Tarıhshy, zertteýshi Ádilet Jaǵypar “bilim kúni qarsańynda ult ustazy qosa ulyqtalýy tıis” ekenin jetkizdi, dep habarlaıdy “Adyrna”.
Elimizde qyrkúıektiń alǵashqy kúni - Bilim kúni merekesi. Ataýly kúni oqýshylar, 1 synypqa qadam basqan búldirshinder, shákirtke bilim berýge asyqqan ustazdar mektepke asyǵady.
Eń alǵash mektep tabaldyryǵyn attaǵan bilim alýshy áripti tanyp, álippemen sýsyndaıdy. Al qazaq álippesin ómirge ákelgen - Ahmet Baıtursynuly.
Búginde tarıhshy, zertteýshi Ádilet Jaǵypar áleýmettik jelidegi paraqshasynda suhbatpen bólisip, jazba qaldyrdy.
“Byltyr baýyrymdy 1 synypqa apardym. Sol mektepte 1 qyrkúıek Bilim kúni Ult ustazy Ahmet Baıtursynuly týraly birde-bir sóz aıtylmady...
Sodan byltyrǵy Aıjarkyn qaryndasyma bergen suhbatymda osy máseleni kóterdim. Jylda toılanatyn Bilim kúninde nege Ult ustazyn ulyqtamasqa?
Bilim berý mekemeleri ózderi bilsin qandaı formatta ótkizetinin, eń bastysy balanyń júregine Ult ustazy Ahmet Baıtursynulynyń aıtqan oılaryn sińdire alsaq bizdiń maqsatymyzdyń oryndalǵany dep bilemin”,-dedi jeli qoldanýshysy.
Sondaı-aq “ult ustazy” atanǵan Ahmet Baıtursynuly qazaqtyń arǵy-bergi tarıhynan tereń saýaty bolǵan, qıyndyqtan qutylýdyń joly eń birinshi halyqty oıatý men bilimge jeteleý dep eseptegen.
