Búgin QR Ortalyq saılaý komıssııasyna «AMANAT» partııasynan QR Parlamenti Májilisi depýtattarynyń saılaýyna kandıdattardy usyný týraly qujattar toptamasy tapsyryldy.
Kúni keshe «AMANAT» partııasynyń kezekten tys XXV Seziniń sheshimimen Májilis depýtattyǵyna kandıdat retinde partııalyq tizim boıynsha 90 adam usynyldy.
«AMANAT» partııasynyń Atqarýshy hatshysy Elnur Beısenbaev az ǵana ýaqyt ishinde Májiliske jáne barlyq deńgeıdegi máslıhattarǵa eń laıyqty úmitkerlerdi irikteý boıynsha aýqymdy jumys atqarylǵanyn atap ótti.
«El aýmaǵyndaǵy óńirlik saılaý komıssııalaryna «AMANAT» partııasynan máslıhat depýtattyǵyna 3821 kandıdattyń qujaty usynyldy. OSK-ǵa tapsyrylǵan partııalyq tizimde kvota saqtalyp, úmitkerlerdiń 30%-dan astamyn áıelder, jastar jáne erekshe qajettilikteri bar adamdar qurady. Saılaý ádil, taza ótedi dep senemiz jáne aldaǵy saıası dodaǵa tolyq daıynbyz», – dedi Elnur Beısenbaev.
Sondaı-aq, búgin «AMANAT» partııasynan Májiliske birmandatty okrýgter boıynsha usynylǵan kandıdattardyń qujattary tıisti okrýgtik saılaý komıssııalaryna usynyldy.
Ortalyq saılaý komıssııasynyń otyrysynan keıin partııanyń Atqarýshy hatshysy jýrnalısterdiń suraqtaryna jaýap berdi.
Partııalyq tizimder boıynsha usynylǵan kandıdattardyń tolyq tizimimen osy silteme boıynsha tanysýǵa bolady: https://t.me/AMANATPartiyasy/9852. birmandatty okrýgter boıynsha: https://t.me/AMANATPartiyasy/9853.
Saılaýaldy baǵdarlamanyń tolyq mátini úgit-nasıhat kezeńiniń alǵashqy kúninde jarııalanyp, partııanyń saıtyna ornalastyrylady.
«AMANAT» partııasynyń baspasóz qyzmeti
Sýretti túsirgen Álı Ǵalym
