16 qazannan bastap turmystyq zorlyq-zombylyq pen býllıng qurbandary bolǵan qazaqstandyqtar 111 biryńǵaı memlekettik baılanys ortalyǵyna habarlasa alady. Bul týraly úkimettiń baspasóz qyzmeti málimdedi, dep habarlaıdy “Adyrna” ulttyq portaly.
Baılans ortalyǵy táýlik boıy jumys isteıdi. Qalalyq nómirler men uıaly baılanys operatorlary úshin qońyraý shalý tegin. Azamattarǵa qajetti kómek mátindik dıalog arqyly da kórsetiletin bolady.
Turmystyq zorlyq-zombylyq, balalar men jasóspirimder arasyndaǵy býllıng máseleleri boıynsha ótken keńeste premer-mınıstrdiń orynbasary Tamara Dúısenova baılanys ortalyǵyna úlken jaýapkershilik júktelgenin atap ótti.
Atalǵan sharalar azamattar, ásirese áıelder men balalar úshin qaýipsiz jaǵdaı jasaýǵa múmkindik beredi. Baılanys ortalyǵy memlekettiń ýaqytyly kómek kórsetýiniń tıimdi quralyna aınalady, sondaı-aq óńirler boıynsha asa ótkir problemalarǵa monıtorıng jasaý úshin derekter kózi bolmaq, — dedi Tamara Dúısenova.
Sondaı-aq, qıyn jaǵdaıǵa tap bolǵan qazaqstandyqtarǵa kómek kórsetý úshin bilikti psıhologtar men zańgerler tartylatyny da aıtyldy. Árbir jaǵdaı boıynsha operatorlar "dál osy sátte" qaǵıdatyn basshylyqqa ala otyryp, jekelegen másele boıynsha keshendi kómek kórsetetin bolady. Barlyq qajetti memlekettik organ men qyzmetti mindetti keri baılanys tásilin qoldana otyryp, bir mezgilde qosý kózdelgen.
Biryńǵaı senim telefony memlekettik shuǵyl qyzmetter tizbesindegi 101, 102, 103 jáne t.b. nómirlerdiń qataryna engiziledi.
