بۇگىن جامبىل وبلىسىنىڭ وڭىرلىك كوممۋنيكاتسيالار قىزمەتىندە شۋ اۋدانىنىڭ اكىمى باقىتجان جانىبەكوۆ اۋداننىڭ العاشقى توقسانداعى الەۋمەتتىك-ەكونوميكالىق دامۋ كورسەتكىشى تۋرالى بايانداپ، بۇقارالىق اقپارات قۇرالدارى وكىلدەرىنىڭ تاراپىنان قويىلعان ساۋالدارعا جاۋاپ بەردى.
بريفينگ بارىسىندا اۋدان باسشىسى وتكەن جىلى وڭىردە اتقارىلعان جۇمىستارعا توقتالىپ، الداعى ماقسات-مىندەتتەردى اتاپ ءوتتى. سونىمەن بىرگە، توعىز جولدىڭ تورابىندا ورنالاسقان ءوڭىردىڭ وزەكتى ماسەلەلەرىن دە جەكە-جەكە اتاپ ءوتتى. دالىرەك ايتقاندا، شۋ اۋدانىنداعى كۇن تارتىبىندە تۇرعان وزەكتى ماسەلەنىڭ ەڭ نەگىزگىسى ول – جايىلىمعا قاتىستى تۇيتكىل. اتالعان ماسەلەنى جۇيەلى تۇردە شەشۋ ءۇشىن قازىرگى كەزدە بىرقاتار جۇمىستار قولعا الىنعان. اۋدان اكىمىنىڭ ايتۋىنشا، وتكەن جىلى ەلدى مەكەننىڭ جايىلىم جەرلەرىن ۇلعايتۋ بويىنشا اۋداندىق بوسالقى جەر قورىنان قوسىمشا 83,3 مىڭ گەكتار جايىلىمدىق جەر ۋچاسكەلەرى اۋىلدىق وكرۋگتەرگە بەكىتىلىپ بەرىلىپتى.
– اعىمداعى جىلى پايدالانىلماي جاتقان اۋىل شارۋاشىلىعى ماقساتىنداعى 22000 گەكتار جەردى مەملەكەت مەنشىگىنە قايتارۋ جوسپار جوسپارلانىپ وتىر. قازىرگى كەزدە بۇل جۇمىستار قارقىندى جۇرگىزىلۋدە. جىل باسىنان باستاپ جالپى مەملەكەت مەنشىگىنە 9 000 گەكتار جەردى قايتاردىق. ال، وتكەن جىلى بارلىعى 34945 گەكتار جەر قايتارىلعان بولاتىن. ونىڭ 182 گەكتارى سۋارمالى، 2910 گەكتار تالىمدىك جەر بولسا، قالعان 31 مىڭ گەكتارى جايىلىمدىق جەرلەر. بۇدان بولەك، شۋ اۋدانىنىڭ حالقى نەگىزىنەن اۋىلشارۋاشىلىعىنا بەيىم بولعاندىقتان اۋىز سۋ ماسەلەسى دە وتە وزەكتى بولىپ وتىر. بۇل باعىتتا قولعا الىنعان جۇمىستار دا ءبىر جۇيەگە كەلتىرىلە باستادى. ماسەلەن، اۋدان بويىنشا 94 كانال بار بولسا، ونىڭ ىشىندە جالپى ۇزىندىعى 103 شاقىرىم بولاتىن 16 كانالعا جوندەۋ جۇمىستارى جۇرگىزىلىپ، قايتا جاڭعىرتىلۋدا. وعان قوسا، قوسىمشا 35 كانالعا جوبالىق-سمەتالىق قۇجاتتار ازىرلەنىپ قويدى، - دەيدى باقىتجان ورازالىۇلى.
اتاپ وتكەنىمىزدەي، اۋدان اكىمى ايماقتاعى شەشىمىن كۇتكەن ماسەلەلەرگە دە كەڭىنەن توقتالدى. ولاردىڭ قاتارىندا تۇرعىن ءۇي ماسەلەسى دە بار. بۇگىنگى تاڭدا تۇرعىن ءۇي سالۋ ءۇشىن كەزەكتە تۇرعان 1216 ازاماتقا جەر تەلىمدەرى بەرىلدى. اتالعان جەر تەلىمدەرى شۋ قالاسى مەن تولە بي جانە العا اۋىلدىق وكرۋگتەرىنەن بەرىلگەنىن دە ايتا كەتكەن ءجون. اۋدانداعى ەلدى مەكەندەردى ساپالى اۋىز سۋمەن قامتاماسىز ەتۋ دە كۇن تارتىبىندەگى ماسەلەلەردىڭ قاتارىندا. قازىرگى كەزدە اۋدانداعى 35 ەلدى مەكەننىڭ 9-ى اۋىز سۋمەن قامتىلماي وتىر. وتكەن جىلى اتالعان 9 ەلدى مەكەننىڭ 6-ۋىن اۋىز سۋمەن قامتاماسىز ەتۋ ماقساتىندا مەردىگەرلەرى انىقتالىپ، قۇرىلىس جۇمىستارى باستالىپ كەتكەن. ناقتىراق ايتقاندا، ولاردىڭ قاتارىندا حالىق تىعىز ورنالاسقان كوكتوبە، اقتوبە، ەڭبەكشى، ساۋىتبەك، كوكقاينار اۋىلدارى مەن شۋ قالاسىنداعى قانت زاۋىتى مولتەك اۋدانى بار. بۇل نىساندار وتپەلى بولۋىنا بايلانىستى اعىمداعى جىلدىڭ قازان ايىندا جۇمىستار تولىعىمەن اياقتالماق. ناتيجەسىندە، 2025 جىلدىڭ سوڭىنا قاراي شۋ اۋدانىنداعى ەلدى مەكەندەر 100 پايىز تازا اۋىز سۋ جۇيەسىمەن قامتىلماق.
سونىمەن قاتار، جيىن بارىسىندا باقىتجان ورازالىۇلى جەرگىلىكتى تۇرعىنداردى تولعاندىرعان ساۋالدارعا جاۋاپ بەردى. قازىرگى كەزدە رەسپۋبليكالىق «مەركى-شۋ-بۋرىلبايتال» اۆتوجولىندا كۇردەلى جوندەۋ جۇمىستارىنىڭ جۇرگىزىلىپ جاتقانى بەلگىلى. وسىعان وراي، اتالعان كۇرە جولدىڭ شۋ وزەنىنەن وتەتىن «انداسباي» كوپىرىنە جوندەۋ جۇرگىزىلمەك. الايدا، وسى كوپىر ارقىلى اۋدان ورتالىعىنا قاتىنايتىن بەس اۋىلدىڭ تۇرعىندارى كوپىردىڭ ۋاقىتشا جابىلۋىنا نارازىلىقتارىن بىلدىرگەن. اتالمىش ماسەلە بويىنشا جەرگىلىكتى بيلىك وكىلدەرى نەگىزگى كوپىردىڭ قۇرىلىسى اياقتالعانشا شۋ وزەنىنەن وتەتىن ۋاقىتشا وتكەل سوعۋ جونىندە شەشىم قابىلداعان.
ال، ءبىلىم سالاسى بويىنشا بيىل 5 مەكتەپتى كۇردەلى جوندەۋدەن وتكىزۋ ءۇشىن جوبالىق-سمەتالىق قۇجاتتار ازىرلەنۋدە. سايكەسىنشە، كەلەسى جىلى 6 جاڭا ءبىلىم وشاعى، ەكى جاپسارلاس قۇرىلىس، 5 مەكتەپتە كۇردەلى جوندەۋ جۇمىستارى اتقارىلماق.
"ادىرنا" ۇلتتىق پورتالى
