Táýelsiz elimizdiń tynyshtyǵyn kúzetý – er azamattar úlesindegi qasterli mindet. Búgin tepse temir úzetin jigitter sapqa turyp, týǵan Otanynyń tynyshtyǵyn qorǵaýǵa saltanatty túrde ant berdi. Rásim UQK Shekara qyzmeti Almaty oblysy boıynsha departamentine qarasty Qarasaı aýdany boıynsha shekara aýdanynyń Aqjar yqshamaýdanynda ornalasqan kásibı-tehnıkalyq jáne daıyndyq bóliminde ótti.
Jas jaýyngerler kýrsynan ótip jatqan 400-den astam sarbaz Ant bergen sharanyń ereksheligi, rásimdi búkil respýblıka jurtshylyǵy tamashalaı alatyn tikeleı kórsetilim uıymdastyrylsa, bul kúni alystan at aryltyp jetken ata-ana, týys, dostardyń sanynda da esep bolǵan joq. Sondyqtan shekarashy atanǵaly turǵan sarbazdardyń ómirindegi ataýly kún olardyń jaqyndarynyń da jadynda máńgilik saqtalyp qalatyn kún bolǵany haq.
Aıtý kerek, atalǵan shekara basqarmasynyń qaqpasynan naýryz aıynda alǵash ret attaǵan sarbazdardyń búgingi aıaq alystary shıraq, júristeri birkelki. Bul – olardyń áskerı ómirdiń qatań tártibine qalyptasyp úlgergenderin bildiredi.
Mamyrdyń birinshi jeksenbisi. Tańǵy saǵat 10.00. Ár sarbazdyń ómirinde altyn árippen jazylyp qalýǵa tıis aıtýly sát.
«Bólim tik tur! Nazar solǵa!» Bastaldy. Shekara basqarmasynyń Jaýyngerlik Týy ákelingen soń shara da bastalyp kete barǵan. UQK Shekara akademııasynan arnaıy shaqyrtylǵan áskerı orkestrdiń súıemeldeýimen, elimizdiń Ánurany oryndalyp, atalǵan basqarma basshysy podpolkovnık N.Berdibaev sapqa turǵan jas sarbazdardy ataýly merekesimen quttyqtady. Budan ári bolashaq shekarashylar ant qabyldaýǵa kiristi.
Rásimge Almaty oblysy boıynsha departamenti bastyǵynyń orynbasary polkovnık A.Mýnalbaevpen birge shekarashy ardagerler jáne Naýryzbaı batyr aýdanynyń ákimdiginen kelgen qonaqtar qatysty.
...Ant qabyldaý rásiminen soń bastalǵan jıynda departament bastyǵynyń orynbasary polkovnık Arnur Mýnalbaev, «Zastava tarlandary» respýblıkalyq qoǵamdyq birlestiginiń Almaty oblystyq fılıalynyń tóraǵasy zapastaǵy polkovnık Aleksandr Dýbov, Aýǵan soǵysynyń ardagerleri zapastaǵy polkovnıkter: Grıgorıı Kýlıkov, Jeńisbek Súleımenov, Bolat Quramysovtarǵa berildi. Sondaı-aq, sarbazdarmen birge kópshilik Naýryzbaı batyr aýdany boıynsha Qorǵanys ister boıynsha departamenti bastyǵynyń orynbasary zapastaǵy maıor Erjan Alınovtyń da aıtar tilegine qulaq túrdi. Ata-analar atynan sóz sóıleý qurmetin Erǵoja Sherehanov jáne Ulmeken Erjanova apaı ıelendi.
Ata-analardyń júregindegi sózderdi jetkizgen Erǵoja aǵamyzdyń uly qatardaǵy jaýynger Nursultan Abylaı:
- Men ózimniń qarýlastarymdy bergen sertimizge adal bolyp, tabandylyqpen, erjúrektilikpen boryshymyzdy óteýge shaqyramyn. Ant qabyldaý – barshamyz úshin mańyzdy kún. Elim deıtin er bolyp, qaıtpas qaısar azamat bolyp, tepse temir úzetin áskerı ómirdiń qıyndyǵy men aýyrtpalyǵyna shydaıtyn, kez kelgen ýaqytta qolyna qarý alyp, elin qorǵaýǵa daıyn, týǵan jeriniń shekarasynda júretin sarbazdarǵa aınalamyz, - dedi.
Iá, osy sát, sarbazdyń qasynda bolǵan áke júzindegi maqtanysh pen qýanyshty baıqaý qıyn emes edi...
Aıtý kerek, áskerı ómir, shekara – kez kelgen shekarashynyń boıyna kúsh quıyp, shabyt syılaıdy. Aqyn etedi. Minberge Nursultanmen birge kóterilip, áriptesterin búgingi merekesimen quttyqtaǵan qatardaǵy jaýynger Aleksandr Malyshev kóptiń aldynda óleń oqydy. Bul – bastamasy, jas shekarashynyń jańadan bastalǵan jyr dápterine aldaǵy kúnderi jaýhar sózderge tolyqqan ústine tolyǵa túsedi degen senimdemiz.
...Jıynnyń sońy tolyqqandy shekarashy atanǵan sarbazdardyń saltanatty sherýine ulasty. Budan ári, qalyń jurtshylyqtyń nazaryna jas ánshiler men bıshilerdiń merekelik shaǵyn konerttik baǵdarlamasy usynyldy.
Al sanaýly mınýttardan soń respýblıkanyń túkpir-túkpirinen jetken qaýym taǵatsyzdana tosqan sát te týyp, ózderiniń Otan oǵlany atanǵan uldarymen qaýyshqan... Ata-ana – ulymen, ata-áje – nemeresimen, dos – óziniń qulyn-taıdaı tebisip ósken qurbysymen, boıjetken – súıgen jigitimen... Demek, osynaý qanshama júrekti týlatqan aıtýly kúnniń eshqashan umytylmaıtyny, ásirese jas shekarashy sarbazdardyń boıyna eselep kúsh quıatyny haq. Endeshe, sát-sapar, jas sarbazdar, el tynyshtyǵy ózderińe amanat!
Dına LITPIN,
"Adyrna" ulttyq portaly
