Bıyl elimizde 7 mamyr - Otan qorǵaýshy jáne 9 mamyr - Jeńis kúni meıramyna oraı áskerı sherý ótpeıtin boldy, dep habarlaıdy "Adyrna" ulttyq portaly.
«Bıýdjet qarajatyn únemdeý maqsatynda jáne basqa da mindetterdi sheshý qajettigine baılanysty bıyl elimizde áskerı sherý ótpeıdi. Jalpy alǵanda qazirgi ýaqyttaǵy mańyzdy basymdyq - Qazaqstan Qarýly kúshteri bólimsheleriniń jaýyngerlik ázirligi men utqyrlyǵyn talap etiletin deńgeıde ustap turý», - delingen habarlamada.
Sondaı-aq, resmı aqparatta Qorǵanys mınıstrligi áskerı-patrıottyq is-sharalardy josparlap, ótkizip jatqany aıtylǵan.
«Atalǵan sharalar erekshe kózge túsken áskerı qyzmetshilerdi qurmetteý, soǵysta qaza tapqan qazaqstandyq jaýyngerlerdi eske alý jáne olardyń erligin buqaralyq aqparat quraldarynda jarııalaý maqsatyn kózdeıdi», - deıdi vedomstvodan.
7 jáne 9 mamyr merekelerine arnalǵan sharalar týraly aqparat jýyrda mınıstrliktiń resmı saıtynda jarııalanady.
