قازاقستان-بەلارۋس قارىم-قاتىناسى تەك قازاقستان پرەزيدەنتى قاسىم-جومارت توقاەۆ پەن الەكساندر لۋكاشەنكونىڭ اراسىندا تالقىلانۋى مۇمكىن. بۇل تۋرالى سىرتقى ىستەر مينيسترلىگىنىڭ رەسمي وكىلى ايبەك سمادياروۆ ايتتى، دەپ حابارلايدى «ادىرنا» ءتىلشىسى.
«بەلارۋس پرەزيدەنتى – ەكس-پرەزيدەنتىمىزبەن (نۇرسۇلتان نازارباەۆ — رەد.) بۇرىننان جاقسى ارالاسادى. سوندىقتان ولاردىڭ اراسىندا ءوزارا ايتاتىن اڭگىمە كوپ. وزدەرىڭىز بىلەتىندەي، ەلىمىزدىڭ سىرتقى ساياساتىن، ونىڭ ىشىندە شەت مەملەكەتتەرمەن قارىم-قاتىناسىن ايقىنداۋ مەملەكەت باسشىسىنىڭ قۇزىرەتىنە جاتادى. سوندىقتان، قازاقستان-بەلارۋس قارىم-قاتىناسى تەك قازىرگى پرەزيدەنتتەر اراسىندا تالقىلانۋى مۇمكىن.
ايتا كەتۋ كەرەك، بەلارۋس رەسپۋبليكاسىمەن ءبىزدىڭ قارىم-قاتىناسىمىز ستراتەگيالىق سيپاتقا يە، كۇن تارتىبىندە تۇرعان ماسەلەلەر جوق. ەكى ەل اراسىنداعى بارلىق دەڭگەيدەگى تۇراقتى جانە باسقا دا بايلانىستار ساقتالادى»،—دەدى ول.
بۇعان دەيىن بەلارۋس پرەزيدەنتى الەكساندر لۋكاشەنكو رەسەي باسشىسى ۆلاديمير پۋتينمەن جانە قازاقستاننىڭ تۇڭعىش پرەزيدەنتى نۇرسۇلتان نازارباەۆپەن تەلەفون ارقىلى سويلەسكەنىن ايتقان ەدى.
