Aqparat jáne qoǵamdyq damý mınıstri Aıda Balaeva kitaphanashylardy tól merekesimen quttyqtady. Bul týraly ol óziniń Facebook paraqshasynda jazdy, dep habarlaıdy, “Adyrna” ulttyq portaly.
Quttyqtaý mátinin tómenge usynamyz:
Búgin elimizde baǵa jetpes qazynalarymyzdyń biri - kitaptarymyzdy kózdiń qarashyǵyndaı saqtap júrgen kitaphanashylarymyzdyń kásibı merekesi.
Memleket basshysy jas urpaqty ulttyq qundylyq negizinde tárbıelep júrgen kitaphanashylar men kitaphanalar jaǵdaıyna aıryqsha kóńil bóledi. Oǵan negiz de bar. Qazirgi tańda elimizde 25 myńnan astam kitaphanashy, 11 myńǵa jýyq kitaphana, 328 mıllıonnan astam kitap qory bar. Bul elimiz úshin baǵa jetpes rýhanı baılyq.
Úkimet qaýlysymen bekitilgen búgingi data kezdeısoq emes. Elimizdegi eń alǵashqy kitaphana Batys Qazaqstan oblysynda osydan 152 jyl buryn 24 qazan kúni esigin ashqan. Búginde Juban Moldaǵalıev atyndaǵy ámbebap ǵylymı kitaphana óńirdegi 360 kitaphananyń ádistemelik ortalyǵy sanalady.
Jalpy Qazaqstan boıynsha eń úlken kitaphana – Almaty qalasyndaǵy Ulttyq kitaphana. Munda qazir 7 mıllıonnan astam kitap qory bar.
Sońǵy kezde kitap oqý trendi qaıta jańǵyryp, oqyrmandar sany 9,5 mıllıonǵa jetti. Ásirese, ata-analar bala tárbıeleýde kitaptyń kómegine kóbirek júginedi. Búldirshinderdi osy kúnderi fantastıka jáne komıks janry erekshe qyzyqtyrady. Bul rette otandyq baspahanalarǵa aıtarym, balalar kitaphanasyn damytýǵa bet burý kerek. Bul naryqtyń suranysy.
Odan basqa, keıingi 5 jylda kitaphanalar qory tek memlekettik tapsyryspen shyqqan 4,5 mıllıonnan astam kitappen tolyqtyryldy. Bul baǵytta jumystar jalǵasady.
Zamanǵa saı elektrondyq kitaphanany damytý jumysy qarqyn aldy. Aldaǵy ýaqytta elimizdiń barlyq kitaphanalary birtutas aqparattyq júıege qosylatyn bolady. Oqyrmandar elimizdiń kez-kelgen kitaphanasynan qajetti kitapty «biryńǵaı bılet» arqyly oqı alady. Qoldaǵy smartfon arqyly kez-kelgen kitaphanamen baılanys ortanatýǵa bolatyn jobalar taǵy bar.
Sondyqtan osy ıgilikterdiń barlyǵyn árbir oqyrmanyna jetkizýshilerdiń biri – kitaphanashylar. Sizderdiń eńbekterińiz eren!
Barshańyzdy kásibı merekemen, ulttyq mereke – Respýblıka kúnimen quttyqtaımyn! Sizderge zor densaýlyq, otbasylaryńyzǵa amandyq pen jemisti jumys tileımin. Elimizdiń rýhanı jáne zııatkerlik áleýetin arttyrýǵa qosyp jatqan eńbekterińiz ári qaraı da tabysty bola bersin!
