Qazaqstan bilıgı italiialyq Eni men britandyq Shell basşylyq etetın serıktestıkpen Qaraşyǧanaq ken ornynda gaz öŋdeu zauytyn saludan bas tartty, dep habarlaidy "Adyrna" ūlttyq portaly.
Būl turaly QR Energetika ministrlıgınıŋ baspasöz qyzmetı mälımdedı.
«Qazaqstan kelıssözderdıŋ qorytyndysy boiynşa aksionerler qoiǧan şarttardy ekonomikalyq tūrǧydan qolaisyz dep tanydy. Būl şarttardyŋ ışınde Qaraşyǧanaqtaǧy gaz öŋdeu zauyty qūrylysynyŋ 100% şyǧynyn öteuden bölek, qosymşa 1 milliard dollar töleu talaby da boldy», – delıngen habarlamada.
Aksionerler mūndai talaptyŋ sebebın zauyt qūrylys şyǧyndaryn 3–4 jyl ışınde aqtap şyǧaru mümkın emes ekendıgımen tüsındırgen. Sebebı, önımdı bölısu turaly kelısımnıŋ merzımı 2033 jyly aiaqtalady.
Sondai-aq, investorlar tarapynan Qazaqstanmen kırıstı negızsız alyp tastau boiynşa jürıp jatqan arbitrajdyq daulardy tolyq toqtatu talaby da qoiylǧan.
«Osyǧan bailanysty Qaraşyǧanaq gaz öŋdeu zauyty jobasyna qatysty kelıssözder, önımdı bölu turaly Qaraşyǧanaq jobasy aiasynda bastalǧanymen, qazırgı uaqytta aiaqtaldy. Degenmen, Qaraşyǧanaq ken ornynyŋ gaz äleuetı älı de zerttelıp jatyr», – dep naqtylady Energetika ministrlıgı.
Būǧan deiın Bloomberg agenttıgı Qazaqstan bilıgınıŋ būl jobany «Samūryq-Qazyna» ūlttyq qorynyŋ enşıles kompaniiasy «QazMūnaiGazǧa» beru mümkındıgın qarastyryp jatqanyn habarlaǧan bolatyn.
Qaraşyǧanaq mūnai-gaz kondensat ken orny Batys Qazaqstanda, 280 şarşy şaqyrymnan astam aumaqta ornalasqan jäne älemdegı eŋ ırı ken oryndarynyŋ bırı sanalady. Ol 1997 jyly 18 qaraşada Qazaqstanmen jasalǧan önımdı bölısu turaly kelısım aiasynda halyqaralyq konsorsium tarapynan igerılıp keledı.
Qaraşyǧanaq jobasynyŋ operatorlary - Royal Dutch Shell men Eni kompaniialary, ärqaisysynyŋ ülesı – 29,25%. Sonymen qatar, Chevron (18%), LUKOIL (13,5%) jäne QazMūnaiGaz (10%) jobada üleske ie.
Qazır ken ornynda öndırılgen gazdyŋ köp bölıgı qaitadan jer qoinauyna aidalady, al qalǧany Reseidıŋ Orynbor gaz öŋdeu zauytyna jıberıledı, sebebı Qaraşyǧanaqta öz gaz öŋdeu infraqūrylymy joq. Būl zauytty salu turaly mäsele 2000-jyldardan berı köterılıp keledı.
