Búgin Jambyl oblysynyń Óńirlik kommýnıkaııalar qyzmetinde Shý aýdanynyń ákimi Baqytjan Jánibekov aýdannyń alǵashqy toqsandaǵy áleýmettik-ekonomıkalyq damý kórsetkishi týraly baıandap, buqaralyq aqparat quraldary ókilderiniń tarapynan qoıylǵan saýaldarǵa jaýap berdi.
Brıfıng barysynda aýdan basshysy ótken jyly óńirde atqarylǵan jumystarǵa toqtalyp, aldaǵy maqsat-mindetterdi atap ótti. Sonymen birge, toǵyz joldyń torabynda ornalasqan óńirdiń ózekti máselelerin de jeke-jeke atap ótti. Dálirek aıtqanda, Shý aýdanyndaǵy kún tártibinde turǵan ózekti máseleniń eń negizgisi ol – jaıylymǵa qatysty túıtkil. Atalǵan máseleni júıeli túrde sheshý úshin qazirgi kezde birqatar jumystar qolǵa alynǵan. Aýdan ákiminiń aıtýynsha, ótken jyly eldi mekenniń jaıylym jerlerin ulǵaıtý boıynsha aýdandyq bosalqy jer qorynan qosymsha 83,3 myń gektar jaıylymdyq jer ýchaskeleri aýyldyq okrýgterge bekitilip berilipti.
– Aǵymdaǵy jyly paıdalanylmaı jatqan aýyl sharýashylyǵy maqsatyndaǵy 22000 gektar jerdi memleket menshigine qaıtarý jospar josparlanyp otyr. Qazirgi kezde bul jumystar qarqyndy júrgizilýde. Jyl basynan bastap jalpy memleket menshigine 9 000 gektar jerdi qaıtardyq. Al, ótken jyly barlyǵy 34945 gektar jer qaıtarylǵan bolatyn. Onyń 182 gektary sýarmaly, 2910 gektar tálimdik jer bolsa, qalǵan 31 myń gektary jaıylymdyq jerler. Budan bólek, Shý aýdanynyń halqy negizinen aýylsharýashylyǵyna beıim bolǵandyqtan aýyz sý máselesi de óte ózekti bolyp otyr. Bul baǵytta qolǵa alynǵan jumystar da bir júıege keltirile bastady. Máselen, aýdan boıynsha 94 kanal bar bolsa, onyń ishinde jalpy uzyndyǵy 103 shaqyrym bolatyn 16 kanalǵa jóndeý jumystary júrgizilip, qaıta jańǵyrtylýda. Oǵan qosa, qosymsha 35 kanalǵa jobalyq-smetalyq qujattar ázirlenip qoıdy, - deıdi Baqytjan Orazalyuly.
Atap ótkenimizdeı, aýdan ákimi aımaqtaǵy sheshimin kútken máselelerge de keńinen toqtaldy. Olardyń qatarynda turǵyn úı máselesi de bar. Búgingi tańda turǵyn úı salý úshin kezekte turǵan 1216 azamatqa jer telimderi berildi. Atalǵan jer telimderi Shý qalasy men Tóle bı jáne Alǵa aýyldyq okrýgterinen berilgenin de aıta ketken jón. Aýdandaǵy eldi mekenderdi sapaly aýyz sýmen qamtamasyz etý de kún tártibindegi máselelerdiń qatarynda. Qazirgi kezde aýdandaǵy 35 eldi mekenniń 9-y aýyz sýmen qamtylmaı otyr. Ótken jyly atalǵan 9 eldi mekenniń 6-ýyn aýyz sýmen qamtamasyz etý maqsatynda merdigerleri anyqtalyp, qurylys jumystary bastalyp ketken. Naqtyraq aıtqanda, olardyń qatarynda halyq tyǵyz ornalasqan Kóktóbe, Aqtóbe, Eńbekshi, Saýytbek, Kókqaınar aýyldary men Shý qalasyndaǵy Qant zaýyty móltek aýdany bar. Bul nysandar ótpeli bolýyna baılanysty aǵymdaǵy jyldyń qazan aıynda jumystar tolyǵymen aıaqtalmaq. Nátıjesinde, 2025 jyldyń sońyna qaraı Shý aýdanyndaǵy eldi mekender 100 paıyz taza aýyz sý júıesimen qamtylmaq.
Sonymen qatar, jıyn barysynda Baqytjan Orazalyuly jergilikti turǵyndardy tolǵandyrǵan saýaldarǵa jaýap berdi. Qazirgi kezde respýblıkalyq «Merki-Shý-Býrylbaıtal» avtojolynda kúrdeli jóndeý jumystarynyń júrgizilip jatqany belgili. Osyǵan oraı, atalǵan kúre joldyń Shý ózeninen ótetin «Andasbaı» kópirine jóndeý júrgizilmek. Alaıda, osy kópir arqyly aýdan ortalyǵyna qatynaıtyn bes aýyldyń turǵyndary kópirdiń ýaqytsha jabylýyna narazylyqtaryn bildirgen. Atalmysh másele boıynsha jergilikti bılik ókilderi negizgi kópirdiń qurylysy aıaqtalǵansha Shý ózeninen ótetin ýaqytsha ótkel soǵý jóninde sheshim qabyldaǵan.
Al, bilim salasy boıynsha bıyl 5 mektepti kúrdeli jóndeýden ótkizý úshin jobalyq-smetalyq qujattar ázirlenýde. Sáıkesinshe, kelesi jyly 6 jańa bilim oshaǵy, eki japsarlas qurylys, 5 mektepte kúrdeli jóndeý jumystary atqarylmaq.
"Adyrna" ulttyq portaly
