Memleket basshysy Qasym-Jomart Toqaev Cybaılas jemqorlyqqa qarsy is-qımyl agenttiginiń tóraǵasy Ashat Jumaǵalıdy qabyldady. Bul týraly Aqorda málimdedi, dep habarlaıdy “Adyrna” ulttyq portaly.
Prezıdentke Sybaılas jemqorlyqqa qarsy qyzmettiń bıylǵy 10 aıda atqarǵan jumysynyń nátıjeleri jóninde baıandaldy.
Osy ýaqyt ishinde elimizde jemqorlyqqa qatysty 1500-ge jýyq qylmys tirkelip, 1100-den astam adamnyń isi áshkerelendi. Onyń 158-i – túrli deńgeıdegi basshylar, - dedi Ashat Jumaǵalı.
Sondaı-aq, sotqa myńnan astam is joldanyp, 282 mıllıard teńge shyǵyn ótelgen. Al agenttik tóraǵasy 2022 jyldan beri bıýdjetke jáne kvazımemlekettik sektor sýbektilerine quny shamamen 857 mıllıard teńge bolatyn múlik aktıvteri men qarjy qaıtarylǵanyn aıtty.
Budan bólek, Ashat Jumaǵalı memleket basshysyna jemqorlyqtyń aldyn alý jumystary týraly esep berdi.
Sybaılas jemqorlyq táýekelderi kartasyn júzege asyrý aıasynda tapsyrylý merzimi keshiktirilgen, qarjy jymqyrý qaýpi bar áleýmettik nysandar qurylysyna monıtorıng júrgizilip jatyr. Agenttik elimizdiń barlyq óńiri boıynsha jalpy bıýdjeti 2,44 trıllıon teńgeni quraıtyn osyndaı 156 nysan bar ekenin anyqtaǵan.
Azamattyq qoǵammen ózara tyǵyz qarym-qatynas ornatý arqyly "Sybaılas jemqorlyqqa qarsy volonterlik" jobasy iske asyrylýda. Qazirgi ýaqytta jemqorlyqtyń beleń alýyna beı-jaı qaramaıtyn 2 myńnan astam azamat bul bastamaǵa atsalysyp jatyr, delingen habarlamada.
Kezdesý sońynda Qasym-Jomart Toqaev jemqorlyqqa qarsy is-qımyldy jáne aldyn alý sharalaryn kúsheıtýge baǵyttalǵan júıeli jumysty jalǵastyrý jóninde birqatar naqty tapsyrma berdi.
