Qazaq tılıne audarylǧan 18 oqulyqtyŋ jalpy taralymy 47 millionnan asady. Būl turaly Ūlttyq audarma biurosynyŋ atqaruşy direktory Rauan Kenjehanūly aitty.
- Özıŋızdıŋ tapsyrmaŋyz boiynşa osy tapsyrmany ıske asyru üşın ükımettık emes jäne kommersiialyq emes negızde jūmys ısteitın Ūlttyq audarma biurosy qūryldy. Bügın osy asa jauapty ärı özındık qiyndyqtary da köp jūmystyŋ alǧaşqy nätijesımen tanystyrudyŋ sätı keldı», - dep atap öttı ol bügın «Jaŋa gumanitarlyq bılım. Qazaq tılındegı 100 jaŋa oqulyq» jobasy aiasynda jaryq körgen oqulyqtardy Elbasy Nūrsūltan Nazarbaevqa tanystyru barysynda.
Onyŋ aituynşa, «100 oqulyq» jobasy jariialana salysymen elımızdıŋ joǧary oqu oryndarynan jalpy sany 800-den asa audaryluy kerek degen oqulyqqa ūsynys kelıp tüsken.
- Mamandardan qūrylǧan arnaiy jūmys toby audarylatyn oqulyqtarǧa qoiylatyn mynadai talaptardy anyqtady: oqulyq düniejüzındegı maŋdai aldy 100 universitettıŋ baǧdarlamasynda boluy kerek; kemınde üş basylym köruı tiıs; mazmūny özektı ärı ideialyq tūrǧydan beitarap boluy kerek; sonymen bırge oqulyq zaman talabyna sai interaktivtı oqyp-üirenuge mümkındık beruı qajet», - dedı Rauan Kenjehanūly.
Ūlttyq biuro direktorynyŋ atap ötuınşe, osyndai talaptar negızınde filosofiia, äleumettanu, psihologiia, tıl bılımı, antropologiia men dıntanu, jurnalistika, ekonomika men käsıpkerlık salalaryn qamtityn alǧaşqy 18 oqulyq ırıktelgen.
- Taŋdalǧan oqulyqtardy jinaqtap aitsaq, būl oqulyqtar älemnıŋ 42 elınde 34 tılde basylyp, jalpy taralymy 47 millionnan asqan. Mūndai oqulyqtarda memlekettık baǧdarlama aiasynda audaryp, tegın taratu älemde balamasy joq täjıribe», - dedı ol.
Aita keteiık, Astanadaǧy Nazarbaev ortalyǧynda «Qazaq tılındegı 100 jaŋa oqulyq» jobasy aiasynda audarylǧan alǧaşqy kıtaptardyŋ tanystyrylymy ötıp jatyr. Saltanatty şaraǧa QR Prezidentı Nūrsūltan Nazarbaev qatysuda.
________________________________________________________________________
inform.kz
Ūqsas jaŋalyqtar
