Qazaqstannyń birinshi raketkasy Elena Rybakına Indıan-Ýells WTA 1000 týrnıriniń chempıony atandy. Qazaqstandyq tennısshi fınalda álemniń 2-raketkasy, Belarýs ókili Arına Sobolenkomen kezdesti, dep habarlaıdy “Adyrna” ulttyq portaly.
Bir saǵat 20 mınýtqa sozylyp, tartysty órbigen birinshi partııada E.Rybakına taı-breıkte jeńisti julyp aldy – 7:6 (13:11).
Ol ekinshi sette de esesin jibermedi – 6:4.
Eki saǵattan astam ýaqytqa sozylǵan báseke barysynda Elena 7 eıs jasap, 10 breık-poınttyń úsheýin paıdalandy. A.Sobolenko 4 eıs, 2 breıkpen (6 breık-poınt) shekteldi.
Osylaısha, alǵash ret WTA 1000 jarysynyń jeńimpazy atanǵan E.Rybakına A.Sobolenkodan Aýstralııa ashyq chempıonatynyń fınalynda ketken eseni qaıtardy.
Sondaı-aq Elena Rybakına óz sporttyq jolynda alǵash ret álemdik reıtıngide jetinshi orynǵa kóteriledi.
