Astanada adamdardy qutqarý kezinde erlikpen qaza tapqan batyr órt sóndirýshi Asqar Zabıkýlın týraly teleserıal qyrkúıekte kórsetiledi. Bul týraly Aqparat jáne qoǵamdyq damý mınıstri Darhan Qydyráli aıtty, dep habarlaıdy «Adyrna» tilshisi.
«Sońǵy kezderi elimizde serıal óndirisi, kreatıvti ındýstrııa damyp jatqany belgili. Bizde túsirilgen serıaldardy sheteldik arnalarǵa satyp alýda. Sondaı fılmniń biri - qarapaıym da adal eńbek adamyn sýretteıtin “Qaharman” atty teleónim. Órt kezinde opat bolǵan batyr beınesin nasıhattaıtyn serıaldyń sıýjeti shynaıy oqıǵalarǵa negizdelgen - halyq qaharmany Asqar Zabıkýlın týraly. Bas keıipkeri - ótken jyly ǵana alaýmen arpalysyp, úsh adamnyń ómirin qutqarǵan, ókinishke oraı, ózi ajal qushqan órt sóndirýshi Asqar Zabıkýllın»,—dedi mınıstr.
Eske sala ketsek, byltyr 16 qarashada Asqar Zabıkýlın Astanadaǵy turǵyn úı kesheninde birneshe adamdy órtten aman alyp shyqty. Tilsiz jaý saldarynan denesiniń 80 paıyzyn kúıip shalǵan órt sóndirýshi aýrýhanada kóz jumdy. Onyń artynda áıeli men eki balasy qaldy.
