Reseı mektepteri alǵashqy áskerı daıyndyq sabaǵy úshin Kalashnıkov avtomatyn, qol granatalaryn jáne basqa da áskerı tehnıkalardy jappaı satyp alyp jatyr, dep habarlaıdy «Adyrna» tilshisi «Moskow Times» basylymyna silteme jasap.
2023 jyldyń qańtarynan bastap bilim berý mekemeleri «ómir qaýipsizdigine arnalǵan kabınetterge» qural-jabdyq alý úshin 240 mıllıon rýblden astam qarajat jumsaǵan.
Aıta ketý kerek, alǵashqy áskerı daıyndyq pánine qajet zattardy satyp alý shyǵyny basqa mektep pánderine kerek qural-jabdyqtardy satyp alýǵa ketken qarjydan aıtarlyqtaı asyp tústi. Máselen, orys mektepteri hımııa pánine shamamen 64 mıllıon rýbl, fızıkaǵa 11 mıllıon rýbl, bıologııaǵa 21 mıllıon rýbl jumsaǵan.
«Máskeý men Máskeý oblysynyń bilim bólimi áskerı tehnıkany satyp alýǵa 14 mıllıon rýbl (67,5 mıllıon teńge) bólgen. Al Kemerov oblysynda ómir qaýipsizdigi negizderi pániniń muǵalimderi soǵysqa qatysýshylarmen almastyryla bastady. Bilim bólimi AÁD qural-jabdyqtaryn alýǵa 50 mıllıon rýblden asa qarjy jumsaǵan»,—dep jazdy basylym.
Kelisimsharttardyń mazmuny jasyrylmaǵan satyp alýlarda bilim berý uıymdarynyń shamamen 1280 Kalashnıkov avtomatyn satyp alǵanyn kórýge bolady. Budan bólek mektepterge 5,45 kalıbrli patrondar, qosalqy jýrnaldar, F-1 jáne RGD-5 granatalarynyń maketteri, atý trenajerlary jetkizilgen.
