Jetı jasar Milananyŋ ölımı. Oblys äkımdıgınıŋ basşylary sögıs aldy

Besqauǧa auylyndaǧy jetı jasar Milana Davydovamen bolǧan jan türşıgerlık oqiǧa eşkımdı bei-jai qaldyrmady. Mūndai jaŋalyqtardy estıgende jüregıŋ ezıledı. Miǧa syimaityn, adamǧa müldem jat qylyq. Būl qaiǧyly jaǧdaidyŋ aldyn aluǧa bolatyn edı. Beibıt uaqytta balalar sız ben bızdıŋ kınämızden, eresekterdıŋ kınäsınen qaza bolyp jatyr, — dedı Pavlodar oblysynyŋ äkımı Asaiyn Baihanov.

Sondai-aq, ol  ötken jyldyŋ aqpan aiynda «maugli-balalarmen» bolǧan oqiǧany eske salyp, odan eşkımnıŋ sabaq almaǧanyn atap öttı. Öŋır basşysy otbasyndaǧy keleŋsızdıkterdı alǧaşqylardyŋ bırı bolyp baiqaityn mūǧalımderdıŋ nazaryn audardy: mektepte 17 mūǧalım men 51 oquşy bar. Ekıbastūzdyŋ kämeletke tolmaǧandar ısterı jönındegı komissiia töraǧasynyŋ älsız jūmysy, uchaskelık polisiia qyzmetkerı jäne Besqauǧa auylynyŋ äkımı tarapynan olqylyqtar bar. Pavlodar oblysy bılım basqarmasynyŋ basşysy Samal Aitqazinanyŋ mälımetınşe, jyl basynan berı balalarǧa qatysty 250-ge juyq zaŋǧa qaişy keletın faktıler anyqtalǧan, onyŋ 66-sy Ekıbastūz qalasynda. Mamandar mūndai joǧary körsetkıştı qorǧanşylyq organdary mamandarynyŋ jäne kämeletke tolmaǧandar ısterı jönındegı inspektorlardyŋ jetkılıksızdıgımen bailanystyrady. Oblys äkımı oqu oryndaryndaǧy profilaktikalyq qyzmet jüiesıne taldau jürgızıp, tübegeilı qaita qaraudy, balalardy zorlyq-zombylyqtan qorǧau jönındegı keşendı jospardy pysyqtaudy jäne täuekel aimaǧyndaǧy ärbır otbasy üşın uchaskelık polisiia qyzmetkerlerı men äleumettık qyzmetterge bırlesken äleumettık patronaj belgıleudı tapsyrdy. Būl rette öŋır basşysy būl jūmysqa mektep pedagogtaryn tartuǧa şekteu qoiu kerektıgın atap öttı. Ärbır osyndai otbasyn aralap, balalardyŋ ömır süru jaǧdaiymen bılım, äleumettık qorǧau jäne polisiia qyzmetınıŋ mamandary tanysuǧa tiıs. Sondai-aq, jedel kömek beru jelısınıŋ nömırlerın 65-00-60, 8707-491-64-05, bala qūqyqtary jönındegı uäkıldıŋ «111» bıryŋǧai bailanys arnasyn barlyq jerge taratu qajet. Ekıbastūz äkımıne Davydovtar otbasyn baqylauǧa alu tapsyryldy. Jinalysta 17 qaraşa künı Şıdertı kentınde qaitys bolǧan segız ailyq balaǧa qatysty taǧy bır sūmdyq jaǧdai qaraldy. Oblys äkımı jaǧdaidy egjei-tegjeilı tüsınıp, tiıstı şaralar qabyldaudy tapsyrdy. Jmnalys qorytyndysy boiynşa öŋır basşysy lauazymdy tūlǧalarǧa jaza qoldanu turaly şeşım qabyldady. Äleumettık salanyŋ jūmysyna jetekşılık etetın oblys äkımınıŋ orynbasary — Aizada Qūrmanovaǧa, Ekıbastūz qalasynyŋ äkımı — Aian Beisekinge, oblystyq bılım jäne äleumettık qorǧau basqarmalarynyŋ basşylary — Samal Aitqazina men Almira Disiupovaǧa sögıs jariialandy. Sondai-aq, oblys äkımı kenşıler qalasynyŋ basşysyna Ekıbastūzdyŋ lauazymdy tūlǧalaryna tärtıptık şara qabyldaudy, onyŋ ışınde Qoiandy auyl okrugınıŋ äkımı Abai Hakimovtyŋ odan ärı jūmysy turaly mäselenı qaraudy tapsyrdy. Öŋır basşysy barlyq qoǧam, äsırese, uäkılettı memlekettık qyzmetşıler balalardyŋ ömırı men densaulyǧyn qorǧauy tiıs ekenın eske saldy.

— Ärbır osyndai jaǧdai — bızge öŋırdıŋ, qalanyŋ, auyldyŋ tynys-tırşılıgın qamtamasyz etudı senıp tapsyrǧan tūrǧyndarymyzǧa opasyzdyq jasaǧanmen teŋ ekendıgın körsetedı. Bız qandai qoǧamda ömır sürgımız keletını turaly sūraqqa jauap beruımız kerek. Tıptı, balanyŋ ölımıne äkelgen bır oqiǧa — būl ülken qaiǧyly jaǧdai, al, olardyŋ soŋǧy uaqytta jüielı türde qaitalanuy ülken tragediia. Balalar — qoǧamnyŋ qorǧalmaǧan bölşegı, olardyŋ densaulyǧyn, qauıpsızdıgın jäne üilesımdı damuyn qamtamasyz etu — bızdıŋ basty mındetımız. Mūny eske alatyn kez keldı, — dedı Asaiyn Baihanov.

Eske salaiyq, Milana 17 qaraşa künı Ekıbastūzdan 50 km jerdegı Besqauǧa auylynda joǧalyp ketken. Sol künı keşkısın saǧat 9:00 şamasynda qyzdyŋ anasy polisiiaǧa şaǧym tüsırgen soŋ,  qyzdy ekı täulık boiy 400 adam ızdedı. 19 qaraşada 7 jasar Milananyŋ denesı qoqystan tabyldy.