Jambyl Ahmetbekov: "Stalın úshin keshirim suraımyn!"

Kommýnıstik partııanyń atynan Prezıdenttik saılaýǵa túsip jatqan Jambyl Ahmetbekovtiń jaǵdaıy bizdegi kóp balaly analardan onsha máz emes ekenin ótkende ózi jaıyp saldy. Karaterıst, adal kommýnıst aǵamyz áli kúnge baspanasyz júripti. Estýimizshe, jaqynda ǵana kredıttenip júrip, baspanaǵa qol jetkizgen eken, ony da tóleýge aılyǵy jetpeı, báıbishesi kómektesip júr eken. Al báıbishesiniń bir basynda eki kredıt... qıyn.
Sóıte tura Jákeń el úshin, halyq úshin beldi bekem býyp, ekinshi ret saılaýǵa túsýge nıettenip otyr. Jýyrda baǵdarlamasyn jarııalady. Jemqorlyqpen kúresip, olıgarhtardy jónge sap, shetelge tyqqan-myqqandardyń barlyq qarajatyn elge qaıtaryp, taza kommýnızmdi ornatam depti... bul joly da.
Árıne, jaqsy ǵoı. Biz Jákeńe odan góri tıimdi bir jarnamalyq taqyryp usynýdy qup kórdik.
Eger Jambyl Ahmetbekov dál aldymyzdaǵy 31 maı kúni (bu kisiler mamyr dp aıtpaıtyn bolsa kerek) búkil komandasyn ertip, Kosarevti de qaldyrmaı, Almatydaǵy qýǵyn-súrgin qurbandaryna qoıylǵan eskertkishtiń aldyna kelip, qazaqtyń jartysynan kóbin jalmaǵan ashtyq pen kileń sorpa betine shyǵarlaryn ólimge qıǵan qyzyl terror saıasat úshin kúlli qazaqtan keshirim surasa, bu kisiniń ataǵy elge emes, álemge jaıylar edi. Sonda aldyńǵy jolǵydaı
1,36% daýystan kóbirek daýys jınap, kemi 2 paıyzǵa jýyqtar ma edi, dep oılaımyn. Keshirimdi jaı suramaı, anaý kúni "Bessmertnyı polkke" qatysqan 120 myń sherýshini ertip alsa, qandaı sensaııa jasar edi.
Jákeń sonda bylaı bastasa sózin:
– Qurmetti halaıyq, qoıdan qońyr qazaq halqy, biz kommýnıster, Sizderge barlyq jaqsylyq pen ıgilikter bolýyn tileı otyryp, ótken tarıhtaǵy keıbir kemshilikter úshin (jumsartyp aıta bersin- red.), uly kósemimiz, jarty álemdi jarylqaýshy (oǵan jaryq dúnıeden armandary oryndalmaı ketken kommýnısterdiń ıgiligi men sálemi bolsyn) Iosıf Vıssarınovıch Stalınniń keıbir qatelikteri úshin ıilip, keshirim suraımyz! Eger sol bir kemshilikter "oryn almaǵanda", myna sizder, qazaq halqy búginderi 40-45 mıllıon bolar edińizder. Ol týraly bir sózinde Nýrsýltan Abıshevıch te aıtty ǵoı. Endi ótkendi keri qaıtara almaımyz. Amal joq. Biz keshirim suraımyz. Sizder keshiresizder... Bizge daýys berińizder. Eger alda-jalda men jeńiske jeter bolsam, buryn oryndaı almaı ketken kommýnısterdiń armanyn - naǵyz kommýnızmdi ornatamyn! – dese... Budan artyq sózdiń tegi keregi joq. Eger osylaı istese, Jákeńdi bir kúnde búkil álem tanyr edi ári qazaq eliniń zulmat tarıhyn da jalpaq álem biler edi.
Eger osylaı etse, sóz joq, keshegi Stalınniń sýretin kótergen-kótermegenderi bar, bári jıylyp, Jákeńe ájeptáýir qoldaý kórseteri daýsyz. Bálkim bir atymtaı shyǵyp, Jákeńe kóp balaly analarmen birge bir baspana syılap jiberýi de ǵajap emes. Ómirińizde osyndaı bir erlik jasap kórseńizshi, Jáke. 31 mamyr ana bir aıadaı jerde kezigeıik...