Abaı oblysyndaǵy iri orman órtine qatysty qylmystyq is aıaqtalyp, sotqa joldandy. Bul týraly Bas prokýratýranyń baspasóz qyzmeti málimdedi, dep habarlaıdy «Adyrna» ulttyq portaly.
«Tergep-tekserý nátıjesinde, órttiń shyǵý sebebi qylqanjapyraqty aǵashtyń dińine túsken naızaǵaı (qurǵaq naızaǵaı), jer jamylǵysynyń tutanýyna sebep bolǵan. Atalǵan nusqa sarapshy, maman qorytyndylarymen, foto/vıdeo túsirilimderimen, kýálardyń aıǵaqtary jáne qylmystyq istiń basqa da qujattarymen rastalady. Órt kezinde «Semeı-Ormany» rezervaty jáne Novoshýlbınsk fılıalynyń basshylyǵy ózderine zańmen júktelgen órt sóndirý ókilettikterin oryndamaǵan, jaǵdaıdy teris baǵalaǵan jáne órt sóndirý kezinde qaýipsizdik erejeleriniń saqtalýyn qamtamasyz etpegen, nátıjesinde 14 tulǵanyń ólimine ákelip soqqan», - delingen habarlamada.
Sondaı-aq «Semeı-Ormany» rezervaty jáne Novoshýlbınsk fılıaly basshylyǵynyń is-áreketteri Qylmystyq kodekstiń 292 babynyń 3 bóligimen saralanyp (órt qaýipsizdigi talaptaryn buzý, abaısyzda eki nemese odan da kóp adamnyń ólimine ákep soǵý, 5 jyldan 10 jylǵa deıin bas bostandyǵynan aıyrý jazasy kózdelgen), «úıqamaq» túrindegi bultartpaý sharasy taǵaıyndalǵan.
Budan bólek, Ekologııa jáne tabıǵı resýrstar jáne tótenshe jaǵdaılar mınıstrlikteriniń laýazymdy tulǵalarynyń áreketsizdik deregimen tirkelgen sotqa deıingi tergep-tekserý jalǵasyp jatyr. Mamandardyń qorytyndylary alynǵan soń barlyq laýazymdy tulǵalardyń áreketterine quqyqtyq baǵa beriletin bolady.
Esterińizde bolsa, 2023 jyldyń maýsymynda Abaı oblysynyń Batpaev orman sharýashylyǵy «Semeı ormany» memlekettik orman tabıǵı rezervatynda» orman órtengen bolatyn. Saldarynan 60 myń gektar orman qory joıylyp, «Semeı-Ormany» rezervaty Novoshýlbınsk fılıalynyń 14 qyzmetkeri qaza bolǵanyn habarlaǵan edik.
«Adyrna» ulttyq portaly
