Naýryz aıynyń jıyrma biri men jıyrma úshinshi juldyzy aralyǵynda Túrkistan oblysyna qarasty Otyrar aýdanynda uıymdastyrylǵan respýblıkalyq fotobaıqaý aıaqtaldy.
Atalmysh fotobaıqaý Ulystyń uly kúni Naýryz merekesi qarsańynda, «Derekti foto» kýrsy aıasynda «Fotoóner» qoǵamdyq birlestigi, sonyń ishinde ál-Farabı atyndaǵy QazUÝ jýrnalıstıka fakýlteti men «National Geographic-Qazaqstan» jýrnalynyń jáne Otyrar aýdanynyń ákimi Sáken Sultanhanovtyń uıytqy bolýymen ótkizildi.
Uıymdastyrýshylardyń aıtýynsha «Derekti foto» kýrsynyń basty maqsaty elimizde qulashyn endi jaıyp kele jatqan fotoónerdi jalpaq jurtqa tanystyrý, osy salaǵa qyzyǵýshylyǵy bar jandardy qanattandyrý, qazaq fotoónerin álemdik deńgeıge kóterý bolyp tabylady. Fotobaıqaýdyń álemge ál-Farabıdeı oıshyldy syılaǵan Otyrarda ótýiniń ózi teginnen tegin emes. Bul jaıynda Almaty qalasynan kelgen «Aspan Production» grafıka dızaıneri, rejısser Tilek Rysbek te sóz etti.
– Ál- Farabı álem fılosofııasynda ózindik orny bar mańyzdy fıgýlardyń biri. Onyń Arıstoteldiń «Metafızıkasyn» aýdarýy álem fılosofııasyndaǵy eleýli oqıǵa. Otyrar ekspedıııasynda Otyrar qalasyndaǵy úlken bir aýqymdy keńistik ál-Farabıdiń týǵan jeri degen boljamdy aıqyndaı túsetin sekildi. Osyǵan deıin ony parsy ǵalymdary Aýǵanstan jerinde, Fárıabta týǵan dese, kóptegen zertteýshiler onyń Farab qalasynda ómirge kelgendigin aıtady. Negizi meniń baıqaǵanym, ál- Farabı atymen atalatyn ulttyq joǵary oqý orny, kóshe, mekemeler barshylyq. Iaǵnı biz onyń tek atyn ulyqtaýmen shektelip kelemiz. Al, osy saparymyz arqyly biz ál-Farabıdiń rýhanı álemine, bilimine saıahattadyq desek te bolady, - dedi ol.
Kıe qonyp, qut daryǵan Otyrarda ótken fotobaıqaýda Otyrar aýdany ákiminiń orynbasary Aıdos Qulmahanov jáne «Derekti foto» kýrsynyń jetekshisi Serik Muqyshuly, «Fotoóner» qoǵamdyq birlestiginiń tóraǵasy, Asylhan Ábdiraıymuly syndy óz isiniń mamandary tórelik etti.
«Derekti foto» kýrsyna qatysyp, irikteýden ótken qatysýshylar úsh kún boıy aýdan ortalyǵynda ótken Naýryz merekesin, odan bólek Arystan bab kesenesi, Otyrar qalashyǵy syndy tarıhı-mádenı oryndardy, Arys jaǵalaýy sııaqty kórikti jerlerdi, mýzeıler men eskertkishterdi kúni-túni ártúrli rakýrsta túrli tásildermen túsirip jarysty.
Fotobaıqaý nátıjesinde úshinshi orynǵa almatylyq Ernur Manaphan, Baqdáýlet Ábdýáli jáne Erqanat Amankel, ekinshi orynǵa almatylyq Ákbar Úrkinbaıuly men astanalyq Meıirbek Tajkýranov ıe boldy. Tuńǵysh «Derekti foto» kýrsy aıasynda uıymdastyrylyp, úsh kúnge sozylǵan fotobaıqaýda óskemendik Danagúl Ábdikárim jeńimpaz atandy. Júldegerlerge dıplomdar men aqshalaı syılyqtar tabystaldy.
Baıqaýǵa qatysýshylarda uıymdastyrýshylarǵa óz alǵystaryn aıtyp, sharanyń mańyzdylyǵyn túsindirdi.
Osy baıqaý aıasynda taǵy da nazar aýdararlyq jaıt – fotograftar týyndysyn ózara taldaıtyn «Syn saǵaty» ótkizildi. Bul fotoóner ókilderiniń sheberligin shyńdaýda kóp kezdese bermeıtin tájirıbe.
– Otyrar qalasynda keremet «Syn saǵaty» ótti. Bul biz úshin úlken múmkindik, keremet tájirıbe boldy. Basynda baıqaý dep aıtylǵanmen biz ózara buny tájirıbe almasý dep kórdik. Sebebi biz bul jerde bilmegenimizdi úırenip, bilgenimizben bólistik. Bul baıqaýdyń Otyrarda ótýiniń ózi oryndy sheshim bolǵandaı. Qaı kezeńdi almasaq ta Otyrar qalasy talaı tarıhı oqıǵanyń kýágeri. Uly Jibek jolynan ózge memlekettermen qalaı baılanys ornatsa, bul sharanyń osy jerde ótýi de qazaq fotoónerin álemdik deńgeıge baǵyttaýda, jol bastaǵandaı, - dep «Amanat» partııasynyń «Jastar rýhy» JQ fotografy Meıirbek Tajkýranov jyly lebizin bildirdi.
Nazerke Albertqyzy
