6 sáýirden bastap Ulytaý oblysynda «Taza Qazaqstan» respýblıkalyq ekologııalyq akııasy aıasynda birqatar is-sharalar ótýde, dep habarlaıdy "Adyrna" tilshisi.
Akııa aıasynda oblys turǵyndary jalpyoblystyq senbilikke shyǵyp, oǵan barlyǵy 437 eńbek ujymdarynan 6 myńnan astam adam qatysty. Senbilikke 110 arnaıy tehnıka jumyldyrylyp, 470 gektar aýmaq qoqystan tazartyldy. Barlyǵy 56 ruqsat etilmegen qoqys orny joıylyp, aýlalarǵa jańa qoqys konteınerleri ornatyldy.
Senbilik barysynda sonymen qatar, 965 aǵashtyń qýraǵan butaqtary kesilip, 85 túp tal otyrǵyzyldy.
Akııa aıasyndaǵy tazalyq jumystary jeksenbi kúni de jalǵasýda. Oblystyń qala, aýdandarynda qýraǵan aǵashtar kesilip, qardyń erýi saldarynan búlingen aýlalar men kópshilik oryndar, jol boıy qalypqa keltirilýde.
Esterińizge salsaq, «Taza Qazaqstan» ekologııalyq akııasy 6 sáýirde bastalyp, 4 mamyrǵa deıin jalǵasady. Akııa aıasynda tarıhı-mádenı eskertkishter mańynda, ardagerlerdiń úılerinde senbilikter ótkizip, jappaı aǵash otyrǵyzý josparlanǵan.
