«ArselorMittal Temırtau» kompaniiasynyŋ barlyq şottary būǧattalǧan. Būl turaly kompaniianyŋ baspasöz qyzmetı mälımdedı, dep habarlaidy “Adyrna” ūlttyq portaly.
Al käsıporyndarynda jūmys ısteitın kenşıler kompaniia şottarynyŋ būǧattaluyna bailanysty "zeinetaqy audarymdarynsyz, sondai-aq medisinalyq kömek salymynsyz qalamyz ba" dep qauıptenedı.
Öŋırdegı Ekaraganda.kz basylymy 4 jeltoqsanda "Kostenko şahtasynda bolǧan tragediiadan aman qalǧan kenşıler medisinalyq kömek pen tölemdersız qalamyz ba" dep qauıptenetının jazdy. Jaqynda auruhanadan emdelıp şyqqan 28 kenşı qazan aiy üşın özderınıŋ atyna mındettı medisinalyq saqtandyru qoryna jarna audarylmaǧanyn bılgen.
"Söitse būl mäsele Kostenko atyndaǧy şahtada apattan keiın tırı qalǧan kenşılerge ǧana qatysty bolmai şyqty. "ArselorMittal Temırtau" kompaniiasynyŋ barlyq qyzmetkerıne qazan aiyna äleumettık tölemder audarylmapty. Bügın kompaniia şottarynyŋ būǧattalǧany belgılı boldy", - dep jazady Ekaraganda.kz.
Jūmys beruşı MÄMSQ -ǧa aqşa audarudy toqtatqandyqtan, alǧan jaraqattarynan aiyqqan kenşıler tegın medisinalyq kömeksız qaluy mümkın. Emhanalar jarna tölemegendıkten olardy emdeuden bas tartuy mümkın. Sondai-aq, Qaraǧandy oblysynyŋ kenşılerı BJZQ-ǧa jarna audarylmaǧandyǧyna şaǧymdanuda. Tölemder qaraşa aiynyŋ soŋynda tüsuı kerek bolatyn, bıraq jeltoqsannyŋ basy bolsa da jūmys beruşı eşqandai äleumettık audarymdar jasamaǧany belgılı boldy.
Mındettı medisinalyq saqtandyru qorynyŋ Qaraǧandydaǧy filialy mekeme ökılderı oblys ortalyǧynda kömır departamentımen, käsıpodaqpen, zaŋgerlermen jäne AMT esepşılerımen kezdesu ötkızgegenın habarlady. Qordyŋ mälımetınşe, bır aiǧa tölem jasalmaǧan.
"ArselorMittal Temırtau" äleumettık tölemderdıŋ der uaqytynda audarylmauyna kompaniianyŋ barlyq şottarynyŋ būǧattaluy sebep ekenın aitty.
"BSR-men aradaǧy zaŋdy dauǧa bailanysty banktık şottardyŋ būǧattalǧanyn habarlaimyz. Bızdıŋ zaŋ jäne qarjy qyzmetterı jaǧdaidy mümkındıgınşe tezırek şeşu jäne şottardy būǧattan bosatu üşın qūzyrettı organdarmen jūmys ıstep jatyr. Şotty būǧattan bosatuda MÄSMQ jäne zeinetaqy jarnalaryn töleu bırınşı kezektegı mındet bolyp tabylady. Qazırgı qalyptasqan jaǧdai üşın keşırım sūraimyz", delıngen "ArselorMittal Temırtau" mälımdemesınde.
Kömır öndıruşıler käsıpodaǧy şahta qyzmetkerlerı arasynda tüsındıru jūmystaryn jürgızdı. Kompaniia şottarynyŋ būǧattan bosatu jäne qajettı tölemderdı jüzege asyru boiynşa tiıstı kelıssözder jürgızılude.
Aita ketsek, būǧan deiın İndustriia jäne sauda ministrlıgı QR Ükımetı men "ArselorMittal Temırtau" AQ arasyndaǧy mämıle soŋǧy satyǧa jaqyndap kele jatqanyn aitqan bolatyn. Kompaniianyŋ aktivterı Kostenko atyndaǧy şahtadaǧy qazan aiynda bolǧan qaiǧyly oqiǧadan keiın basqa investorǧa berıledı.
