قاسىم-جومارت توقاەۆتىڭ توراعالىعىمەن VIII سايلانعان قر پارلامەنتىنىڭ ءبىرىنشى سەسسياسىنا قاتىستى «قازاقستاندىق قوعامدىق دامۋ ينستيتۋتى» باسقارما توراعاسىنىڭ ورىنباسارى اسەم قايداروۆا پىكىر ءبىلدىردى، دەپ حابارلايدى “ادىرنا” ۇلتتىق پورتالى.
"بيلىككە كەلگەن جاڭا دەپۋتاتتاردى ساياسي جۇيە وزگەرىسىنىڭ باستاۋى دەپ اتاي الامىز. ولاردىڭ قۇرامىنا حالىق سەنىم ارتىپ جۇرگەن بەلگىلى تۇلعالار، جۋرناليستەر، كاسىپكەرلەر كەلدى. دەپۋتاتتاردىڭ العا قويعان مىندەتتەرىن قالاي اتقاراتىنىن، جۇمىسىنىڭ ناتيجەسىن الداعى ۋاقىتتا كورەتىن بولامىز", دەدى اسەم قايداروۆا.
سونىمەن قاتار، ول ەرەكشە قاجەتتىلىكتەرى بار ازاماتتاردىڭ دا دەپۋتات رەتىندە قىزمەت ەتەتىنىن اتاپ ءوتتى.
"سايلانعان دەپۋتاتتار اراسىندا مۇمكىندىگى شەكتەۋلى جاندار دا بار. ولاردىڭ بيلىككە كەلۋى قوعامعا وڭ اسەرىن تيگىزەدى دەپ ويلايمىن. ويتكەنى باتىس مەملەكەتتەرىندە مۇمكىندىگى شەكتەۋلى جاندار ەلدىڭ تولىق مۇشەسى رەتىندە ءومىر سۇرەدى. قوعامدىق كولىكتەرمەن وزدەرى ءجۇرىپ، ساۋدا ورتالىقتارىنا ەركىن بارىپ، ساۋدا جاساي الادى. سوندىقتان بىزگە دە ەرەكشە قاجەتتىلىكتەرى بار ازاماتتارعا جاعداي جاساۋ كەرەك. ول ءۇشىن بيلىك وكىلدەرى ناقتى شەشىمدەردى قابىلداۋى ءتيىس. مۇنداي جانداردىڭ دەپۋتاتتىققا سايلانۋى مۇمكىندىگى شەكتەۋلى ازاماتتاردىڭ ءوزىن قوعامنىڭ تەڭ مۇشەسى رەتىندە سەزىنۋىنە، پايدالى زاڭداردىڭ قابىلدانۋىنا ىقپال ەتەدى، دەدى "قازاقستاندىق قوعامدىق دامۋ ينستيتۋتى" باسقارما توراعاسىنىڭ ورىنباسارى.
سپيكەر بۇگىنگى سەسسيادا بىرقاتار ماسەلەنىڭ كوتەرىلگەندىگىن ايقىنداي ءتۇستى. ول وتىرىستا مەملەكەت باسشىسىنىڭ ازىق-تۇلىك قاۋىپسىزدىگىن قامتاماسىز ەتۋ، ينفراقۇرىلىمدى دامىتۋ، اۋىلدارعا قاتىستى ءتۇرلى ماڭىزدى ماسەلەلەردى كوتەرگەنىن ايتتى.
"بۇرىن زاڭ جوباسىن ءماجىلىس ماقۇلداپ، سەنات قابىلدايتىن. ءماجىلىس دەپۋتاتتارى حالىقتىڭ وكىلى بولعاندىقتان، ەل الدىنداعى جاۋاپكەرشىلىگى ەكى ەسە كۇشەيەدى. زاڭدى سەنات قابىلداپ جۇرسە، ەندىگى سوڭعى شەشىم ماجىلىستە بولادى. سوندىقتان دەپۋتاتتار حالىقپەن تىعىز قارىم-قاتىناستا بولا وتىرىپ، ولاردىڭ ماسەلەلەرىن شەشۋگە بارىنشا اتسالىسۋى ءتيىس، دەدى اسەم قايداروۆا.
سپيكەردىڭ سوزىنشە، ەندى دەپۋتاتتار «دەپۋتاتتىق ساۋالنامانى» مينيسترلىكتەرگە، اكىمدىكتەرگە كوپتەپ جولداۋى قاجەت. ولار وڭىرلەردەگى ينفراقۇرىلىم ماسەلەسىن كوتەرۋى كەرەك. سەبەبى ينفراقۇرىلىم دامىماي، تۋريزم دە دامىمايدى.
