Elimizde 4 paıyzdyq avtonesıe baǵdarlamasy toqtatylady. Bul týraly Indýstrııa jáne ınfraqurylymdyq damý mınıstri Marat Qarabaev málimdedi, dep habarlaıdy «Adyrna» tilshisi.
Aıtýynsha, qazirgi kezde avtokóliktiń eń suranysqa ıe túri – avtobýs.
«4 paıyzdyq avtonesıe baǵdarlamasyn qaıta jańartýdy josparlap otyrmyz. Avkólikterdi nesıeleý baǵytyn avtobýstardy nesıeleýge aýystyrmaqshymyz. Búkil respýblıka boıynsha 10525 avtobýs bar. Olardyń kópshiligi tozǵan. Qoǵamdyq kólikti kúndelikti 9,3 mıllıon qazaqstandyq paıdalanady. Biz olardyń qajettilikterine basymdyq bermekpiz»,—dedi mınıstr.
Sondaı-aq Marat Qarabaev baǵdarlama sharttarynyń ózgerýi jeńil kóliktertiń qymbattaýyna áser etpeıtinin atap ótti.
«Bul jeńil kólik qymbattaıdy degen sóz emes. Qazaqstandyqtar kólikti naryqtyq stavkamen ala alady. Iaǵnı, óndirýshilerdiń ne bankterdiń baǵdarlamasyn qoldanýǵa bolady»,—dedi ol.
Aıta keteıik, jeńildetilgen avtonesıe ótken jyly mamyr aıynda berilgen edi. Onyń ekinshi tolqyny bıyl aqpanda online qabyldandy. 18 sekýndta 761 adam ǵana tirkelip, platforma halyqtyń synyna ushyrady.
