«QazMūnaiGazda» tekseru jürıp jatyr. Qazırdıŋ özınde bırqatar zaŋ būzuşylyqtardyŋ şetı şyqqan. Mäselen, «Özenmūnaigazdyŋ» qarjy-şaruaşylyq qyzmetınde 160 zaŋ būzuşylyq anyqtaldy. Būl jaiynda «QazMūnaiGaz» ūlttyq kompaniiasynan mälım ettı, dep habarlaidy "Adyrna" ūlttyq portaly «Qazmūnaigaz» Ūlttyq kompaniiasynyŋ baspasöz qyzmetıne sılteme jasap.
Kompaniia mälımetınşe, Jaŋaözen qalasynda QMG arnaiy jūmys toby tekserıs jürgızudı jalǧastyryp jatyr. Qazırgı uaqytta 55 şaruaşylyq qyzmet nysanyna tekserıs jürgızıldı. Atap aitqanda, «Özenmūnaigaz» AQ-tyŋ 17 öndırıstık qūrylymdyq bölımşesı, 8 mūnai servis ūiymy men 30 basqa da merdıger ūiymnyŋ qyzmetı taldandy. ÖMG-nıŋ qarjy-şaruaşylyq qyzmetın tekseru kezınde aldyn ala 160 būzuşylyq pen säikessızdık anyqtaldy.
Onyŋ ışınde 7 faktı QR zaŋnamasyna sai şaralar qabyldau üşın qūqyq qorǧau organdaryna jıberıldı. 10 faktı boiynşa qyzmettık tergeu jürıp jatyr. 101 faktı boiynşa jauapty tūlǧalarǧa tärtıptık jaza qoldanylatyn bolady.
Qūqyq būzuşylyq faktılerınıŋ saldarynan keltırılgen şyǧyn somasy prosessualdy jäne reglamentteuşı ıs-şaralardyŋ qorytyndysy boiynşa anyqtalady.
«Bız qūqyq qorǧau organdarymen tyǧyz jūmys ıstep, zaŋǧa qaişy anyqtalǧan äreketter jaily der kezınde habarlap otyrmyz. Būdan ärı olar tergeu jürgızıp, özge ıs-şaralardy qolǧa alady. Solardyŋ bırıne keşe Ekonomikalyq tergeu departamentınıŋ «Özenmūnaigaz» bas direktorynyŋ orynbasaryn ūstau faktısı de jatady. Komissiianyŋ jūmysy älı aiaqtalmady, köptegen fakt boiynşa qyzmettık tergeuler jürıp jatyr», - dedı arnaiy jūmys tobynyŋ jetekşısı, QMG Basqarma töraǧasynyŋ orynbasary Däuletjan Hasanov.
"Adyrna" ūlttyq portaly
Ūqsas jaŋalyqtar
