Almaty oblysy Amal merekesi – Kórisý kúnin keń aýqymda toılap jatyr. Oblys aýmaǵyndaǵy ár aýdan, ár qalanyń ortalyq alańdary án men kúıge bólenýde. Búgin sondaı ıgi sharanyń bir parasy Eńbekshiqazaq aýdanynyń ortalyǵy Esik qalasynda da ótti.
Alataýdyń baýraıyndaǵy Esik qalasy ejelden-aq saq-úısin babalarymyz qonys teýip, hanzadasyn altyn kıimmen kebindegen qasterli óńir. Sol qasıetti mekende Naýryz meıramynyń bastaýy sanalatyn Kórisý kúniniń shymyldyǵy teatrlandyrylǵan qoıylymmen ashyldy. Tumanbaı Moldaǵalıev atyndaǵy Mádenıet úıiniń aldy toı-dýmanǵa bólenip, oblys turǵyndary qazaqy jańa jyldyń lebin sezindi.
Eski jyldan jańa jylǵa aman-esen jetken, kóne renishi bar eki jigittiń bir-birine keshirim berýinen bastalǵan qoıylym eki aýyldyń tatýlasýyna ulasty. Sodan keıin alańdaǵy qoıylym qoıyp jatqan Almaty oblysyna qarasty halyq teatrlarynyń akterlary men óner salasynyń mamandarynan qurylǵan eki júzden astam adam qalyń kórermendermen kórisip, Esik qalasynyń turǵyndarymen aralasyp ketti.
Teatrlandyrylǵan qoıylymdy qoıýshylardyń bul rejısserlik sheshimi akterlerdi bylaı qoıyp, qarapaıym halyqtyń da «Kórisý kúniniń» mánin tereń uǵynýǵa jol salyp berdi.
Kórermender men akterlardyń bir-birimen shynaıy kórisip, qushaqtasyp jatqanyna qarap, meıirim men shattyqqa toly Amal meıramynyń búkilhalyqtyq merekege aınalyp úlgergenin ańǵarýǵa bolady.
Teatrlandyrylǵan qoıylym sońy oblys ónerpazdarynyń konertine ulasty.
Bıshiler myń burala bı bıledi.
Ájeler shashý shashty.
Sondaı-aq, oblystyń Mádenıet basqarmasy Esik qalasynyń turǵyndaryna arnap arnaıy kórme de uıymdastyrǵan. Ol kórmege oblys aýmaǵyndaǵy mýzeılerdiń qundy jádigerleri qoıylǵan. Esik qalasynyń turǵyndary tek bir-birimen ǵana emes, qazaqtyń kóne tarıhymen de «kórisýge» múmkindik aldy.
Kórmege zergerler qazaqtyń ulttyq áshekeı buıymdary men er-turman, at-ábzelderin arnaıy ákelipti. Saýsaǵynan óner tamǵan ustalarǵa jasaǵan buıymdaryn saýdalaýǵa da múmkindik berilgen. Sondaı-aq, sýret, kitap kórmeleriniń de kórigi qyzyp jatty.
Sharaǵa qazaqtyń ulttyq kıimin kıgen halyq óte kóp jınaldy. Olardyń arasynda tazy jetelegen myna Altyn bala da bar.
Qyran búrkitpen birge sýretke túsken sulý qyzdar da az bolmady.
Esik qalasynda ótken Kórisý kúni qazaq ulty men ózge dıasporalar arasyndaǵy dostyq qarym-qatynastyń da nyǵaıa túsýine bastamashy bolary sózsiz.
Sebebi, Almaty oblysyndaǵy Amal merekesi tek qazaqtyń ǵana emes, oblystaǵy barsha dıaspora ókilderiniń ortaq meıramy retinde atalyp ótti.
Naýryz - jańarý meıramy. Sol meıramnyń Amal merekesinen bastalady. Halyqtyń bir-biriniń úıine qonaqqa baryp, ókpe-renishterin umytyp, dushpanyna da jaqsylyq tileıtin mundaı mereke keńpeıil qazaq halqynyń tabıǵatyna ǵana tán dúnıe sekildi. Esikte ótken án men kúıge tola «Kórisý kúni» meıramy bizge sony uqtyrdy.
Túıin
Almaty oblystyq Mádenıet basqarmasy mundaı aýqymdy sharalardy ár aýdan, ár qalada ótkizýdi qolǵa alǵan. Máselen, buǵan deıin mundaı sharalar Uıǵyr, Balqash, Raıymbek aýdandarynda uıymdastyrylǵan. Mádenıet basqarmasy oblystyq dárgeıdegi sharany aýdandarda ótkizý arqyly ortalyq pen shalǵaıdaǵy aýyldardyń arasyndaǵy mádenı baılanystyń nyǵaıýyna áser etpek. Shalǵaıdaǵy aýdandardyń mádenı ómirine serpin beretin bul bastama aldaǵy ýaqytta jalǵasyn tappaq.
Óz tilshimiz
"Adyrna" ulttyq portaly
