الماتىلىق جاستار اراسىندا ءوز اۋديتورياسىن قالىپتاستىرعان بىرلەستىكتىڭ نەگىزىن قۇراۋشى ارايلىم وتەگەنقىزىمەن «ادىرنا» ءتىلشىسى تىلدەستى.
بۇگىندە جاستار اراسىندا تەاترعا، ادەبي كەشتەرگە بارىپ، رۋحاني ازىق الۋ ادەتكە اينالعان. وسى تۇستا ادەبيەت الەمىنە عاشىق جاندار تىڭ يدەيالاردى جۇزەگە اسىرىپ، ءتۇرلى ادەبي كەشتەردى دە ۇيىمداستىرىپ كەلەدى. ادەبيەتتەگى جاڭا كوزقاراس ارقىلى عاسىرعا جۋىق تاريحى بار تۋىندىلارعا جاڭا دەم بەرىپ، كورەرمەننىڭ كوزايىمىنا اينالعاندار دا قانشاما. سونىڭ ءبىرى – «قۇس جولى» بىرلەستىگى.
– «قۇس جولى» بىرلەستىگى نەمەن اينالىسادى؟
– «قۇس جولى» — ولەڭ مەن ونەرگە عاشىق شىعارماشىل جاستاردىڭ ورتاسى. 2021 جىلى دوسىم قاحار باقىتجان ەكەۋمىز الەۋمەتتىك جەلىلەردە جانىمىزدا جۇرگەن اقىن دوستارىمىزدىڭ پوەزياسىن، جاس قالامگەرلەردىڭ شىعارماشىلىعىن كوپشىلىككە تانىستىرۋ ماقساتىندا الەۋمەتتىك جەلىلەردە بىرلەستىك جۇمىسىن باستادىق. سودان كەيىن قاتارىمىز كوبەيىپ، شىعارماشىلىق كەشتەر ۇيىمداستىرا باستادىق.
– «قۇس جولىندا» بولاتىن كەشتەردىڭ ەرەكشەلىگى نەدە؟
– ءبىزدىڭ ادەبي كەشتەردىڭ ەرەكشەلىگى — ءجاي عانا ولەڭ وقىپ، ءان ايتۋ ەمەس، كورەرمەنگە تەاترلانعان ميۋزيكلدى قويىلىم رەتىندە ۇسىنىپ، ديالوگتەر اراسىندا ءان مەن ولەڭدەردى تانىستىرۋ. بۇيىرسا، بەسىنشى كەشىمىزدىڭ ستسەناريىن دايىنداپ جاتىرمىز.
– ءار كەشتى ۇيىمداستىرۋدا ونەرسۇيەر تۇلعالاردان قانداي دا ءبىر قولداۋ بولادى ما؟
– كەشتەردى ءوز كۇشىمىزبەن ۇيىمداستىرامىز، تەك سوڭعى كەشىمىزدە قولداۋ ءبىلدىرىپ، دەمەۋشىلىك تانىتقان جاندار بولدى. ونىڭ ىشىندە عاني مايلىباەۆتان كومەك سۇرادىق، بىزگە دىبىس جانە جارىق جاعىنان كومەك كورسەتتى. الداعى ۋاقىتتا قايىرىمدىلىق شاراسىن وتكىزىپ، ءوز وقىرماندارىمىز، ادەبيەتتى بىزدەي سۇيەتىن جاندارمەن جينالىپ، كىشىگىرىم ولەڭ وقۋ كەشتەرىن وتكىزىپ، وزگە ادەبي بىرلەستىكتەرمەن كوللاب جاساۋ جوسپارىمىزدا بار.
– «قۇس جولىنىڭ» ءبىر كەشىنە كىرۋ قۇنى قانشا؟ بيلەت باعاسى جاستارعا قولجەتىمدى مە؟
- بيلەتتەردى ءبىز ءوزىمىز ساتامىز. ول بيلەتتەن جينالعان قاراجاتتى رەكۆيزيتتەر، كەش وتەتىن زالدىڭ اقىسى، كيىمدەر، اپپاراتۋرا دەگەن سىندى زاتتارعا جۇمسايمىز. «كەزدەسۋ مەن قوشتاسۋ» Ozgeepic ونەر كەڭىستىگىن، «سەن كەلەرسىڭ»، «باقىت قۇشاعىندا» كەشتەرىن ءتۇرلى عيماراتتاردىڭ زالدارىن جالعا الىپ وتكىزدىك. العاشقى تويىمىز تولىقتاي تەگىن ءوتتى. ال ودان كەيىنگى كەشتەرگە ءبىر بيلەتتىڭ قۇنى 1000-2000 تەڭگە ارالىعىندا بولدى.
– ساحنادا ونەر كورسەتەتىن ارتىستەر كىمدەر؟ ولەڭ مەن قارا سوزگە قۇشتار جاندى قايدان تاباسىزدار؟
– بىزدەگى تاعى ءبىر ەرەكشەلىك — كەشتەرىمىزدەگى «ارتىستەردىڭ» ەشقايسىسى دا كاسىبي اكتەر-انشىلەر ەمەس، كادىمگى ستۋدەنتتەر، كوبى ساحناعا العاش شىعاتىندار. ياعني ءار كەشىمىزدە ءبىز ءارتۇرلى ادامداردى شىعارماشىلىققا شابىتتاندىرعىمىز كەلەدى، سول سەبەپتى كورىنىستەرىمىزدە تۇراقتى قاتىپ قالعان قۇرام جوق.
– دەمەك، كورىنىسكە قاتىسۋعا نيەت ءبىلدىرىپ، ونەرلى جاستاردى قولداۋعا دايىنسىزدار ما؟ بىرلەستىك قانداي باعىتتى ۇستانادى؟
– ءيا، دەگەنمەن، بارلىعىن بىردەي ەمەس، يكەمى بار، جاۋاپكەرشىلىگى بار، تالپىنىسى بار، ءوزىمىز سەكىلدى وسى دۇنيەنى سۇيەتىن بولسا دەگەن نيەتىمىز بار. سونداي-اق كورەرمەنگە ۇسىناتىن دۇنيە بولعاندىقتان، ءبىز ۇسىنعان ءرولدى الىپ شىعا الاتىن جاندار جانىمىزدا بولسا دەيمىز. ءبىز ەشكىمگە اقى تولەمەيمىز، ءوزىمىز دە كوممەرتسيالىق ماقساتتا ەمەس، تەك ونەر مەن ولەڭگە دەگەن سۇيىسپەنشىلىك جولىندا جۇمىس ىستەيمىز. سوندىقتان ءبىزدىڭ جانىمىزدا دا راسىندا ادەبيەتتى تانىتۋ ماقساتىن كوزدەگەن، كوزقاراستارى بىزدىكىمەن ورتاق ادامدار ءجۇر.
– جالعا الىنعان زالدى تولتىرۋ قيىنعا سوقپايدى ما؟ كورەرمەندى قالاي جينايسىزدار؟
– بىزدەگى وقىرماندار سانى از بولعانمەن، كەشتەرىمىزدە زال تولى بولادى. ءبىز دە ادام جيناۋدا قوبالجيمىز، قورقامىز، بىراق سوعان قاراماستان، جوسپارلاعانىمىزداي قىزىعۋشىلار سانى ۇنەمىجينالادى، زالىمىز تولى بولادى. «كەزدەسۋ مەن قوشتاسۋ» — 50, «سەن كەلەرسىڭ» — 120, «باقىت قۇشاعىندا» — 150 ادامعا دايىندادىق. سوڭعى كەشىمىزدە ۇلكەن زال الىپ، 300 كورەرمەن جينادىق. ءار كەشتەن سوڭ دا كوپتەن جىلى لەبىزدەرىن جازىپ كەتەدى.
– بىرلەستىككە شىعارماشىلىق تابىس تىلەيمىز!
Cىمبات ناۋحان
«ادىرنا» ۇلتتىق پورتالى
