Shanhaı yntymaqtastyq uıymnyń baqylaýshylary alty aımaqty baqylaıtyn bolady
Shanhaı yntymaqtastyq uıymnyń bas hatshysy Vladımır Norov bastaǵan baıqaýshylar toby saılaýdy baqylaý úshin elordaǵa keldi, dep habarlaıdy Sputnik Qazaqstan tilshisi.
Onyń aıtýynsha, ShYU mıssııasy 25 adamnan turady. Olardyń deni – uıymǵa múshe memleketterdiń zań shyǵarýshy, atqarýshy jáne saılaý organdarynda jumys isteıtin qyzmetkerler.
ShYU mıssııasy qaı qalalarda júredi
"Bizdiń mıssııamyz baqylaý sharalaryn bastap ketti deýge bolady. Qazirgi kezde olar saılaýǵa daıyndyq máselelerin qadaǵalap júr. Uıymnyń ókilderi Qazaqstannyń jeti qalasyna jiberildi. Olardyń ishinde Nur-Sultan, Almaty, Shymkent, Túrkistan, Qaraǵandy, Atyraý men Óskemen bar. Budan bólek, osy qalalar kiretin alty aımaqty qamtımyz", - dedi Norov Ortalyq saılaý komıssııasynda ótken bırfıngte.
ShYU baqylaýshylary 7 maýsymda saılaýdy uıymdastyrý sharalaryna qadaǵalaýǵa tolyǵymen kirisedi. Al 9 maýsymda daýys berýdi jan-jaqty baqylaıdy.
"Árıne, Qazaqstannyń saılaý zańnamasynda kóp jańalyqtar engizildi. Ondaı tájirıbe Shanhaı yntymaqtastyq uıymyna múshe memleketter úshin úlgi bolady dep senemiz. Qazaqstanda áıel adam alǵash ret prezıdenttik saılaýda óz kandıdatýrasyn usynyp otyr. Sosyn árbir kandıdattyń saılaýaldy baǵdarlamasynda da biraz másele kóterildi", - dep atap ótti Norov.
"Karýsel" qaıtalanbaı ma?
Uıym basshysynyń sózine qaraǵanda, ázirshe zań buzýshylyqtar anyqtalǵan joq. Degenmen, Qazaqstandaǵy prezıdent pen parlament saılaýlaryn baqylaý tájirıbesine sáıkes, tártip buzýshylyqtar azaıyp keledi.
"Shanhaı yntymaqtastyq uıymynyń baıqaýshylary osymen 10 ret Qazaqstandaǵy saılaý naýqanyn qadaǵalaýǵa kelip otyr. Osyny eskere otyryp, bir nárseni erekshe atap ótkim keledi, buryn halyqaralyq baıqaýshylar aıtqan máselelerdiń kóbisi sheshildi. Máselen, "karýsel" degen nárse bar. Ondaıda bir úıdiń otaǵasy... Endi, atalǵan tártip buzýshylyqtar tolyǵymen joıyldy deýge bolady" , - dedi Norov.
Aıta keteıik, saılaý kezindegi "karýsel" daýys berý nátıjelerin burmalaýdyń bir tásili bolyp sanalady. Halyq arasynda ony "vertolet","krýız" dep te ataı beredi. Ondaıda saılaýshylarǵa aqsha berip, olarǵa birneshe ýchaskede daýys berýge múmkindik jasaıdy. Osy topqa kiretin adamǵa aldyn ala toltyrylǵan bıýlleten beriledi. Tártip buzýshy ony jáshikke salady da, jańasyn qaıtadan sol adamdarǵa bere salady. Ol bıýlletendi taǵy aldyn ala toltyryp, "karýselmen" jiberip otyrady.
