Azattyq alǵaly bergi 30 jyl ishinde M.Maǵaýın óziniń azat Otany tarapynan birde-bir marapat, syı-qurmet kórgen joq; 30 jyl ishinde nebir haltýrıkterdiń tonnalap makýlatýrasyn shyǵaryp jatqan Mádenıet mınıstrligi yqylas tanytyp, Maǵaýınniń bir kitabyn da basyp shyǵarǵan emes. (12 tomdyq hám 25 tomdyq shyǵarmalar jınaǵyn ádebıettiń qadir-qasıetin biletin, jazýshy talantyna sheksiz qurmetpen tabynatyn meenat azamattar óz qarjysyna shyǵaryp berdi).
Munyń aty ne? «Kórmes – túıeni de kórmes» demeske amalymyz qaısy. Já, bul kesirli NÁN-baıdyń zamanyndaǵy tulǵany taptaýǵa arnalǵan rýhanı keseldi qysastyqtyń kórinisi delik. Al biraq búgingi jańa kezeńde ne ózgerdi? Jańa, Ádiletti Qazaqstan Muhańdaı alybyna júregi eljirep, qushaǵyn jaıdy ma? Ázirge ondaı yqylasty kóre qoıǵan joqpyz. Sol baıaǵy syz qabaq, kók sireý muz kóńildiń kóbesi sógilmegen sııaqty. Esesine, NÁN-siz tańy atyp, taýyǵy shaqyrmaıtyn jol-jorǵalar qalpaǵyn aınaldyryp kıip, jańasha saırap, burynǵysha úpil-málik bop júr.
