Bılik tranzıti bastalǵanda jańa prezıdent pen eski prezıdenttiń keńsesinde qatar qyzmet atqarǵan Abaı Bısembaev sońǵy kezde burynǵy basshy Nursultan Nazarbaevtyń konsılerıi atanyp júr. Onyń eks-prezıdent qasynan tabylýy bir bul emes. Ol kim, bul ne?
Áleýjelide keı oqyrman eks-prezıdentke qatysty keıbir málimetterdi ersi kóretinin jazady. Alaıda eldi 30 jyl boıy úzdiksiz bılep, memlekette bir áýlettiń ǵana qas-qabaǵyna qaraıtyn júıe qalyptastyrǵan, halyqtyń qazirgi deńgeıine sebepshi bolǵan basshynyń árbir qadamy qoǵam úshin mańyzdy.
Jýyrda eks-prezıdent Nursultan Nazarbaevtyń týǵan aýylyna baryp, otbasy múshelerimen sýretke túskeni áleýmettik jelide jarııalanǵan bolatyn. Ile shala belgili jýrnalıst Áset Mataev eks-prezıdent óz dúnıe-múlkin konsılerıi, ıaǵnı kómekshisi Abaı Bısembaev arqyly dúnıe júzi boıynsha satyp jatqanyn habarlady.
Abaı Bısembaev kim jáne ol Nursultan Nazarbaev úshin qanshalyqty senimdi azamat?
AQORDA MEN KITAPHANADA QATAR QYZMET ATQARǴAN
Qazir 56 jastaǵy Abaı Bısembaev Aqmola oblysynda dúnıege kelgen. Iaǵnı ol eks-prezıdenttiń eń jaqyn týysy bolatyndaı Almaty oblysynan shyqpaǵan.
Ol eńbek jolyn ol 1984 jyly Kókshetaý oblysynyń qurylys-montaj basqarmasynyń jumysshysy retinde bastaǵan. 1992-1994 jyldary Memlekettik múlik komıtetiniń jetekshi mamany, bólim basshysy, jappaı jekeshelendirý basqarmasynyń bastyǵy bolsa, 1994 jyly Mınıstrler Kabınetiniń Ákimshilik aýmaqtyq damý bóliminiń bas ınspektory qyzmetin atqarǵan. Odan keıin Prezıdent janyndaǵy Ekonomıkalyq keńesshiler keńesiniń konsýltanty, baǵaly qaǵazdar jónindegi ulttyq komıssııanyń múshesi (1995-1996) jáne 1996-1997 jyldary «Memlekettik azyq-túlik kelisim shart korporaııasynyń» áýeli vıe-prezıdenti, keıin prezıdenti bolyp shyǵa keledi.
Keıin Abaı Bısembaevtyń Prezıdent ákimshiliginiń orynbasary bolyp qyzmeti kóteriledi. 2012 jyly Prezıdenttiń is basqarýshysy bolsa, 2019 jyldan 2022 jylǵa deıin, ıaǵnı Qańtar kóterilisine deıin Prezıdent is basqarýshysynyń birinshi orynbasary bolyp qyzmet atqarady. Bul Prezıdent Toqaevtyń dáýirine tıesili qyzmeti. Bir qyzyǵy ol (19.03.2019-04.2022) dál osy kezeńde Tuńǵysh prezıdenti – Elbasynyń kómekshisi qyzmetin qatar atqarady.
AIDOS SARYM BASYNAN ÓTKERGISI KELMEITIN TRAGEDIIa
Áset Mataevtyń aqparatyna sensek, Nursultan Nazarbaev Almatyǵa kóshýdi josparlap otyr jáne onyń konsıleri Abaı Bısembaev eks-prezıdenttiń kóptegen jyljymaıtyn múlikterin satyp jatqan kórinedi.
Abaı Aıdarhanulynyń esimi dúnıe múlikti satýdan buryn Qańtar kóterilisi kezinde Nursultan Nazarbaevty qutqarýymen kópshilikti esinde bolýy kerek. Naqtyraq aıtsaq, Aıdos Sarym Orda news YouTube-arnasyna bergen suhbatynda Qandy qańtar kezinde Nursultan Nazarbaevty Bısembaev qutqardy dep aıtqan bolatyn.
– Eks-prezıdent, Elbasynyń «Qańtar oqıǵasyna» esh qatysy joq shyǵar. Ol úshin bul naǵyz shok boldy. Barlyq týysqandary Dýbaıǵa qashyp ketkende, ol Almatydan ushyp keldi. Ol tipti óziniń qaýipsizdik qyzmetine de senbedi, ony kómekshisi Abaı Bısembaev óz charterimen, óz jeke kóligimen Almatydan alyp ketti. Siz tipti burynǵy prezıdenttiń arnaıy qyzmetterge qatysty qandaı dárejede senimsizdik tanytqanyn elestete alasyz ba? Osy áýejaıdy ekstremıster basyp almaı turyp, ol Astanaǵa ushyp úlgerdi. Bir ǵana fakt, biraq bul – naqty fakt, eks-prezıdent óziniń kúzetine de, memlekettik kúzet qyzmetine de, komıtetke de senbedi. Ony QR Prezıdenti isin basqarýshy birinshi orynbasary Bısembaev qutqaryp qaldy. Ol óz kóligimen prezıdentti alyp ketti. Bul – úlken tragedııa. Men mundaıdy óz basymnan ótkizgim kelmeıdi, – degen edi Aıdos Sarym.
Osyndaı qyzmettik ósý baspaldaqtary jáne Nazarbaevtyń senim testinen ótken Abaı Bısembaev bylaıǵy jurtqa eks-prezıdenttiń qazyna qambasy sııaqty elesteıdi. Ýaqyt bir ornynda turmaıdy. Qazir kemel shaǵyna kelip tolysqan Abaı Bısembaev ta kúnderdiń bir kúninde memýar jazar. Ol memýary da bestseller bolar...
Serik Joldasbaı
«Adyrna» ulttyq portaly
