Qasym-Jomart Toqaevtyń tóraǵalyǵymen VIII saılanǵan QR Parlamentiniń birinshi sessııasyna qatysty «Qazaqstandyq Qoǵamdyq damý ınstıtýty» Basqarma Tóraǵasynyń orynbasary Ásem Qaıdarova pikir bildirdi, dep habarlaıdy “Adyrna” ulttyq portaly.
"Bılikke kelgen jańa depýtattardy saıası júıe ózgerisiniń bastaýy dep ataı alamyz. Olardyń quramyna halyq senim artyp júrgen belgili tulǵalar, jýrnalıster, kásipkerler keldi. Depýtattardyń alǵa qoıǵan mindetterin qalaı atqaratynyn, jumysynyń nátıjesin aldaǵy ýaqytta kóretin bolamyz", dedi Ásem Qaıdarova.
Sonymen qatar, ol erekshe qajettilikteri bar azamattardyń da depýtat retinde qyzmet etetinin atap ótti.
"Saılanǵan depýtattar arasynda múmkindigi shekteýli jandar da bar. Olardyń bılikke kelýi qoǵamǵa oń áserin tıgizedi dep oılaımyn. Óıtkeni Batys memleketterinde múmkindigi shekteýli jandar eldiń tolyq múshesi retinde ómir súredi. Qoǵamdyq kóliktermen ózderi júrip, saýda ortalyqtaryna erkin baryp, saýda jasaı alady. Sondyqtan bizge de erekshe qajettilikteri bar azamattarǵa jaǵdaı jasaý kerek. Ol úshin bılik ókilderi naqty sheshimderdi qabyldaýy tıis. Mundaı jandardyń depýtattyqqa saılanýy múmkindigi shekteýli azamattardyń ózin qoǵamnyń teń múshesi retinde sezinýine, paıdaly zańdardyń qabyldanýyna yqpal etedi, dedi "Qazaqstandyq Qoǵamdyq damý ınstıtýty" Basqarma Tóraǵasynyń orynbasary.
Spıker búgingi sessııada birqatar máseleniń kóterilgendigin aıqyndaı tústi. Ol otyrysta memleket basshysynyń azyq-túlik qaýipsizdigin qamtamasyz etý, ınfraqurylymdy damytý, aýyldarǵa qatysty túrli mańyzdy máselelerdi kótergenin aıtty.
"Buryn zań jobasyn Májilis maquldap, Senat qabyldaıtyn. Májilis depýtattary halyqtyń ókili bolǵandyqtan, el aldyndaǵy jaýapkershiligi eki ese kúsheıedi. Zańdy Senat qabyldap júrse, endigi sońǵy sheshim Májiliste bolady. Sondyqtan depýtattar halyqpen tyǵyz qarym-qatynasta bola otyryp, olardyń máselelerin sheshýge barynsha atsalysýy tıis, dedi Ásem Qaıdarova.
Spıkerdiń sózinshe, endi depýtattar «depýtattyq saýalnamany» mınıstrlikterge, ákimdikterge kóptep joldaýy qajet. Olar óńirlerdegi ınfraqurylym máselesin kóterýi kerek. Sebebi ınfraqurylym damymaı, týrızm de damymaıdy.
