Almatylyq jastar arasynda óz aýdıtorııasyn qalyptastyrǵan birlestiktiń negizin quraýshy Araılym Ótegenqyzymen «Adyrna» tilshisi tildesti.
Búginde jastar arasynda teatrǵa, ádebı keshterge baryp, rýhanı azyq alý ádetke aınalǵan. Osy tusta ádebıet álemine ǵashyq jandar tyń ıdeıalardy júzege asyryp, túrli ádebı keshterdi de uıymdastyryp keledi. Ádebıettegi jańa kózqaras arqyly ǵasyrǵa jýyq tarıhy bar týyndylarǵa jańa dem berip, kórermenniń kózaıymyna aınalǵandar da qanshama. Sonyń biri – «Qus joly» birlestigi.
– «Qus joly» birlestigi nemen aınalysady?
– «Qus joly» — óleń men ónerge ǵashyq shyǵarmashyl jastardyń ortasy. 2021 jyly dosym Qahar Baqytjan ekeýmiz áleýmettik jelilerde janymyzda júrgen aqyn dostarymyzdyń poezııasyn, jas qalamgerlerdiń shyǵarmashylyǵyn kópshilikke tanystyrý maqsatynda áleýmettik jelilerde birlestik jumysyn bastadyq. Sodan keıin qatarymyz kóbeıip, shyǵarmashylyq keshter uıymdastyra bastadyq.
– «Qus jolynda» bolatyn keshterdiń ereksheligi nede?
– Bizdiń ádebı keshterdiń ereksheligi — jáı ǵana óleń oqyp, án aıtý emes, kórermenge teatrlanǵan mıýzıkldi qoıylym retinde usynyp, dıalogter arasynda án men óleńderdi tanystyrý. Buıyrsa, besinshi keshimizdiń senarııin daıyndap jatyrmyz.
– Ár keshti uıymdastyrýda ónersúıer tulǵalardan qandaı da bir qoldaý bolady ma?
– Keshterdi óz kúshimizben uıymdastyramyz, tek sońǵy keshimizde qoldaý bildirip, demeýshilik tanytqan jandar boldy. Onyń ishinde Ǵanı Maılybaevtan kómek suradyq, bizge dybys jáne jaryq jaǵynan kómek kórsetti. Aldaǵy ýaqytta qaıyrymdylyq sharasyn ótkizip, óz oqyrmandarymyz, ádebıetti bizdeı súıetin jandarmen jınalyp, kishigirim óleń oqý keshterin ótkizip, ózge ádebı birlestiktermen kollab jasaý josparymyzda bar.
– «Qus jolynyń» bir keshine kirý quny qansha? Bılet baǵasy jastarǵa qoljetimdi me?
- Bıletterdi biz ózimiz satamyz. Ol bıletten jınalǵan qarajatty rekvızıtter, kesh ótetin zaldyń aqysy, kıimder, apparatýra degen syndy zattarǵa jumsaımyz. «Kezdesý men qoshtasý» Ozgeepic óner keńistigin, «Sen kelersiń», «Baqyt qushaǵynda» keshterin túrli ǵımarattardyń zaldaryn jalǵa alyp ótkizdik. Alǵashqy toıymyz tolyqtaı tegin ótti. Al odan keıingi keshterge bir bılettiń quny 1000-2000 teńge aralyǵynda boldy.
– Sahnada óner kórsetetin ártister kimder? Óleń men qara sózge qushtar jandy qaıdan tabasyzdar?
– Bizdegi taǵy bir erekshelik — keshterimizdegi «ártisterdiń» eshqaısysy da kásibı akter-ánshiler emes, kádimgi stýdentter, kóbi sahnaǵa alǵash shyǵatyndar. Iaǵnı ár keshimizde biz ártúrli adamdardy shyǵarmashylyqqa shabyttandyrǵymyz keledi, sol sebepti kórinisterimizde turaqty qatyp qalǵan quram joq.
– Demek, kóriniske qatysýǵa nıet bildirip, ónerli jastardy qoldaýǵa daıynsyzdar ma? Birlestik qandaı baǵytty ustanady?
– Iá, degenmen, barlyǵyn birdeı emes, ıkemi bar, jaýapkershiligi bar, talpynysy bar, ózimiz sekildi osy dúnıeni súıetin bolsa degen nıetimiz bar. Sondaı-aq kórermenge usynatyn dúnıe bolǵandyqtan, biz usynǵan róldi alyp shyǵa alatyn jandar janymyzda bolsa deımiz. Biz eshkimge aqy tólemeımiz, ózimiz de kommerııalyq maqsatta emes, tek óner men óleńge degen súıispenshilik jolynda jumys isteımiz. Sondyqtan bizdiń janymyzda da rasynda ádebıetti tanytý maqsatyn kózdegen, kózqarastary bizdikimen ortaq adamdar júr.
– Jalǵa alynǵan zaldy toltyrý qıynǵa soqpaıdy ma? Kórermendi qalaı jınaısyzdar?
– Bizdegi oqyrmandar sany az bolǵanmen, keshterimizde zal toly bolady. Biz de adam jınaýda qobaljımyz, qorqamyz, biraq soǵan qaramastan, josparlaǵanymyzdaı qyzyǵýshylar sany únemijınalady, zalymyz toly bolady. «Kezdesý men qoshtasý» — 50, «Sen kelersiń» — 120, «Baqyt qushaǵynda» — 150 adamǵa daıyndadyq. Sońǵy keshimizde úlken zal alyp, 300 kórermen jınadyq. Ár keshten soń da kópten jyly lebizderin jazyp ketedi.
– Birlestikke shyǵarmashylyq tabys tileımiz!
Cymbat Naýhan
«Adyrna» ulttyq portaly
