Qasym-Jomart Toqaev sezd delegattaryna memleket pen qoǵamdy túbegeıli jańartý úderisi bastalǵanyn aıtty. Prezıdenttiń pikirinshe, «AMANAT» osy júıeli ózgeristerge belsene atsalysyp keledi. Sonymen qatar partııanyń qolǵa alynǵan reformalarǵa jan-jaqty qoldaý kórsetip, «halyq únine qulaq asatyn memleket» tujyrymdamasyn tıimdi júzege asyrýǵa qosyp jatqan úlesine toqtaldy.
– «AMANAT» áleýmettik ádildik qaǵıdatyn ornyqtyrýǵa árdaıym basa mán beredi. Memlekettilikti nyǵaıtý jáne el birligin bekemdeý – uıymnyń aıryqsha mıssııasynyń biri. Ótken sezde partııaǵa rebrendıng jasaý qolǵa alyndy. Sondaı-aq, ony ınstıtýıonaldyq turǵydan jańartý jumysy bastaldy. Partııa bul mindetterdi oryndaýǵa dereý kirisip ketti. Naqty nátıje bar, ózgeristerdi qazirdiń ózinde kórip otyrmyz. Osy qarqyndy báseńdetpeı, jumysty odan ári jalǵastyrý kerek, – dedi Memleket basshysy.
Prezıdent naýryz aıynyń ortasynda Qazaqstan halqyna arnaǵan Joldaýynda saıası reformalardyń aýqymdy baǵdarlamasyn usynǵanyn eske saldy. Sonymen qatar birden Konstıtýııaǵa engiziletin ózgerister men tolyqtyrýlardyń jobasyn daıyndaý jóninde aýqymdy jumys bastalǵanyn, onsyz josparlanǵan saıası reformalardy tıimdi júzege asyrý múmkin emes ekenin atap ótti.
– Konstıtýııalyq reformanyń maqsaty – elimizdi saıası turǵydan odan ári jan-jaqty jańǵyrtýdyń berik irgetasyn qalaý. Ótken aptada Konstıtýııalyq keńeske túzetýler jobasy joldandy. Onyń qabyldanýy memlekettik ınstıtýttardy qurýdyń jáne qyzmetiniń múlde jańa úlgisin – Jańa Qazaqstandy qurýǵa múmkindik beredi. Azamattar tarapynan: «Jańa Qazaqstan degenimiz ne?», - degen saýal jıi qoıylyp júr. Meniń oıymsha, bul suraqqa qysqa da nusqa jaýap berýge bolady. Jańa Qazaqstan degenimiz – shyn máninde Ádiletti Qazaqstan. Azamattarǵa áleýmettik ádildik jetispeıtinin moıyndaıyqshy. Qarapaıym halyqtyń múddesi únemi elene bermeıdi, keıde, tipti ádiletsizdik memlekettik apparat ókilderi tarapynan da jasalyp jatady. Azamattardyń memlekettik mekemelerge senimsizdigi osydan týyndaıdy. Sondyqtan «AMANAT» partııasynyń aldynda osy olqylyqtardyń ornyn toltyrý mindeti tur. Azamattyq qoǵam men bılik arasyndaǵy dáneker bolý úshin sizder halyq ókilderimen etene jumys isteýlerińiz kerek, – dedi Qasym-Jomart Toqaev.
Sonymen qatar Konstıtýııaǵa engizilgen ózgerister men tolyqtyrýlar eldiń búkil saıası arhıtektýrasyn keshendi túrde qaıta qaraýǵa, bılik tarmaqtary arasyndaǵy tejeý men tepe-teńdiktiń neǵurlym teńgerimdi júıesin qurýǵa baǵyttalǵanyn aıtty. Prezıdenttiń pikirinshe, biz sýperprezıdenttik basqarý túrinen túbegeıli bas tartamyz, Parlament pen máslıhattardyń ókilettigin kúsheıtemiz. Partııalyq-saıası júıeni jańǵyrtý – basym baǵyttyń biri.
Memleket basshysy partııalar men saılaý týraly zańnamalardy lıberalızaııalaý qoǵamnyń rólin kúsheıtedi. Bul – bıliktiń barlyq deńgeıinde qabyldanatyn sheshimderine qatysty. Prezıdenttiń paıymynsha, azamattardyń daýysy úshin báseke kúsheıip, saıası úderisterdiń qarqyny men mazmuny ózgeredi.
– Jalpy alǵanda, partııalyq alańda seń qozǵalǵanyn kórip otyrmyz. «Adal» partııasynyń «AMANAT» partııasymen birigý jónindegi bastamasy – bastalǵan ózgeristerdiń jarqyn kórinisi. «Adal» partııasynyń jetekshileri men múshelerine osy mańyzdy sheshimderi úshin rızashylyǵymdy bildiremin. Jańa Qazaqstandy quramyz desek, elge janashyr qoǵamdyq-saıası kúshterdiń bári jumylýy kerek. Bul rette, partııalardyń ózara til tabysyp, saıası júıeni damytýy asa mańyzdy. Sondyqtan, «Adal» partııasynyń bastamasyn qoldap, onymen birikken jón dep sanaımyn. «Adal» – óz jaqtastary bar, qalyptasqan partııa. Saıası báseke artyp kele jatqan qazirgi kezeńde munyń aıryqsha máni zor, – dedi Qasym-Jomart Toqaev.
Jıynda Memleket basshysy jaýapty ári asa mańyzdy kezeńge qadam basqanymyzǵa toqtaldy. Prezıdenttiń aıtýynsha, konstıtýııalyq reforma – Táýelsizdik tarıhyndaǵy jańa beles. Munyń bári ýaqyt talabynan jáne qoǵam suranysynan týyndap otyr.
– Men buǵan deıin partııa tóraǵasy laýazymynan bosap, uıym qatarynan shyǵatynymdy aıttym. Osy uıǵarymdy júzege asyratyn kez keldi. Búginnen bastap «AMANAT» partııasynyń tóraǵasy retinde ókilettigimdi toqtatyp, partııadan shyǵý týraly sheshim qabyldadym. Bul qadamnyń sımvoldyq máni bar. Osy oraıda, Prezıdent saılaýynda maǵan senim artyp, qoldaǵandaryńyz úshin barshańyzǵa alǵysymdy aıtamyn. Sondaı-aq, jaýapty sátte partııa tizginin senip tapsyrǵandaryńyz úshin rızashylyǵymdy bildiremin. Biz birlesip, kóp jumys atqardyq. Degenmen, ýaqyt bir orynda turmaıdy. Qazir talaı nárse ózgerýde. Aldymyzda aýqymdy mindetter bar. Búginde elimizdegi barlyq salany túbegeıli monopolııadan aryltý asa mańyzdy. Osy úderisten saıası júıe de syrt qalmaýy kerek. Memleket basshysy eshbir partııaǵa basymdyq bermegeni jón, ıaǵnı saıası turǵydan beıtarap bolýy qajet. Bul – meniń aıqyn ustanymym, – dedi Qasym-Jomart Toqaev.
Prezıdenttiń pikirinshe, mundaı qaǵıda saılaýǵa qatysatyn barlyq kúshterge teń múmkindik týǵyzady. Saıası júıede ádildiktiń ornaýyna jol ashady. Partııa atqarýshy bılikke táýeldi bolmasa, oǵan halyqtyń senimi nyǵaıyp, bedeli artady.
– Qazir uıym Májiliste jáne máslıhattarda edáýir basymdyqqa ıe bolyp otyr. Sondyqtan Úkimet pen ákimdikterdiń jumysyna qatań baqylaý jasaı alady. Prezıdent partııa qatarynan shyqqanymen, uıymnyń strategııalyq baǵdary ózgermeıdi dep oılaımyn. «AMANAT» elimizdiń saıası ómirinde erekshe orny bar uıym retinde qala beretini anyq. Saıasattaǵy sabaqtastyq saqtalyp, partııa el ıgiligi úshin jasap jatqan jumystaryn jalǵastyra beredi, – dedi Memleket basshysy.
Qasym-Jomart Toqaev partııanyń tóraǵasy laýazymyna Parlament Májilisiniń tóraǵasy Erlan Qoshanovty usynyp, oǵan uıymdastyrý qabileti joǵary, tájirıbeli ári bilikti azamat dep baǵa berdi.
Sezd delegattary Prezıdenttiń usynysyn qoldap, Erlan Qoshanovtyń kandıdatýrasyna biraýyzdan daýys berdi.
