Қазақстан-Беларусь қарым-қатынасы тек Қазақстан Президенті Қасым-Жомарт Тоқаев пен Александр Лукашенконың арасында талқылануы мүмкін. Бұл туралы Сыртқы істер министрлігінің ресми өкілі Айбек Смадияров айтты, деп хабарлайды «Адырна» тілшісі.
«Беларусь Президенті – экс-президентімізбен (Нұрсұлтан Назарбаев — ред.) бұрыннан жақсы араласады. Сондықтан олардың арасында өзара айтатын әңгіме көп. Өздеріңіз білетіндей, еліміздің сыртқы саясатын, оның ішінде шет мемлекеттермен қарым-қатынасын айқындау Мемлекет басшысының құзыретіне жатады. Сондықтан, Қазақстан-Беларусь қарым-қатынасы тек қазіргі президенттер арасында талқылануы мүмкін.
Айта кету керек, Беларусь Республикасымен біздің қарым-қатынасымыз стратегиялық сипатқа ие, күн тәртібінде тұрған мәселелер жоқ. Екі ел арасындағы барлық деңгейдегі тұрақты және басқа да байланыстар сақталады»,—деді ол.
Бұған дейін Беларусь президенті Александр Лукашенко Ресей басшысы Владимир Путинмен және Қазақстанның тұңғыш президенті Нұрсұлтан Назарбаевпен телефон арқылы сөйлескенін айтқан еді.
