6 aqpannan bastap 4%-dyq avtonesıe baǵdarlamasy ashylady. Biraq byltyrdaǵy kezek joıylyp, jańa kezek qurylady. Bul týraly jýrnalıst Dıas Nuraqyn Facebook paraqshasynda aıtty, dep habarlaıdy “Adyrna” ulttyq portaly.
Onyń aıtýynsha, kólik alý úshin endi kólikke emes, aqshaǵa kezekke turý qajet.
“6 aqpannan bastap 4%-dyq avtonesıe baǵdarlamasy ashylatyn boldy. Iaǵnı, kelesi dúısenbi kúni tańǵy saǵat 10-nan bastap, avtonesie.kz degen portaldan ótinish bere alasyzdar. Biraq qýanatyn eshqandaı jańalyq joq. Sebebi, byltyr mamyrdan beri kólik alamyn, 4%-dyq jeńildetilgen nesıemen temir tulpar minemin degenderdiń qýanyshy sý sepkendeı basyldy. Sebebi, ol kezektiń bári joıylady. Endi kólikke emes, aqshaǵa kezekke turatyn boldyq. Avtonesıege bólgen aqsha óte az. Bar bolǵany qazir bankterde 7 mlrd 600 mln teńge aqsha bar eken. Bul bar bolǵany 760 adamnyń kólik alýyna jetetin aqsha eken.
Sol sebepti endi aqsha úshin aıqas bastalady. Ol úshin ellektrondy kezekke turasyzdar. Elektrondy kezekke turǵannan keıin sizge aqsha beremiz dep bank shaqyrtady. Ol jerge baryp, kelisim alasyz. Ol sizge 60-aq kúnge jaraıdy. Sol 60 kúnniń ishinde kólik salonyna baryp, ózińizge qajetti kólikti taýyp, rásimdep alý kerek. Al bizde bilesizder, byltyrdan beri kólikter salondarda kredıtke emes, qolma-qol alýǵa joq bolyp jatyr. Sol sebepti, 60 kúnniń ishinde salondar sý jańa kólikti taýyp beredi degenge senbeımin”,- dedi Dıas Nuraqyn.
