اقمولا وبلىسىنىڭ استراحان اۋدانىنىڭ استراحان اۋىلدىق وكرۋگى اكىمدىگى استراحانكا اۋىلىنىڭ ورتالىق الاڭىنا قاردان جاسالعان اياز اتا مەن اقشاقاردىڭ مۇسىندەرىن قويۋ ءۇشىن بيۋدجەتتەن 1 666 964 تەڭگە قارجى ءبولدى، - دەپ حابارلايدى ادىرنا ۇلتتىق پورتالى satypalu.gov.kz سايتىنا سىلتەمە جاساپ.
استراحان اۋىلى اقمولا وبلىسىنداعى استراحان اۋدانىنىڭ ورتالىعى سانالادى. حالقىنىڭ سانى 6 مىڭ ادامنان ءسال اسادى. اۋىلدا 2 جالپى ءبىلىم بەرەتىن جانە مۋزىكا مەكتەبى، 5 بالاباقشا، كاسىپتىك-تەحنيكالىق ۋچيليششە، مادەني-سپورت كەشەنى، مادەنيەت ءۇيى، كينوتەاتر، 7 كىتاپحانا، 3 ەمدەۋ-ساۋىقتىرۋ مەكەمەسى، تاريحي-ولكەتانۋ مۇراجايى، قوناق ءۇيى، ت.ب. بار.
تەندەر «اقمولا وبلىسى استراحان اۋدانى استراحان اۋىلىنىڭ ورتالىق الاڭىندا جاڭا جىلدىق قالاشىعىن جايلاستىرۋ» دەگەن اتاۋمەن 27 قاراشا كۇنى جاريالانعان. مەملەكەتتىك ساتىپ الۋدىڭ جەڭىمپازى 4-جەلتوقساندا انىقتالادى.
تەحنيكالىق سيپاتتامادا «اقمولا وبلىسى استراحان اۋدانى استراحان اۋىلدىق وكرۋگىنىڭ استراحانكا اۋىلىنىڭ ورتالىق الاڭىندا جاڭا جىلدىق قالاشىقتى جايلاستىرۋ جونىندەگى جۇمىستار» دەگەن تاقىرىپپەن بولىنگەن قارجىعا قار فيگۋرالارىن جاساۋ قاجەتتىلىگى كورسەتىلگەن.
قاردان جاسالعان «اياز اتا» (فيگۋرانىڭ بيىكتىگى كەمىندە 1,75 م), "اقشاقار” (فيگۋرانىڭ بيىكتىگى كەمىندە 1,65 م), استىنا قويىلاتىن تۇعىردىڭ ولشەمى اياز اتانىكى 0,8 م ح 0,8 م، اقشاقاردىكى 0,1 م كەم بولماۋى كەرەك.
سونىمەن قاتار، تاپسىرىس ورىنداۋشى اقشاقار مەن اياز اتانىڭ اينالاسىندا ءارتۇرلى جانۋارلاردىڭ قار فيگۋرالارىن (6 دانا) دايىنداۋعا مىندەتتى.
اۋدان ورتالىعى سانالاتىن اۋىلدىق اكىمدىك قاردان جاسالاتىن بار بولعانى 8 مۇسىنگە 1 666 964 تەڭگە قارجى ءبولۋى قانشالىقتى اقىلعا سيىمدى؟ بۇل بيۋدجەت قارجىسىن وڭدى-سولدى شاشۋ ەمەس پە؟
استراحاندىق شەنەۋنىكتەردىڭ الدا كەلە جاتقان تاۋەلسىزدىك مەرەكەسىن اتتاپ ءوتىپ، جاڭا جىلعا دايىندالا باستاۋىنىڭ استارىندا نە جاتىر؟
بۇل سۇراقتى ءتيىستى مەكەمەلەرگە جولدادىق.
قانات بىرلىكۇلى
"ادىرنا" ۇلتتىق پورتالى
