Aqmola oblysynyŋ Astrahan audanynyŋ Astrahan auyldyq okrugı äkımdıgı Astrahanka auylynyŋ ortalyq alaŋyna qardan jasalǧan Aiaz ata men Aqşaqardyŋ müsınderın qoiu üşın biudjetten 1 666 964 teŋge qarjy böldı, - dep habarlaidy Adyrna ūlttyq portaly satypalu.gov.kz saityna sılteme jasap.
Astrahan auyly Aqmola oblysyndaǧy Astrahan audanynyŋ ortalyǧy sanalady. Halqynyŋ sany 6 myŋ adamnan säl asady. Auylda 2 jalpy bılım beretın jäne muzyka mektebı, 5 balabaqşa, käsıptık-tehnikalyq uchilişe, mädeni-sport keşenı, mädeniet üiı, kinoteatr, 7 kıtaphana, 3 emdeu-sauyqtyru mekemesı, tarihi-ölketanu mūrajaiy, qonaq üiı, t.b. bar.
Tender «Aqmola oblysy Astrahan audany Astrahan auylynyŋ ortalyq alaŋynda jaŋa jyldyq qalaşyǧyn jailastyru» degen ataumen 27 qaraşa künı jariialanǧan. Memlekettık satyp aludyŋ jeŋımpazy 4-jeltoqsanda anyqtalady.
Tehnikalyq sipattamada «Aqmola oblysy Astrahan audany Astrahan auyldyq okrugınıŋ Astrahanka auylynyŋ ortalyq alaŋynda Jaŋa jyldyq qalaşyqty jailastyru jönındegı jūmystar» degen taqyryppen bölıngen qarjyǧa qar figuralaryn jasau qajettılıgı körsetılgen.
Qardan jasalǧan «Aiaz Ata» (figuranyŋ biıktıgı kemınde 1,75 m), "Aqşaqar” (figuranyŋ biıktıgı kemınde 1,65 m), astyna qoiylatyn tūǧyrdyŋ ölşemı Aiaz atanıkı 0,8 m h 0,8 m, Aqşaqardıkı 0,1 m kem bolmauy kerek.
Sonymen qatar, tapsyrys oryndauşy Aqşaqar men Aiaz atanyŋ ainalasynda ärtürlı januarlardyŋ qar figuralaryn (6 dana) daiyndauǧa mındettı.
Audan ortalyǧy sanalatyn auyldyq äkımdık qardan jasalatyn bar bolǧany 8 müsınge 1 666 964 teŋge qarjy böluı qanşalyqty aqylǧa siymdy? Būl biudjet qarjysyn oŋdy-soldy şaşu emes pe?
Astrahandyq şeneunıkterdıŋ alda kele jatqan täuelsızdık merekesın attap ötıp, jaŋa jylǧa daiyndala bastauynyŋ astarynda ne jatyr?
Būl sūraqty tiıstı mekemelerge joldadyq.
Qanat Bırlıkūly
"Adyrna" ūlttyq portaly
Ūqsas jaŋalyqtar
