مينيسترلىگىنىڭ ءوزى راستادى.
نۇرماعانبەتوۆتىڭ وتستاۆكاعا كەتۋ ىقتيمالدىعىن حابارلاعان دەرەككوزدىڭ ايتۋىنشا، وعان ەنەرگەتيكا ءمينيسترى الماسادام ساتقاليەۆپەن اراسىنداعى جانجال سەبەپ بولۋى مۇمكىن.
دەگەنمەن، مۇنى جوققا شىعارىپ مينيسترلىك تۇسىنىكتەمە بەردى.
"ەنەرگەتيكا ۆيتسە-ءمينيسترى جاندوس نۇرماعامبەتوۆ 15 قاراشا مەن 15 جەلتوقسان ارالىعىندا ەڭبەك دەمالىسىنا شىعىپ، باسقا جۇمىسقا اۋىسۋىنا بايلانىستى كەيىن جۇمىستان بوساتىلدى.
ۆيتسە-مينيستر مەن ۆەدومستۆو باسشىلىعىنىڭ اراسىنداعى كيكىلجىڭ تۋرالى جەلىدە تارالىپ جاتقان اقپارات شىندىققا سايكەس كەلمەيدى", – دەدى ەنەرگەتيكا مينيسترلىگى.
ايتا كەتەيىك، نۇرماعانبەتوۆتى ۆيتسە-مينيستر قىزمەتىنە ساتقاليەۆتىڭ ءوزى ۇسىنعان ەكەن.
پرەزيدەنت تاپسىرما بەردى
سونداي-اق، بۇگىن مەملەكەت باسشىسى قاسىم-جومارت توقاەۆ وڭىرلەردىڭ اكىمدەرىمەن جىلۋ بەرۋ ماسەلەسىن تالقىلادى.
پرەزيدەنتكە اتىراۋ، قاراعاندى، پاۆلودار، ماڭعىستاۋ وبلىستارىنىڭ اكىمدەرى ايماق تۇرعىندارىن جىلۋمەن جانە سۋمەن قامتاماسىز ەتۋ ماسەلەسى جونىندە ەسەپ بەردى.
توقاەۆ اپات بولعان ۋچاسكەلەردەگى جاعدايدى شۇعىل رەتتەپ، حالىقتى جىلۋمەن جانە سۋمەن قامتۋ ءىسىن تەز ارادا قالپىنا كەلتىرۋدى جانە بارلىق ەلدى مەكەندەگى كوممۋنالدىق جەلىلەردىڭ ۇزدىكسىز جۇمىسىن جولعا قويۋدى تالاپ ەتتى.
ۇكىمەتكە جىلىتۋ ماۋسىمىنا دايىندىق كەزىندە ولقىلىقتار جىبەرىلگەنى تۋرالى ايتىلدى.
ۇكىمەت باسشىلىعى ەلىمىزدەگى توزىعى جەتكەن ەنەرگەتيكالىق ينفراقۇرىلىمداعى بۇزىلۋ جاعدايلارىن قوسپاعاندا، جالپى احۋال باقىلاۋدا ەكەنىن مالىمدەدى. اپاتتىق جاعدايلارعا جول بەرمەۋ شارالارى قابىلدانىپ جاتىر.
مەملەكەت باسشىسى بەرىلگەن تاپسىرمالاردى ورىنداۋ ءۇشىن ۇكىمەتكە جانە وبلىستاردىڭ اكىمدەرىنە جەكە-جەكە جاۋاپكەرشىلىك جۇكتەدى.
“ادىرنا” ۇلتتىق پورتالى
