Almaty turǵyny Sársen Tólentaev sotynyń qazaq tilinde ótýin talap etip, ótinish jarııalaǵan. Alaıda, onyń ótinishin sot qanaǵattandyrǵanymen, orandamaǵan kórinedi. Bul týraly Sársen Tólentaev "Adyrna" ulttyq portalyna aıtyp berdi.
"Qazirgi tańda Almaty garnızonynyń sýdıasy Rahmetova Zarına hanym maǵan qatysty qylmystyq isti qaraýda.
Sot otyrysy bastalǵan a.j. 6 qańtary kúni men sottalýshy retinde sot otyrysy qazaq tilinde júrgizilsin degen ótinish jarııalaǵan bolatynmyn jáne osy ótinishimdi sot qanaǵattandyrǵan bolatyn, osy suraqqa qatysty sottyń qaýlysyn qosa berip otyrmyn.
Sodan beri 24 qańtar men 2 aqpanda eki sot otyrysy ótkizildi. Sol sot otyrystaryna sottyń shaqyrýymen aýdarmashy retinde Áýe qorǵanys kúshteri qolbasshysynyń ofısinde aýdarmashy bolyp jumys jasaıtyn Qonaeva Quralaı qatystyrylǵan bolatyn. Qorǵaýshy taraptyń suraqtaryna aýdarmashy Qonaeva Qazaq memlekettiák qyzdar ınstıtýtyn qazaq tilin damytý mamandyǵy boıynsha aıaqtaǵanyn aıtqan bolatyn, ıaǵnı ol kisi mamandyǵy boıynsha kásibı aýdarmashy emes bolyp shyqty.
Sot otyrysynda Quralaı qaryndasym zań salasyna, qylmystyq proeske qatysty suraqtar boıynsha jáne sotta sóılegen taraptardyń ýájderine tolyqqandy aýdarma jasaýǵa biliktiligi jetispeıtinin ózi de moıyndady. Osyǵan qatysty sýdıa Rahmetova atalǵan aýdarmashy ári qaraı sotqa qatystyrylmaıdy degen sheshim qabyldady", dedi Sársen Tólentaev.
Sondaı-aq, sýdıa jábilenýshi taraptyń sot orys tilinde ótsin degen ótinishin qanaǵattandyrǵan. Oǵan sebep, sýdıa Rahmetova qazaq tiline shorqaq eken.
“Aýdarmashy túgil sýdıa Rahmetovanyń ózi qazaq tiline shorqaq ekenin aıqyn kórdik, onyń dáleli retinde sot otyrysynyń aýdıo-beınejazbalaryn usyna alamyn. 24.01 men 02.02 kúndergi sot otyrystarynda sýdıa Rahmetova qazaq tilin bilmegendige qatysty ábden tıtyqtady jáne budan qalaı qutylamyn degen aıdarmen 13.02.23j. jábirleshiniń sot otyrysy orys tilinde jalǵastyrylsyn degen ótinishin qanaǵattandyryp, osy jaıly sot qaýlysyn shyǵardy, ol qaýlyny da qosa berip otyrmyn.
Osylaısha sýdıa Rahmetova Qazaqstan Respýblıkasynyń Atazańy men til týraly zańyn pysqyrmaı otyr desem artyq aıtqan bolmaspyn. Bundaı sýdıaǵa ne deýge bolady? Sýdıalardyń qazaq tilin bilýi zań talaby emes pe?
Osyǵan qatysty BAQ-ryn a.j. 1 naýryzy kúni saǵat 10-00-ǵa belgilengen sot otyrysyna kelip qatysýǵa shaqyramanyn. Kelińizder! Sot ashyq. Jańa Qazaqstannyń soty qalaı ótetinin kórińizder!
Qazaqstan halqyna arnalǵan Joldaýynda Prezıdentimiz: «Ata Zań boıynsha Qazaqstanda bir ǵana memlekettik til bar. Bul – qazaq tili» dep edi ǵoı, osyny sýdıalar qalaı oryndap jatqanyn estińizder! Buǵan qosa – ishterińizde aýdarmashy bolýǵa bilimi men biliktiligi jetkilikti adamdar bolsa maǵan aýdarmashy qyzmetin kórsetýge atsalysyńyzdarshy, ókinishke oraı sot shaqyrǵan aýdarmashylarǵa senim az bolyp tur", dep kúıindi Sársen Tólentaev.
