Aǵymdaǵy jyldyń 14 aqpanynda "Adal saılaý úshin" shtab músheleriniń Qazaqstan Respýblıkasy Parlamenti Májilisi men máslıhattary depýtattarynyń aldaǵy saılaý naýqany kezeńindegi ahýaldy baǵalaý nátıjeleri týraly kópshilikke habarlaý maqsatynda "Qazaqstan zańgerler odaǵy" Respýblıkalyq qoǵamdyq birlestiginiń keńsesinde BAQ úshin brıfıng ótti.
Shtab basshysy - Serik Aqylbaı kezekten tys saılaýdy daıyndaý jáne ótkizý jónindegi negizgi is-sharalardyń Kúntizbelik josparyna qysqasha toqtaldy. Máselen, 2023 jylǵy 18 aqpanda saǵat 18:00-de kandıdattar men partııalyq tizimderdi tirkeý aıaqtalady.
Depýtattyqqa kandıdat eń aldymen saılaý quqyǵyna ıe bolýy kerek. Sot áreketke qabiletsiz dep tanyǵan, sondaı-aq sot úkimi boıynsha bas bostandyǵynan aıyrý oryndaryndaǵy azamattardyń saılanýǵa quqyǵy joq. Parlament Májilisiniń depýtattyǵyna kandıdat onyń aýmaǵynda sońǵy 10 jylda turaqty turatyn, 25 jasqa tolǵan Qazaqstan Respýblıkasynyń azamaty bola alady.
S.Aqylbaı júrgizilgen monıtorıng nátıjeleri boıynsha okrýgtik saılaý komıssııasyna kandıdattyń Qazaqstan aýmaǵynda sońǵy 10 jyl boıy turaqty turý bóliginde kandıdattyń sáıkestigin anyqtaý qıynǵa soqqan jaǵdaı oryn alǵanyn, sebebi bul derekter kóshi-qon qyzmetiniń derekteri boıynsha rastalmaǵanyn atap ótti.
Zańnama boıynsha saılaý komıssııalary ókiletti organdardan alynǵan málimetterdi qaıta tekserýge quqyly emes. Quqyqtyq óriste turaqty turýdyń zańdy faktisin rastaý jáne anyqtaý tek sot tártibimen múmkin bolady.
Sot sheshiminiń negizinde okrýgtik saılaý komıssııasy óz sheshimin qaıta qarap, kandıdattyń Parlament Májilisiniń depýtattyǵyna kandıdattarǵa qoıylatyn talaptarǵa sáıkestigin anyqtady.
Sondaı-aq, Ábdikárim Aqjanov partııalyq tizimder boıynsha da, bir mandatty okrýgter boıynsha da depýtattyqqa kandıdattar zań erejelerin basshylyqqa alýǵa mindetti ekenin, óıtkeni depýtattar zań shyǵarý jáne memlekettik sheshimder qabyldaý salasynda jaýapkershilik júktemesin kóteretinin atap ótti.
Dýman Jampeıisov saılaý zańnamasynyń yqtımal buzýshylyqtardyń túrlerin, onyń ishinde úgit-nasıhat kezeńiniń bastalýyna deıin úgit materıaldaryn ornalastyrý, saılaý kúni jáne onyń aldyndaǵy kúni úgit materıaldaryn ornalastyrý jáne t. b. týraly habardar etti.
Qorytyndylaı kele Serik Aqylbaı depýtattyqqa kandıdattar men partııalardy saılaý naýqanyn Qazaqstan Respýblıkasynyń qoldanystaǵy zańnamasy sheńberinde júrgizýge shaqyrdy.
Brıfıng sońynda qatysýshylar BAQ suraqtaryna jaýap berdi.
Shtabtyń baspasóz qyzmeti
"Adyrna" ulttyq portaly
