Almaty oblysy Qarasaı aýdanynyń prokýrory Bolat Nazarbaevty, Qarasaı aýdany ákiminiń apparatyn jáne taǵy birneshe memlekettik mekemeni sotqa berdi, dep habarlaıdy “Adyrna” ulttyq portaly Ulysmedia.kz saıtyna silteme jasap.
Sot qujattary jalpyǵa qoljetimdi. Olardan Qarasaı aýdanynyń burynǵy ákimi Bolatbek Qutpanov Bolat Nazarbaevpen birneshe zańsyz satyp alý-satý shartyna qol qoıǵany baıqalady.
Sóıtip, sheneýnik 2004 jyldyń 6 qyrkúıeginde eks-prezıdenttiń aǵasyna 22,0 gektar jer telimin satyp jibergen. Meken-jaıy: Almaty oblysy, Qarasaı aýdany, Qaskeleń qalasynyń soltústiginde.
2005 jyly 8 tamyzda Nazarbaev sol kezdegi ákimnen 71500 gektar jer telimin qaıtadan satyp alady. Meken-jaıy: Almaty oblysy, Qarasaı aýdany, Qaskeleń qalasynyń soltústiginde.
Memlekettik organdar Bolat Nazarbaevqa taǵy birneshe jer telimin bergen.
2004 jyldyń kókteminde «Qarasaı aýdanynyń jer qatynastary bólimi» memlekettik mekemesinen Qaskeleń qalasynyń soltústigindegi 24100 ga jerdi, sondaı-aq Almaty-Bishkek tas jolynyń boıyndaǵy 26300 ga jerdi jalǵa alǵan.
Nazarbaev 2015 jyly aýdandyq jer qatynastary bóliminen Qaskeleńnen soltústikke qaraı taǵy 24100 gektar, Almaty-Bishkek tas jolynyń boıyndaǵy 26300 gektar jerdi satyp alǵan.
2019 jyly «Qarasaı aýdanynyń jer qatynastary bólimi» MM Bolat Nazarbaevqa Qaskeleń, Almaty-Bishkek tas jolynyń boıyndaǵy 28000 gektar jerdi satyp jibergen.
Joǵaryda atalǵan mámilelerdiń barlyǵy sotpen jaramsyz dep tanyldy.
«Nazarbaev Bolat Ábishulynan memleket kirisine 12 075 teńge memlekettik baj óndirilsin», - delingen qujatta.
Eske salaıyq, 20 sáýirde «eski» Qazaqstandaǵy alkogol naryǵy eks-prezıdent Nursultan Nazarbaevtyń inisi Bolat Nazarbaevtyń qolynda ekeni belgili boldy. Al 17 sáýirde sot Bolat Nazarbaev «Barys» bazarynan aıyryldy.
