Keshe memleket basshysy Qasym-Jomart Toqaev eki jyldan asa qyzmet atqarǵan Álıhan Smaıylov basqaratyn mınıstrler kabınetin otstavkaǵa jiberdi. Búgin «Amanat» partııasy prezıdent ákimshiliginiń basshysy Oljas Bektenovti premer laýazymyna usyndy.
Byltyr naýryzdaǵy Májilis saılaýynan keıin Úkimet aýysa ma degen suraq el ishin kezip júrdi. Sondaı-aq Parlament jańa sessııaǵa kirisetin qyrkúıek aıynda saıası korrıdorlarda «Álıhan Smaıylov otstavkaǵa ketedi eken» degen sóz jeldeı esti. Keıingi ýaqytta Úkimetti otstavkaǵa jiberý týraly sóz saıabyrsyp qalǵan bolatyn. Prezıdent Álıhan Smaıylov basqaratyn mınıstrler kabınetin nelikten dál qazir doǵarysqa jiberdi?
«JAÝAPKERShILIKTI ARQALAITYN ÚKIMET KEREK BOLDY»
Saıası sarapshy Qazbek Beısebaev Úkimettiń dál qazir doǵarysqa jiberilýin kabınettiń jaýapkershiligimen baılanystyrady. Prezıdentke endigide bar jaýapkershilikti óz moınyna alyp atqaratyn kabınet qajet. Jáne ol taza ekonomıkalyq jáne áleýmettik máseleni retteýmen aınalysýy tıis.
– Bizge qazir etik kıip, sharýanyń bel ortasynda júretin premer-mınıstr kerek. Kún saıyn ár túrli nysanda bolyp, qordalanǵan máseleni birden sheship otyratyn isker Úkimet basshysy qajet. Al Álıhan Smaıylov gýmanıtarııa salasynyń ókili,ıaǵnı statıst. Bizge óndiris salasynyń mamany kerek. Jylý elektar stanııalaryna baryp, qurylys nysany máselesin sheshetin premer kerek. Qazirgi tańda Úkimettiń ókilettiligi men jaýapkershigi artyp jatyr. Saıası qyzmetti prezıdent óz moınyna alady, al ekonomıkany damytýdy premer-mınıstrge júkteledi, - deıdi Qazbek Beısebaev.
Saıası sarapshy Qazbek Beısebaevtyń aıtýynsha, Úkimet prezıdent ákimshiligine baǵynyshty bolmaı, derbes qyzmet etýi kerek. Sonyń ýaqyty endi kelgendeı.
- Jýyrda Memleket basshysy Qasym-Jomart Toqaev «Biz úkimetke kóp ókilettilik beremiz. Buryn Úkimet prezıdent ákimshiligimen aqyldasatyn. Endi Úkimetke erkindik beremiz, derbes bolady jáne bárin ózderi sheshedi» dep aıtqan bolatyn. Shyny kerek, buǵan deıin Úkimet prezıdent ákimshiligine táýeldi boldy. Bizde ekonomıka jaǵynan kóptegen problema bar. Ony bir ortalyqtan basqarý arqyly sheshý qıyn. Prezıdent aıtqandaı Úkimet derbes bolýy kerek– deıdi ol.
«ÚKIMET PREZIDENT TAPSYRMALARYN ORYNDAǴAN JOQ»
Ekonomıst, kezekten tys prezıdent saılaýynyń kandıdaty bolyp kórgen Meıram Qajyken ketken Úkimetti synaýdyń qajeti joq ekenin eskertti.
- Ózińiz halyq kúzde Úkimettiń otstavkaǵa ketýin talap etti dep aıttyńyz ǵoı. Halyqtyń talap-tilegi oryndaldy. Álıhan Smaıylov basqaratyn mınıstrler kabınetiniń jaramsyz Úkimet ekenin aıtyp júrdik. Biraq ketken Úkimet ketti, endi ol týraly aıtýdyń ne qajeti bar? Jumys istep júrgen kezde aıtý kerek, al qazir kesh. Meniń oıymsha, ketken úkimet týraly aıtýdyń qajeti joq. Jańadan keletin Úkimetti synaý kerek. Álıhan Smaıylov basqarǵan Úkimet Prezıdenttapsyrmalaryn oryndaǵan joq. Halyqtyń áleýmettik jaǵdaıyn kóterip, eń tómengi jalaqyny kóterýdi sheshe almady. Úkimettiń ekonomıkalyq jáne áleýmettik saladaǵy jumysy tutas qurdymǵa ketti. Sondaı-aq saıası partııalardy tirkeý jaǵynan eshqandaı oń ózgeris bolmady – dedi ol.
Budan aldyn Prezıdent Toqaev 2023 jylǵy 1 qyrkúıektegi joldaýynda «Naqty salalarǵa qatysty sheshimderdi ázirleý jáne oryndaý mindeti, sondaı-aq túpki nátıje úshin jaýapkershilik tolyǵymen mınıstrlerge júkteledi. Óıtkeni olar óziniń buıryǵymen jedel sheshim qabyldap otyrýǵa tıis. Bul – ákimderge de qatysty másele»,-degen bolatyn. Sonda el basshysy «ekonomıkalyq saıasattyń iske asyrylýyna Úkimet tolyǵymen jaýap bermek» degendi qadaı aıtqan. Prezıdenttiń aıtýynsha, Úkimet «bıýrokratııaǵa jáne sózbuıdaǵa salynbaı, Prezıdent ákimshiligine jaltaqtamaı, ekonomıkany derbes basqarýdyń barlyq ádis-tásilderin qolynda ustaýǵa tıis».
OLJAS. OL KIM?
Qańtar oqıǵasynynan keıin Úkimettegi kezekshilik kezeńde Premer bolyp taǵaıyndalǵan Álıhan Smaıylovtyń kabıneti doǵarysqa jiberilgen bolatyn. Búgin «Amanat» partııasynyń tóraǵasy Erlan Qoshanov Prezıdentpen aqyldasqan t úrde Premer-mınıstr qyzmetine Oljas Bektenovtiń kandıdatýrasyn usynǵan.
Búgin tústen keıin Prezıdenttiń qatysýymen ótetin Parlamenttegi partııalardyń frakııalar jıynynda bul másele talqylanady. Ádette Aqordanyń usynysyn parlament buǵan deıin keri qaqqan emes.Bul joly da eshqandaı sıýrprız kútilmeıdi.
Al Oljas Bektenov kim?
Ol 1980 jyly 13 jeltoqsanda Almaty qalasynda dúnıege kelgen. 2001 jyly Qazaq memlekettik zań akademııasynan zańger mamandyǵyn bitirgen. 2002-2005 jyldary aralyǵynda Almaty qalasy ádilet basqarmasynda bas maman qyzmetin atqarǵan. 2006-2009 jyldary Prezıdent ákimshiliginde qyzmet etken.
Keıin Ádilet mınıstrliginiń tirkeý jáne quqyqtyq alǵashqy kómek kórsetý qyzmeti komıteti tórǵasynyń orynbasary, Ekonomıkalyq qylmys jáne sybaılas jemqorlyq qarsy kúres agenttigi ortalyq apparatynda departament basshysy, Astana qalasy ákiminiń apparat basshysy, Prezıdent ákimshiligi basshysy hatshylyǵynyń meńgerýshisi, Astana qalasy boıynsha Sybaılas jemqorlyqqa qarsy is-qımyl ulttyq bıýrosynyń (sybaılas jemqorlyqqa qarsy qyzmet) basshysy, Aqmola oblysy ákiminiń orynbasary, Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń birinshi orynbasary, keıin osy agenttik tóraǵasy qyzmetterin atqarǵan.
Oljas Bektenov 2023 jylǵy 3 sáýirden beri Prezıdent ákimshiliginiń basshysy bolatyn.
Serik Joldasbaı
«Adyrna» ulttyq portaly
