Qazaqstanda eki jyl ishinde múgedek balalarǵa qosymsha sabaq beretin 15 myńnan asa muǵalim jalaqysyna qosylyp tólenýi tıis aqshany almaǵan. Bas prokýratýra baspasóz qyzmetiniń habarlaýynsha, muǵalimderge tólenbegen ústemeaqynyń jalpy somasy - 176,2 mıllıon teńge.
"Prokýratýra jalpy bilim beretin mekemeler qyzmetkerleriniń eńbek quqyqtarynyń saqtalýyn taldaý barysynda Qazaqstan boıynsha 15 305 pedagogke 2016-2018 jyldardaǵy oqý kezeńinde erekshe bilim berý qajettigi bar balalarmen jumys istegeni úshin ústemeaqy tólenbeı kelgenin anyqtady" dep jazady.
Vedomstvonyń jazýynsha, ınklıýzıvti bilim berý aıasynda jumys istegeni úshin pedagogke jalaqysynyń 40 paıyz shamasynda ústemeaqy tólenýi tıis.
"Zań buzýshylyqtar joıylyp, muǵalimderge 176, 2 mln teńge mólsherinde ústemeaqy aýdaryldy" dep jazady prokýratýra.
Qazaqstanda Bilim týraly zańǵa 2010 jyly engizilgen tolyqtyrýlar men ózgertýler boıynsha, kez kelgen mektep erekshe muqtajdyǵy bar balany qabyldaýǵa mindetti. Biraq iske kelgende qural-jabdyq pen arnaıy mamannyń joqtyǵynan bul saıasat júzege asa bermeıdi. Resmı derek boıynsha, eldegi kámelet jasyna tolmaǵan balalardyń úsh paıyzy, ıaǵnı 148 myńy ınklıýzııaǵa zárý. Olardyń 40 myńǵa jýyǵyna ǵana arnaıy bilim beretin jaǵdaı jasalǵan.
