«AMANAT» partııasynyń Respýblıkalyq saılaýaldy shtaby óz jumysyn bastady. Erlan Qoshanov tikeleı efırde «AMANAT» partııasynyń «Halyqpen birge!» dep atalatyn Saılaýaldy baǵdarlamasyn jarııalady.
Is-sharaǵa partııalyq tizimge engen kandıdattar jáne partııanyń atynan Májiliske usynylǵan birmandatty úmitkerler, shtab músheleri, partııanyń «Jastar Rýhy» jastar qanatynyń belsendileri, partııa jaqtastary qatysty.
«Bizdiń baǵdarlama – qoǵamda ábden qaınap, pisip-jetilgen problemalardy sheshýdiń naqty joly, naqty jospary. Ótken jyldyń ózinde partııa óńirlerde, aýyl-aımaqta myńdaǵan kezdesý ótkizip, turǵyndardan 200 myńnan astam usynys-pikir jınaǵan bolatyn. Halyqty tolǵandyrǵan máselelerdi muqııat taldap, júıelendire kele 10 negizgi baǵyttan turatyn qujatty ázirledik. Odan árbir otandasymyz ózi úshin ózekti máselelerdiń jaýabyn taba alady», – dedi partııa Tóraǵasy.
Ol ár oblystyń, qalanyń demografııalyq, áleýmettik jáne ekonomıkalyq ereksheligin eskere otyryp, 20 aımaqtyq saılaýaldy baǵdarlama ázirlengenin atap ótti. Sonymen qatar, birmandatty okrýgter boıynsha saılaýǵa qatysatyn partııanyń árbir kandıdaty óziniń saılaýaldy baǵdarlamasyn ázirledi.
«Biz bergen ýádemizde turyp, kózdegen maqsatymyzdyń barlyǵyna qol jetkizemiz. Biz úshin memleket pen halyqtyń múddesinen asqan esh nárse joq. Partııalyq frakııa arqyly biz barlyq qajetti zańdardyń qabyldanýyn qamtamasyz etemiz. Úkimetti qurý isine belsendi atsalysamyz. Biz halqymyzdyń ómirin jaqsartamyz! Otanymyzdyń erteńine beı-jaı qaramaıtyn barlyq qazaqstandyqty aldaǵy saılaýǵa belsene qatysyp, «AMANAT» partııasyna daýys berýge shaqyramyz. Biz árdaıym ádilettiń, halyqtyń jaǵyndamyz!», – dedi Erlan Qoshanov.
Aıta keteıik, shtab quramyna partııanyń 486 belsendi jaqtasy kirdi. Óńirlik jáne aýmaqtyq 226 saılaýaldy shtabqa 7,5 myńǵa jýyq adam jumyldyrylady. Saılaýshylarmen kezdesý kestesi daıyndaldy. Bul jumysqa kandıdattardyń 27 myńnan astam senimdi ókili atsalysady.
Respýblıkalyq jáne 20 óńirlik saılaýaldy baǵdarlamanyń tolyq mátinimen, sondaı-aq «AMANAT» partııasynan depýtattyqqa usynylǵan kandıdattardyń tizimimen jaqynda ınternetten tanysýǵa bolady.
Daıyndaǵan: "AMANAT" partııasynyń baspasóz qyzmeti
Tapsyrys berýshi: M.J. Ospanov
“AMANAT” partııasynyń saılaý qory qarajaty esebinen tólendi.
