Qyzaǵash
Qyzaǵash... qyraý syrǵaly...
Qolynda – kúmis bilezik.
Mystan-jel osyp tyrnaǵy,
Janyńdy tur ma muń ezip?!
Shashbaýyń – sary altynnan,
Boıyńnan tapqan jarasym.
Aınymaı osy qalpyńnan,
Aqyldy arbap alasyń.
Qaıtqan qus qosh dep shyrqasa,
Bıleısiń nege yrǵalyp?
Bólmeıdi kóńil jurt asa,
Otyrmyn oıǵa shyrmalyp.
Kún súıgen mańdaı, tóbeńnen,
Bulttar da kóshti josylyp.
Tamyryń soǵar tereńnen,
Júrekpen birge qosylyp.
Al, Janym -Kúzde muzdaǵysh,
Kóktemge álden zaryǵam.
Qarasha-kúzgi qyzǵanysh
Aıazben tándi qaryǵan.
Abadan
Táńir-Iıem – Taý.
Aqpan...
Nur býsanta, tań atqan.
Sıraǵymda – jaý-qaqpan.
Aıǵa qaraı iz salǵan
abadan em, aýlaqtan.
Arly Túzin Arqanyń
Aqylyma artamyn.
Tor-qamaqta toryǵyp,
Oı ishinde jortamyn.
Apanym-aı, kıelim,
Endi, saǵan iıe kim?!
Kóp ıtterdiń,
Ulyp-aq,,
Syrqyratqam súıegin.
Jol ústinde azyǵym,
Alty qarys azýym.
Mańdaıyma mórlegen
Taǵdyrymnyń jazýyn!
Qyrkúıek
Kórkińe kerim úzdigip,
Kóz almaı, uzaq qaradym.
Kúrsine bersin kúzgi bult,
Jarqyn ǵoı seniń qabaǵyń!
Qyrkúıek aıy jańbyrly,
Jáýdirkóz Aspan jylaıdy.
Ekeýmiz – jumbaq taǵdyrdy
Súıemiz ... jáne bul aıdy.
Sarǵaıǵan buryn, asyǵa...
Japyraq – názik saǵynysh.
Jaqyndaý kelshi qasyma,
Sharpysyń demim, jalyn ish.
Sezim men sezim úılesip,
Sóz demi gúldi jylytqan.
Kúnim-aý, ǵajap kúı keship,
Jalǵyzdyq jaıly umytqam.
Syr aıtsam tyńdar qustar,
Baq...
Aǵashtyń tamǵan jasy – nur.
Ózińe sheksiz qushtar shaq,
Ómir ǵoı shirkin, ǵashyǵym!
Raýshan gúl.
Saıabaqta raýshan gúli tym qalyń.
Kúlteleri – qyzerin.
Ekeýmizge – tylsymy kóp tún málim.
Jel biledi úzerin.
Qushaǵyńa gúl úıeıin bir-birlep,
Bilingende tún demi.
Sál jymısań,
Júregimde jyr búrlep,
jandúnıem gúldedi.
Saýyq-saıran qustarda da erekshe!
Qosylamyn... ushamyn...
Jamalyńnan erkelegen jel ópse,
Qyzǵanyshty qushamyn!
Jaýtańdaısyń aınalańa nelikten,
Moıyltekti Monshaǵym?!..
Dýaladyń aq dıdarly kórikpen.
Eliktirdi bal shaǵyń.
Raýshan-gúldiń qaýyzyna tamyzdyń,
Janaryńnan jyly nur.
Mine, osy – shyn maxabbat, naǵyz muń,
Muńlyqtardyń tili – bir.
* * *
Ózennen sál ǵana tysqary,
Tam úı tur, ańǵarda.
Mańaıy – peıishtiń qustary.
Órip júr ańdar da.
Bulbuldar shyrqaǵan sylqym án
tátti syr shertedi.
Tam úıde bir qyz bar!...
Syrtynan,
kúı keshtim ertegi!
Bir kezde,
Iesi aýlaǵa,
Shyqty da, shirendi!
Kún sýyp ketkendeı zamatta.
Aspan da túnerdi!
Sálden soń, sulý qyz shyqty úıden!..
Kún shaıdaı ashyldy!
Búldirgen erinin shyq súıgen!
Janary jasyndy!
Suqtandym.
Oıanyp qumarym.
Kóńil de gúldedi.
Ómirdiń mazdatty shyraǵyn
jymııa kúlgeni!
Tam úıge, taıaýǵa batylym
jetpedi nelikten?!
Adasyp qaldy ma aqylym?..
Júrek pe jelikken?!..
Aqyry shydamym taýsyldy,
Óńim be, túsim be?!
Júregim qozǵaldy taý syndy,
keýdemniń ishinde!
Tereze tusynan tań kúlip,
Kún súıdi kóktemshe.
Tús kórip jatsam ǵoı máńgilik,
ómirim ótkenshe...
* * *
Kóshe toly – kólik shýy, mas áni.
Tyńdaımyn da, muń qusham.
Kir asfaltqa óli sáýle shashady,
Jarǵanatkóz túngi sham.
Al, kafege kire qalsam ireńsiz,
Kúlkiler de daraqy.
Shashyn jaıyp, shyńǵyrady kileń qyz...
Azaptaıdy-aý Ar oty.
Jertólede kezbeler kóp, búrisken,
Áıel-erkek aralas.
Bult keıpinde kúrsinedi Tún ishten.
Qulazıdy kári aǵash.
Qańǵybas ıt qorǵap soqyr kúshigin,
Ses qylady úrgendi.
Qara kóńlimdi qur ıiskelep mysyq-ún,
Tyrmalaıdy irgemdi.
Úmit syndy – úılerdiń de jaryǵy,
Alma-kezek sónetin,
Qala degen – qorǵansyzdar qabiri,
Amalsyzdan óletin.
Kartaqumar joldastarǵa jolyǵyp...
Ýaqyttan da utyldym.
Ýa, jaryq Kún, seni qatty saǵynyp,
Kúbirleıdi kúpir-Tún...
Z1-jeltoqsan.
Qala búgin qaıyrymdy tym eren,
Itterge de qańǵybas.
Keshe ǵana jertólege túnegen,
Án salyp júr áńgi mas.
Kezikpedi jolynan esh tanysy.
Muńdastary – terekter...
Qarǵanyń da qarqyldaǵan daýysy
Qajýyna sebepker.
Jeń ishinen qol shyǵaryp qoǵamǵa...
Qaıǵy sóli – jutqany.
Qandaı baqyt kerek eken adamǵa?
Men de, sirá uqpadym...
Otshashýlar aınalsa da jaqutqa,
Ózgermes-aý qalyby.
Qazynasyn urlap alǵan ýaqytqa
Myń bir márte nalydy.
Syr aıtty ma, súıendi me shyrshaǵa?
Yzalana silkidi?
Shylym shege, sabyr saqtap tursa da,
Saý adamǵa kúlkili.
Kóshe shamy syǵyraıyp qaraıdy.
Toqtap qalǵan kóp kólik.
Dúnıeni bir kúndik dep sanaıdy,
Álgi kisi kektenip.
Qaıran ómir.
Soqyr qoǵam.
Qala.
Tún.
Oı-hoı, taǵdyr, kúrmelgen!..
Ajaldan da arashalap alatyn,
Jaryq tústi irgeńnen!..
– Jańa jylyńyzben !
Syrlastyrmaı, syrtymyzdan kólgirsip,
Sózimizdi bóle berdi jel qyrsyq.
Júregińnen xabar berip tur, mine,
Janaryńda jalt-jult etken móldir shyq.
Bizdi kórip shyqty, sirá, bult esi.
Sóne qaldy jaryq Aıdyń biltesi.
Kóziń ottaı!
Sóziń shoqtaı!..
Eriniń –
– qyzyl gúldiń úlbiregen kúltesi.
Jarqyldadyq qarańǵyǵa qamyqpaı,
Saǵynyppyz kópten beri jolyqpaı.
O, ǵashyǵym, keýip ketip kenezem,
Jupar juttym tamaǵyńnan mamyqtaı.
Kóńilińmen – kóktem tili úndesken.
Shashyń – anaý, qara maqpal tún kóshken.
Bir-aq sátte
Bal-baqytqa kenelttiń,
O, darıǵa, bundaı sezim kim keshken?!.
JANNYŃ TÚNGI TYLSYMY
Aıǵa laqtyryp shylbyr ushyn,
Aıdalada tún qattym.
... úkidaýys úńgir ishin
Úr qyzyna tyńdattym!
Ol sulýdyń tósenishin
Saldym balǵyn arshadan.
Sezim shoǵyn kóseý úshin,
Ertekti eren ańsaǵam!..
Oıymdaǵy ottyń kúshin
Sanadan tys laýlattym!..
Kóńil úshin –
Shegirte únin
Alaqanyma aýnattym!
Maıyn da iship tasbulaqtyń,
Martý qyzyn qushyp em!..
Qara jonnan qasqyr attym,
Qara sózdiń kúshimen!
Jyndar ǵashyq bálkim maǵan?..
Jyrdan asqan bar ma din?..
Japalaq kózimen jarqyldaǵan,
Jylan dátin arbadym!
Sońyna erdim shubar laqtyń!..
At jalynan shoq úrlep!..
Bult ishinde bulan baqtym!
Qulan kózi – shegirkók!..
Quzdarmen de qaýqyldastym.
Elirdim jel eserge!
Juldyzdarmen ańqyldastym,
Ózge álemge kósherge!..
Adastyrdy bir muń sary!..
Qaıda boldym?!..
Ań-tańmyn!..
Qulanıek qulqunsári...
Qııalymdy qańtardym!
